[329] Sāvatthiyaṁ viharati ... Tatra kho bhagavā ... Seyyathāpi
bhikkhave himavā pabbatarājā parikkhayaṁ pariyādānaṁ gaccheyya ṭhapetvā satta
sāsapamattiyo pāsāṇasakkharā. Taṁ kiṁ maññatha bhikkhave katamaṁ
nu kho bahutaraṁ yaṁ vā himavato pabbatarājassa parikkhīṇaṁ pariyādinnaṁ
yā vā satta sāsapamattiyo pāsāṇasakkharā avasiṭṭhāti. Etadeva
bhante bahutaraṁ himavato pabbatarājassa yadidaṁ parikkhīṇaṁ pariyādinnaṁ
appamattikā satta sāsapamattiyo pāsāṇasakkharā avasiṭṭhā neva
Satimaṁ kalaṁ upenti na sahassimaṁ kalaṁ upenti na satasahassimaṁ kalaṁ
upenti himavato pabbatarājassa parikkhīṇaṁ pariyādinnaṁ upanidhāya
satta sāsapamattiyo pāsāṇasakkharā avasiṭṭhāti.

[330] Evameva kho bhikkhave ariyasāvakassa diṭṭhisampannassa
puggalassa abhisametāvino etadeva bahutaraṁ dukkhaṁ yadidaṁ parikkhīṇaṁ
pariyādinnaṁ appamattakaṁ avasiṭṭhaṁ neva satimaṁ kalaṁ upeti na
sahassimaṁ kalaṁ upeti na satasahassimaṁ kalaṁ upeti purimaṁ dukkhakkhandhaṁ
parikkhīṇaṁ pariyādinnaṁ upanidhāya yadidaṁ sattakkhattuparamatā. Evaṁ
mahatthiyo kho bhikkhave dhammābhisamayo evaṁ mahatthiyo dhammacakkhupaṭilābhoti.
Dasamaṁ.

[331] Sāvatthiyaṁ viharati ... Tatra kho bhagavā ... Seyyathāpi
bhikkhave puriso sinerussa pabbatarājassa satta muggamattiyo pāsāṇasakkharā
upanikkhipeyya. Taṁ kiṁ maññatha bhikkhave katamaṁ nu kho bahutaraṁ yā
vā satta muggamattiyo pāsāṇasakkharā upanikkhittā yo vā sineru
pabbatarājāti. Etadeva bhante bahutaraṁ yadidaṁ sineru pabbatarājā
appamattikā satta muggamattiyo pāsāṇasakkharā upanikkhittā neva
satimaṁ kalaṁ upenti na sahassimaṁ kalaṁ upenti na satasahassimaṁ kalaṁ
upenti sineruṁ pabbatarājānaṁ upanidhāya satta muggamattiyo
pāsāṇasakkharā upanikkhittāti.

[332] Evameva kho bhikkhave ariyasāvakassa diṭṭhisampannassa
Puggalassa adhigamaṁ upanidhāya aññatitthiyasamaṇabrāhmaṇaparibbājakānaṁ
adhigamo neva satimaṁ kalaṁ upeti na sahassimaṁ kalaṁ upeti na satasahassimaṁ
kalaṁ upeti. Evaṁ mahādhigamo kho 1 bhikkhave diṭṭhisampanno puggalo
evaṁ mahābhiññoti. Ekādasamaṁ.
Abhisamayavaggo dasamo.
Tassa uddānaṁ
nakhasikhā pokkharaṇī sambhejjaudakā dve 2
dve paṭhavī dve samuddā tayo ca pabbatūpamāti.
Abhisamayasaṁyuttaṁ paṭhamaṁ niṭṭhitaṁ.
----------
1 Ma. Yu. khosaddo natthi. 2 Ma. Yu. sambhejjaudake ca dve.
Dhātusaṁyuttaṁ
-----
nānattavaggo paṭhamo

[333] Sāvatthiyaṁ viharati ... Dhātunānattaṁ vo bhikkhave desissāmi
taṁ suṇātha sādhukaṁ manasikarotha bhāsissāmīti. Evaṁ bhanteti kho
te bhikkhū bhagavato paccassosuṁ.

[334] Bhagavā etadavoca katamañca bhikkhave dhātunānattaṁ
cakkhudhātu rūpadhātu cakkhuviññāṇadhātu sotadhātu saddadhātu
sotaviññāṇadhātu ghānadhātu gandhadhātu ghānaviññāṇadhātu jivhādhātu
rasadhātu jivhāviññāṇadhātu kāyadhātu phoṭṭhabbadhātu kāyaviññāṇadhātu
manodhātu dhammadhātu manoviññāṇadhātu idaṁ vuccati bhikkhave
dhātunānattanti. Paṭhamaṁ.

[335] Sāvatthiyaṁ viharati ... Tatra kho bhagavā ... Dhātunānattaṁ
bhikkhave paṭicca uppajjati phassanānattaṁ. Katamañca bhikkhave
dhātunānattaṁ. Cakkhudhātu sotadhātu ghānadhātu jivhādhātu kāyadhātu
manodhātu. Idaṁ vuccati bhikkhave dhātunānattaṁ.

[336] Katamañca bhikkhave dhātunānattaṁ paṭicca uppajjati
phassanānattaṁ. Cakkhudhātuṁ bhikkhave paṭicca uppajjati cakkhusamphasso
sotadhātuṁ paṭicca ... Ghānadhātuṁ paṭicca ... Jivhādhātuṁ paṭicca ...
Kāyadhātuṁ paṭicca ... Manodhātuṁ paṭicca uppajjati manosamphasso. Evaṁ
Kho bhikkhave dhātunānattaṁ paṭicca uppajjati phassanānattanti. Dutiyaṁ.

[337] Sāvatthiyaṁ viharati ... Tatra kho bhagavā ... Dhātunānattaṁ
bhikkhave paṭicca uppajjati phassanānattaṁ no phassanānattaṁ paṭicca
uppajjati dhātunānattaṁ. Katamañca bhikkhave dhātunānattaṁ. Cakkhudhātu
.pe. Manodhātu. Idaṁ vuccati bhikkhave dhātunānattaṁ.

[338] Katamañca bhikkhave dhātunānattaṁ paṭicca uppajjati
phassanānattaṁ no phassanānattaṁ paṭicca uppajjati dhātunānattaṁ.
Cakkhudhātuṁ bhikkhave paṭicca uppajjati cakkhusamphasso no cakkhusamphassaṁ
paṭicca uppajjati cakkhudhātu .pe. Manodhātuṁ paṭicca uppajjati
manosamphasso no manosamphassaṁ paṭicca uppajjati manodhātu.
Evaṁ kho bhikkhave dhātunānattaṁ paṭicca uppajjati phassanānattaṁ
no phassanānattaṁ paṭicca uppajjati dhātunānattanti. Tatiyaṁ.