[319] Sāvatthiyaṁ viharati ... Tatra kho bhagavā ... Seyyathāpi
bhikkhave
Puriso mahāpaṭhaviyā satta kolaṭṭhimattiyo guḷikā upanikkhipeyya.
Taṁ kiṁ maññatha bhikkhave katamaṁ nu kho bahutaraṁ yā vā satta
kolaṭṭhimattiyo guḷikā upanikkhittā yā vā mahāpaṭhavīti. Etadeva
bhante bahutaraṁ yadidaṁ mahāpaṭhavī appamattikā satta kolaṭṭhimattiyo
guḷikā upanikkhittā neva satimaṁ kalaṁ upenti na sahassimaṁ kalaṁ
upenti na satasahassimaṁ kalaṁ upenti mahāpaṭhaviṁ upanidhāya satta
kolaṭṭhimattiyo guḷikā upanikkhittāti.

[320] Evameva kho bhikkhave .pe. Evaṁ mahatthiyo dhammacakkhu-
paṭilābhoti. Pañcamaṁ.

[321] Sāvatthiyaṁ viharati ... Tatra kho bhagavā ... Seyyathāpi
bhikkhave mahāpaṭhavī parikkhayaṁ pariyādānaṁ gaccheyya ṭhapetvā satta
kolaṭṭhimattiyo guḷikā. Taṁ kiṁ maññatha bhikkhave katamaṁ nu kho bahutaraṁ
yaṁ vā mahāpaṭhaviyā parikkhīṇaṁ pariyādinnaṁ yā vā satta kolaṭṭhimattiyo
guḷikā avasiṭṭhāti. Etadeva bhante bahutaraṁ mahāpaṭhaviyā
yadidaṁ parikkhīṇaṁ pariyādinnaṁ appamattikā satta kolaṭṭhimattiyo
guḷikā avasiṭṭhā neva satimaṁ kalaṁ upenti na sahassimaṁ kalaṁ upenti
na satasahassimaṁ kalaṁ upenti mahāpaṭhaviyā parikkhīṇaṁ pariyādinnaṁ
upanidhāya satta kolaṭṭhimattiyo guḷikā avasiṭṭhāti.

[322] Evameva kho bhikkhave .pe. Evaṁ mahatthiyo dhammacakkhu-
paṭilābhoti. Chaṭṭhaṁ.

[323] Sāvatthiyaṁ viharati ... Tatra kho bhagavā ... Seyyathāpi
bhikkhave puriso mahāsamuddā 1 dve vā tīṇi vā udakaphusitāni uddhareyya.
Taṁ kiṁ maññatha bhikkhave katamaṁ nu kho bahutaraṁ yāni vā dve vā
tīṇi vā udakaphusitāni ubbhatāni yaṁ vā mahāsamudde udakanti.
Etadeva bhante bahutaraṁ yadidaṁ mahāsamudde udakaṁ appamattakāni
dve vā tīṇi vā udakaphusitāni ubbhatāni neva satimaṁ kalaṁ upenti
na sahassimaṁ kalaṁ upenti na satasahassimaṁ kalaṁ upenti mahāsamudde
udakaṁ upanidhāya dve vā tīṇi vā udakaphusitāni ubbhatānīti.

[324] Evameva kho bhikkhave .pe. Evaṁ mahatthiyo dhammacakkhu-
paṭilābhoti. Sattamaṁ.

[325] Sāvatthiyaṁ viharati ... Tatra kho bhagavā ... Seyyathāpi
bhikkhave mahāsamuddo parikkhayaṁ pariyādānaṁ gaccheyya ṭhapetvā dve vā
tīṇi vā udakaphusitāni. Taṁ kiṁ maññatha bhikkhave katamaṁ nu kho bahutaraṁ
yaṁ vā mahāsamudde udakaṁ parikkhīṇaṁ pariyādinnaṁ yāni vā dve vā
tīṇi vā udakaphusitāni avasiṭṭhānīti. Etadeva bhante bahutaraṁ
mahāsamudde udakaṁ yadidaṁ parikkhīṇaṁ pariyādinnaṁ appamattakāni
dve vā tīṇi vā udakaphusitāni avasiṭṭhāni neva satimaṁ kalaṁ
upenti na sahassimaṁ kalaṁ upenti na satasahassimaṁ kalaṁ upenti
mahāsamudde udakaṁ parikkhīṇaṁ pariyādinnaṁ upanidhāya dve vā tīṇi
vā udakaphusitāni avasiṭṭhānīti.
1 Ma. Yu. mahāsamuddato.

[326] Evameva kho bhikkhave .pe. Evaṁ mahatthiyo dhammacakkhu-
paṭilābhoti. Aṭṭhamaṁ.

[327] Sāvatthiyaṁ viharati ... Tatra kho bhagavā ... Seyyathāpi
bhikkhave puriso himavato pabbatarājassa satta sāsapamattiyo pāsāṇasakkharā
upanikkhipeyya. Taṁ kiṁ maññatha bhikkhave katamaṁ nu kho bahutaraṁ yā
vā satta sāsapamattiyo pāsāṇasakkharā upanikkhittā yo vā himavā
pabbatarājāti. Etadeva bhante bahutaraṁ yadidaṁ himavā pabbatarājā
appamattikā satta sāsapamattiyo pāsāṇasakkharā upanikkhittā neva
satimaṁ kalaṁ upenti na sahassimaṁ kalaṁ upenti na satasahassimaṁ kalaṁ
upenti himavantaṁ pabbatarājānaṁ upanidhāya satta sāsapamattiyo
pāsāṇasakkharā upanikkhittāti.

[328] Evameva kho bhikkhave .pe. Evaṁ mahatthiyo dhammacakkhu-
paṭilābhoti. Navamaṁ.