[299] Api nu tvaṁ susima evaṁ jānanto evaṁ passanto
anekavihitaṁ pubbenivāsaṁ anussarasi seyyathīdaṁ ekampi jātiṁ .pe.
Iti sākāraṁ sauddesaṁ anekavihitaṁ pubbenivāsaṁ anussarasīti.
No hetaṁ bhante.

[300] Api nu tvaṁ susima evaṁ jānanto evaṁ passanto dibbena
cakkhunā visuddhena atikkantamānusakena satte passasi cavamāne .pe.
Yathākammūpage satte pajānāsīti. No hetaṁ bhante.

[301] Api nu tvaṁ susima evaṁ jānanto evaṁ passanto ye
te santā vimokkhā atikkamma rūpe āruppā te kāyena phusitvā
viharasīti. No hetaṁ bhante.

[302] Etthadāni susima idañca veyyākaraṇaṁ imesañca dhammānaṁ
asamāpatti idaṁ no susima kathanti. Atha kho āyasmā susimo
bhagavato pādesu sirasā nipatitvā bhagavantaṁ etadavoca accayo
maṁ bhante accagamā yathābālaṁ yathāmūḷhaṁ yathāakusalaṁ yvāhaṁ evaṁ
svākkhāte dhammavinaye dhammatthenako pabbajito tassa me bhante
bhagavā accayaṁ accayato paṭiggaṇhātu āyatiṁ saṁvarāyāti.

[303] Taggha taṁ susima accayo accagamā yathābālaṁ yathāmūḷhaṁ
yathāakusalaṁ yo tvaṁ evaṁ svākkhāte dhammavinaye dhammatthenako
pabbajito seyyathāpi susima coraṁ āgucāriṁ gahetvā rañño
dasseyyuṁ ayaṁ te deva coro āgucārī imassa yaṁ icchasi taṁ
daṇḍaṁ paṇehīti tamenaṁ rājā evaṁ vadeyya gacchatha bho imaṁ
purisaṁ daḷhāya rajjuyā pacchābāhaṁ gāḷhabandhanaṁ bandhitvā khuramuṇḍaṁ
karitvā kharassarena paṇavena rathiyā rathiyaṁ siṅghāṭakena
siṅghāṭakaṁ parinetvā dakkhiṇena dvārena nikkhāmetvā dakkhiṇato nagarassa
sīsaṁ chindathāti tamenaṁ rañño purisā daḷhāya rajjuyā pacchābāhaṁ
rathiyā rathiyaṁ siṅghāṭakena siṅghāṭakaṁ parinetvā dakkhiṇena dvārena
nikkhāmetvā dakkhiṇato nagarassa sīsaṁ chindeyyuṁ taṁ kiṁ maññasi
susima api nu so puriso tatonidānaṁ dukkhadomanassaṁ
paṭisaṁvedayethāti 1 . Evaṁ bhante.

[304] Yaṁ kho so susima puriso tatonidānaṁ dukkhadomanassaṁ
paṭisaṁvedayetha 1 yāva evaṁ svākkhāte dhammavinaye dhammatthenakassa
pabbajjā ayaṁ tato dukkhavipākatarā ca kaṭukavipākatarā ca apica
vinipātāya saṁvattati yato ca kho tvaṁ susima accayaṁ accayato
disvā yathādhammaṁ paṭikarosi tante mayaṁ paṭiggaṇhāma vuḍḍhi
hesā susima ariyassa vinaye yo accayaṁ accayato disvā
1 Ma. Yu. paṭisaṁvediyethāti.
Yathādhammaṁ paṭikaroti āyatiṁ [1]- saṁvaraṁ āpajjatīti. Dasamaṁ.
Mahāvaggo sattamo.
Tassa uddānaṁ
dve assutavatā vuttā puttamaṁsena cāparaṁ
atthirāgo ca nagaraṁ sammasaṁ naḷakalāpiyaṁ
kosambī upayanti ca dasamo vutto susimenāti 2 .
----------
1 Ma. Yu. ca. 2 Ma. Yu. dasamo sūsimena cāti.
Samaṇabrāhmaṇavaggo aṭṭhamo

[305] Evamme sutaṁ ekaṁ samayaṁ bhagavā sāvatthiyaṁ viharati
jetavane anāthapiṇḍikassa ārāme.

[306] Tatra kho bhagavā ... Ye hi keci bhikkhave samaṇā
vā brāhmaṇā vā jarāmaraṇaṁ nappajānanti jarāmaraṇasamudayaṁ
nappajānanti jarāmaraṇanirodhaṁ nappajānanti jarāmaraṇanirodhagāminiṁ
paṭipadaṁ nappajānanti na mete bhikkhave samaṇā vā brāhmaṇā
vā samaṇesu vā samaṇasammatā brāhmaṇesu vā brāhmaṇasammatā
na ca pana te āyasmanto sāmaññatthaṁ vā brāhmaññatthaṁ vā
diṭṭheva dhamme sayaṁ abhiññā sacchikatvā upasampajja viharanti.

[307] Ye ca kho keci bhikkhave samaṇā vā brāhmaṇā vā
jarāmaraṇaṁ pajānanti .pe. Te khome bhikkhave samaṇā vā brāhmaṇā
vā samaṇesu ceva samaṇasammatā brāhmaṇesu ca brāhmaṇasammatā
te ca panāyasmanto sāmaññatthañca brāhmaññatthañca diṭṭheva
dhamme sayaṁ abhiññā sacchikatvā upasampajja viharantīti. Suttanto
eko.

[308] Evamme sutaṁ .pe. Jātiṁ nappajānanti .pe. Bhavaṁ
nappajānanti ... Upādānaṁ nappajānanti ... Taṇhaṁ nappajānanti ...
Vedanaṁ nappajānanti ... Phassaṁ nappajānanti ... Saḷāyatanaṁ nappajānanti ...
Nāmarūpaṁ nappajānanti ... Viññāṇaṁ nappajānanti ... Saṅkhāre
nappajānanti saṅkhārasamudayaṁ nappajānanti saṅkhāranirodhaṁ nappajānanti
saṅkhāranirodhagāminiṁ paṭipadaṁ nappajānanti .pe. Sayaṁ abhiññā
sacchikatvā upasampajja viharantīti. Ekādasamaṁ.
Samaṇabrāhmaṇavaggo aṭṭhamo.
Tassa uddānaṁ
paccayekādasa vuttā catusaccavibhajjanā
samaṇabrāhmaṇavaggo nidānaṁ 1 bhavati aṭṭhamaṁ 2 .
[3]- Vaggassa uddānaṁ
buddho āhāradasabalo 4 kaḷāraṁ gahapatipañcamaṁ
dukkhavaggo 5 mahāvaggo aṭṭhamaṁ samaṇabrāhmaṇanti.
------------
1 Ma. Yu. nidāne. 2 Ma. aṭṭhamo. 3 Yu. ayaṁ. 4 Yu. āhāradasabalaṁ.
5 Yu. rukkhavaggo.
Antarapeyyālo navamo