[59] Bhagavā etadavoca yāya ca bhikkhave avijjāya nivutassa
bālassa yāya ca taṇhāya saṁyuttassa ayaṁ kāyo samudāgato sā
ceva avijjā bālassa appahīnā sā ca taṇhā aparikkhīṇā taṁ
kissa hetu na hi bhikkhave bālo acari brahmacariyaṁ sammā
dukkhakkhayāya tasmā bālo kāyassa bhedā kāyūpago hoti so
kāyūpago samāno na parimuccati jātiyā jarāya maraṇena sokehi
paridevehi dukkhehi domanassehi upāyāsehi na parimuccati dukkhasmāti
vadāmi. Yāya ca bhikkhave avijjāya nivutassa paṇḍitassa yāya ca
taṇhāya saṁyuttassa ayaṁ kāyo samudāgato sā ceva avijjā
paṇḍitassa pahīnā sā ca taṇhā parikkhīṇā taṁ kissa hetu acari
bhikkhave paṇḍito brahmacariyaṁ sammā dukkhakkhayāya tasmā paṇḍito
kāyassa bhedā na kāyūpago hoti so akāyūpago samāno
parimuccati jātiyā jarāya maraṇena sokehi paridevehi dukkhehi
domanassehi upāyāsehi parimuccati dukkhasmāti vadāmi. Ayaṁ
1 Yu. adhippāyo. evamuparipi.
Kho bhikkhave viseso ayaṁ adhippāyaso idannānākaraṇaṁ paṇḍitassa
bālena yadidaṁ brahmacariyavāsoti. Navamaṁ.

[60] Sāvatthiyaṁ viharati ... Paṭiccasamuppādañca vo bhikkhave
desessāmi paṭiccasamuppanne ca dhamme taṁ suṇātha sādhukaṁ
manasikarotha bhāsissāmīti. Evaṁ bhanteti kho te bhikkhū bhagavato
paccassosuṁ.

[61] Bhagavā etadavoca katamo ca bhikkhave paṭiccasamuppādo
jātipaccayā bhikkhave jarāmaraṇaṁ uppādā vā tathāgatānaṁ anuppādā
vā tathāgatānaṁ ṭhitāva sā dhātu dhammaṭṭhitatā dhammaniyāmatā
idappaccayatā taṁ tathāgato abhisambujjhati abhisameti abhisambujjhitvā
abhisametvā ācikkhati deseti paññapeti 1 paṭṭhapeti vivarati vibhajati
uttānīkaroti passathāti cāha. Jātipaccayā bhikkhave jarāmaraṇaṁ
.pe. Bhavapaccayā bhikkhave jāti ... Upādānapaccayā bhikkhave bhavo ...
Taṇhāpaccayā bhikkhave upādānaṁ ... Vedanāpaccayā bhikkhave taṇhā ...
Phassapaccayā bhikkhave vedanā ... Saḷāyatanapaccayā bhikkhave phasso ...
Nāmarūpapaccayā bhikkhave saḷāyatanaṁ ... Viññāṇapaccayā bhikkhave
nāmarūpaṁ ... Saṅkhārapaccayā bhikkhave viññāṇaṁ ... Avijjāpaccayā bhikkhave
saṅkhārā uppādā vā tathāgatānaṁ anuppādā vā tathāgatānaṁ
ṭhitāva sā dhātu dhammaṭṭhitatā dhammaniyāmatā idappaccayatā taṁ
tathāgato abhisambujjhati abhisameti abhisambujjhitvā abhisametvā
1 Ma. Yu. paññāpeti. evamuparipi.
Ācikkhati deseti paññapeti paṭṭhapeti vivarati vibhajati uttānīkaroti
passathāti cāha. Avijjāpaccayā bhikkhave saṅkhārā. Iti kho
bhikkhave yā tatra tathatā avitathatā anaññathatā idappaccayatā
ayaṁ vuccati bhikkhave paṭiccasamuppādo.

[62] Katame ca bhikkhave paṭiccasamuppannā dhammā jarāmaraṇaṁ
bhikkhave aniccaṁ saṅkhataṁ paṭiccasamuppannaṁ khayadhammaṁ vayadhammaṁ virāgadhammaṁ
nirodhadhammaṁ. Jāti bhikkhave aniccā saṅkhatā paṭiccasamuppannā
khayadhammā vayadhammā virāgadhammā nirodhadhammā. Bhavo
bhikkhave anicco saṅkhato paṭiccasamuppanno khayadhammo vayadhammo
virāgadhammo nirodhadhammo. Upādānaṁ bhikkhave .pe. Taṇhā
bhikkhave ... Vedanā bhikkhave ... Phasso bhikkhave ... Saḷāyatanaṁ
bhikkhave ... Nāmarūpaṁ bhikkhave ... Viññāṇaṁ bhikkhave ... Saṅkhārā
bhikkhave ... Avijjā bhikkhave aniccā saṅkhatā paṭiccasamuppannā khayadhammā
vayadhammā virāgadhammā nirodhadhammā. Ime vuccanti bhikkhave
paṭiccasamuppannā dhammā.

[63] Yato kho bhikkhave ariyasāvakassa ayañca paṭiccasamuppādo
ime ca paṭiccasamuppannā dhammā yathābhūtaṁ sammappaññāya sudiṭṭhā
honti sova 1 pubbantaṁ vā upadhāvissati ahosiṁ nu khvāhaṁ
atītamaddhānaṁ nanu kho ahosiṁ atītamaddhānaṁ kiṁ nu kho ahosiṁ
atītamaddhānaṁ kathaṁ nu kho ahosiṁ atītamaddhānaṁ kiṁ hutvā kiṁ
1 Ma. Yu. so vata.
Ahosiṁ nu khvāhaṁ atītamaddhānanti aparantaṁ vā upadhāvissati
bhavissāmi nu khvāhaṁ anāgatamaddhānaṁ nanu kho bhavissāmi anāgatamaddhānaṁ
kiṁ nu kho bhavissāmi anāgatamaddhānaṁ kathaṁ nu kho
bhavissāmi anāgatamaddhānaṁ kiṁ hutvā kiṁ bhavissāmi nu khvāhaṁ
anāgatamaddhānanti etarahi vā paccuppannaṁ addhānaṁ ajjhattaṁ
kathaṁkathī bhavissati ahaṁ nu khosmi no nu khosmi kiṁ nu khosmi
kathaṁ nu khosmi ayaṁ nu kho satto kuto āgato so kuhiṁ
gāmī 1 bhavissatīti netaṁ ṭhānaṁ vijjati taṁ kissa hetu tathā hi
bhikkhave ariyasāvakassa ayañca paṭiccasamuppādo ime ca paṭiccasamuppannā
dhammā yathābhūtaṁ sammappaññāya sudiṭṭhāti. Dasamaṁ.
Āhāravaggo dutiyo.
Tassa uddānaṁ
āhāraphaggunañceva 2 dve ca samaṇabrāhmaṇā
kaccānagottaṁ 3 dhammakathikaṁ acelaṁ timbarukkhena ca
bālapaṇḍitañceva 4 dasamo paccayena cāti.
------------
1 Ma. gamissatīti. 2 Ma. Yu. āhāraṁ phagguno ceva. 3 Yu. kaccāyanagotto.
4 Ma. bālapaṇḍitato ceva. Yu. bālena paṇḍito ceva.
Dasabalavaggo tatiyo

[64] Sāvatthiyaṁ viharati ... Dasabalasamannāgato bhikkhave tathāgato
catūhi ca vesārajjehi samannāgato āsabhaṇṭhānaṁ paṭijānāti parisāsu
sīhanādaṁ nadati brahmacakkaṁ pavatteti iti rūpaṁ iti rūpassa samudayo
iti rūpassa atthaṅgamo iti vedanā iti vedanāya samudayo iti
vedanāya atthaṅgamo iti saññā iti saññāya samudayo iti
saññāya atthaṅgamo iti saṅkhārā iti saṅkhārānaṁ samudayo iti
saṅkhārānaṁ atthaṅgamo iti viññāṇaṁ iti viññāṇassa samudayo
iti viññāṇassa atthaṅgamo iti imasmiṁ sati idaṁ hoti
imassuppādā idaṁ uppajjati imasmiṁ asati idaṁ na hoti imassa
nirodhā idaṁ nirujjhati yadidaṁ avijjāpaccayā saṅkhārā saṅkhārapaccayā
viññāṇaṁ .pe. Evametassa kevalassa dukkhakkhandhassa
samudayo hoti. Avijjāya tveva asesavirāganirodhā saṅkhāranirodho
saṅkhāranirodhā viññāṇanirodho .pe. Evametassa kevalassa
dukkhakkhandhassa nirodho hotīti. Paṭhamaṁ.

[65] Sāvatthiyaṁ viharati ... Dasabalasamannāgato bhikkhave tathāgato
catūhi ca vesārajjehi samannāgato āsabhaṇṭhānaṁ paṭijānāti parisāsu
sīhanādaṁ nadati brahmacakkaṁ pavatteti iti rūpaṁ iti rūpassa samudayo
iti rūpassa atthaṅgamo iti vedanā iti vedanāya samudayo iti
Vedanāya atthaṅgamo iti saññā iti saññāya samudayo iti
saññāya atthaṅgamo iti saṅkhārā iti saṅkhārānaṁ samudayo iti
saṅkhārānaṁ atthaṅgamo iti viññāṇaṁ iti viññāṇassa samudayo
iti viññāṇassa atthaṅgamo iti imasmiṁ sati idaṁ hoti
imassuppādā idaṁ uppajjati imasmiṁ asati idaṁ na hoti imassa
nirodhā idaṁ nirujjhati yadidaṁ avijjāpaccayā saṅkhārā saṅkhārapaccayā
viññāṇaṁ .pe. Evametassa kevalassa dukkhakkhandhassa
samudayo hoti. Avijjāya tveva asesavirāganirodhā saṅkhāranirodho
saṅkhāranirodhā viññāṇanirodho .pe. Evametassa kevalassa
dukkhakkhandhassa nirodho hoti.

[66] Evaṁ svākkhāto bhikkhave mayā dhammo uttāno vivaṭo
pakāsito chinnapilotiko. Evaṁ svākkhāte kho bhikkhave mayā
dhamme uttāne vivaṭe pakāsite chinnapilotike alameva
saddhāpabbajitena kulaputtena viriyaṁ ārabhituṁ kāmaṁ taco ca nahāru ca
aṭṭhi ca avasissatu sarīre upasussatu maṁsalohitaṁ yantaṁ purisathāmena
purisaviriyena purisaparakkamena pattabbaṁ na taṁ apāpuṇitvā purisassa 1
viriyassa saṇṭhānaṁ bhavissatīti. Dukkhaṁ bhikkhave kusīto viharati vokiṇṇo
pāpakehi akusalehi dhammehi mahantañca sadatthaṁ parihāpeti.
Āraddhaviriyo ca kho bhikkhave sukhaṁ viharati pavivitto pāpakehi
akusalehi dhammehi mahantañca sadatthaṁ paripūreti. Na bhikkhave
1 Ma. Yu. ayaṁ pāṭho natthi.
Hīnena aggassa patti hoti aggena ca kho [1]- aggassa patti
hoti. Maṇḍapeyyamidaṁ bhikkhave brahmacariyaṁ satthā sammukhībhūto.

[67] Tasmātiha bhikkhave viriyaṁ ārabhatha appattassa pattiyā
anadhigatassa adhigamāya asacchikatassa sacchikiriyāya evaṁ no ayaṁ
amhākaṁ pabbajjā avaṁkatā 2 avañjhā bhavissati saphalā saudrayā
yesaṁ 3 mayaṁ paribhuñjāma cīvarapiṇḍapātasenāsanagilānapaccayabhesajjaparikkhāraṁ
tesaṁ te kārā amhesu mahapphalā bhavissanti mahānisaṁsāti
evaṁ hi vo bhikkhave sikkhitabbaṁ. Attatthaṁ vā hi bhikkhave
sampassamānena alameva appamādena sampādetuṁ. Paratthaṁ vā hi bhikkhave
sampassamānena alameva appamādena sampādetuṁ. Ubhayatthaṁ vā hi
bhikkhave sampassamānena alameva appamādena sampādetunti. Dutiyaṁ.

[68] Sāvatthiyaṁ viharati ... Jānatohaṁ bhikkhave passato āsavānaṁ
khayaṁ vadāmi no ajānato no apassato. Kiñca bhikkhave
jānato kiṁ passato āsavānaṁ khayo hoti. Iti rūpaṁ iti rūpassa
samudayo iti rūpassa atthaṅgamo .pe. Iti vedanā .pe.
Iti saññā .pe. Iti saṅkhārā .pe. Iti viññāṇaṁ iti
viññāṇassa samudayo iti viññāṇassa atthaṅgamoti. Evaṁ kho
bhikkhave jānato evaṁ passato āsavānaṁ khayo hoti.