[49] Evaṁ vutte acelo kassapo bhagavantaṁ etadavoca na
kho pana mayaṁ bhavantaṁ gotamaṁ bahudeva pucchitukāmāti. Puccha
kassapa yadākaṅkhasīti. Kiṁ nu kho bho gotama sayaṁkataṁ dukkhanti.
Mā hevaṁ kassapāti bhagavā avoca. Kiṁ pana bho gotama parakataṁ
dukkhanti. Mā hevaṁ kassapāti bhagavā avoca. Kiṁ nu kho
bho gotama sayaṁkatañca parakatañca dukkhanti. Mā hevaṁ kassapāti
bhagavā avoca. Kiṁ pana bho gotama asayaṁkāraṁ aparakāraṁ adhicca
samuppannaṁ dukkhanti. Mā hevaṁ kassapāti bhagavā avoca. Kiṁ
1 Yu. kiñcideva. evamuparipi.
Nu kho bho gotama natthi dukkhanti. Na kho kassapa natthi dukkhaṁ
atthi kho kassapa dukkhanti. Tenahi bhavaṁ gotamo dukkhaṁ na
jānāti na passatīti. Na khvāhaṁ kassapa dukkhaṁ na jānāmi na
passāmi jānāmi khvāhaṁ kassapa dukkhaṁ passāmi khvāhaṁ kassapa
dukkhanti. Kiṁ nu kho bho gotama sayaṁkataṁ dukkhanti iti puṭṭho samāno
mā hevaṁ kassapāti vadesi kiṁ pana bho gotama parakataṁ dukkhanti
iti puṭṭho samāno mā hevaṁ kassapāti vadesi kiṁ nu kho bho
gotama sayaṁkatañca parakatañca dukkhanti iti puṭṭho samāno mā
hevaṁ kassapāti vadesi kiṁ pana bho gotama asayaṁkāraṁ aparakāraṁ
adhicca samuppannaṁ dukkhanti iti puṭṭho samāno mā hevaṁ
kassapāti vadesi kiṁ nu kho bho gotama natthi dukkhanti iti puṭṭho
samāno na kho kassapa natthi dukkhaṁ atthi kho kassapa dukkhanti
vadesi tenahi bhavaṁ gotamo dukkhaṁ na jānāti na passatīti iti
puṭṭho samāno na khvāhaṁ kassapa dukkhaṁ na jānāmi na passāmi
jānāmi khvāhaṁ kassapa dukkhaṁ passāmi khvāhaṁ kassapa dukkhanti
vadesi ācikkhatu ca me bhante bhagavā dukkhaṁ desetu ca me
bhante bhagavā dukkhanti.

[50] So karoti so paṭisaṁvedayatīti kho kassapa ādito sato
sayaṁkataṁ dukkhanti iti vadaṁ sassataṁ etaṁ pareti. Añño karoti
añño paṭisaṁvedayatīti kho kassapa vedanābhitunnassa sato parakataṁ
Dukkhanti iti vadaṁ ucchedaṁ etaṁ pareti. Ete te kassapa ubho
ante anupagamma majjhena tathāgato dhammaṁ deseti avijjāpaccayā
saṅkhārā saṅkhārapaccayā viññāṇaṁ .pe. Evametassa kevalassa
dukkhakkhandhassa samudayo hoti. Avijjāya tveva asesavirāganirodhā
saṅkhāranirodho saṅkhāranirodhā viññāṇanirodho .pe. Evametassa
kevalassa dukkhakkhandhassa nirodho hotīti.

[51] Evaṁ vutte acelo kassapo bhagavantaṁ etadavoca
abhikkantaṁ bhante abhikkantaṁ bhante seyyathāpi bhante nikkujjitaṁ
vā ukkujjeyya .pe. Cakkhumanto rūpāni dakkhantīti 1 evameva
bhagavatā anekapariyāyena dhammo pakāsito esāhaṁ bhante bhagavantaṁ
saraṇaṁ gacchāmi dhammañca bhikkhusaṅghañca labheyyāhaṁ bhante bhagavato
santike pabbajjaṁ labheyyaṁ upasampadanti. Yo kho kassapa
aññatitthiyapubbo imasmiṁ dhammavinaye ākaṅkhati pabbajjaṁ ākaṅkhati
upasampadaṁ so cattāro māse parivasati catunnaṁ māsānaṁ accayena
parivutthaparivāsaṁ 2 āraddhacittā bhikkhū ākaṅkhamānā 3 pabbājenti
upasampādenti bhikkhubhāvāya apica mayā puggalavemattatā vinītāti 4 .
Sace bhante aññatitthiyapubbā imasmiṁ dhammavinaye ākaṅkhantā
pabbajjaṁ ākaṅkhantā upasampadaṁ cattāro māse parivasanti catunnaṁ
māsānaṁ accayena parivutthaparivāse āraddhacittā bhikkhū ākaṅkhamānā
pabbājenti upasampādenti bhikkhubhāvāya ahaṁ cattāri vassāni
1 Yu. dakkhintīti. evamuparipi. 2-3 Ma. idaṁ pāṭhadvayaṁ natthi. evamuparipi.
4 Ma. Yu. viditāti.
Parivasissāmi catunnaṁ vassānaṁ accayena parivutthaparivāsaṁ āraddhacittā
bhikkhū pabbājentu upasampādentu bhikkhubhāvāyāti.

[52] Alattha kho acelo kassapo bhagavato santike pabbajjaṁ
alattha upasampadaṁ. Acirūpasampanno ca panāyasmā kassapo
eko vūpakaṭṭho appamatto ātāpī pahitatto viharanto nacirasseva
yassatthāya kulaputtā sammadeva agārasmā anagāriyaṁ pabbajanti
tadanuttaraṁ brahmacariyapariyosānaṁ diṭṭheva dhamme sayaṁ abhiññā
sacchikatvā upasampajja vihāsi khīṇā jāti vusitaṁ brahmacariyaṁ kataṁ
karaṇīyaṁ nāparaṁ itthattāyāti abbhaññāsi. Aññataro ca
panāyasmā kassapo arahaṁ ahosīti. Sattamaṁ.

[53] Sāvatthiyaṁ viharati ... Atha kho timbarukkho 1 paribbājako
yena bhagavā tenupasaṅkami upasaṅkamitvā bhagavatā saddhiṁ sammodi
sammodanīyaṁ kathaṁ sārāṇīyaṁ vītisāretvā ekamantaṁ nisīdi.

[54] Ekamantaṁ nisinno kho timbarukkho paribbājako bhagavantaṁ
etadavoca kiṁ nu kho bho gotama sayaṁkataṁ sukhadukkhanti. Mā
hevaṁ timbarukkhāti bhagavā avoca. Kiṁ pana bho gotama parakataṁ
sukhadukkhanti. Mā hevaṁ timbarukkhāti bhagavā avoca. Kiṁ nu kho
bho gotama sayaṁkatañca parakatañca sukhadukkhanti. Mā hevaṁ
timbarukkhāti bhagavā avoca. Kiṁ pana bho gotama asayaṁkāraṁ aparakāraṁ
adhicca samuppannaṁ sukhadukkhanti. Mā hevaṁ timbarukkhāti bhagavā
1 Ma. Yu. timbaruko. evamuparipi.
Avoca. Kiṁ nu kho bho gotama natthi sukhadukkhanti. Na kho
timbarukkha natthi sukhadukkhaṁ atthi kho timbarukkha sukhadukkhanti.
Tenahi bhavaṁ gotamo sukhadukkhaṁ na jānāti na passatīti. Na khvāhaṁ
timbarukkha sukhadukkhaṁ na jānāmi na passāmi jānāmi khvāhaṁ timbarukkha
sukhadukkhaṁ passāmi khvāhaṁ timbarukkha sukhadukkhanti. Kiṁ nu kho bho
gotama sayaṁkataṁ sukhadukkhanti iti puṭṭho samāno mā hevaṁ
timbarukkhāti vadesi kiṁ pana bho gotama parakataṁ sukhadukkhanti iti
puṭṭho samāno mā hevaṁ timbarukkhāti vadesi kiṁ nu kho bho
gotama sayaṁkatañca parakatañca sukhadukkhanti iti puṭṭho samāno
mā hevaṁ timbarukkhāti vadesi kiṁ pana bho gotama asayaṁkāraṁ
aparakāraṁ adhicca samuppannaṁ sukhadukkhanti iti puṭṭho samāno mā
hevaṁ timbarukkhāti vadesi kiṁ nu kho bho gotama natthi sukhadukkhanti
iti puṭṭho samāno na kho timbarukkha natthi sukhadukkhaṁ atthi kho
timbarukkha sukhadukkhanti vadesi tenahi bhavaṁ gotamo sukhadukkhaṁ
na jānāti na passatīti iti puṭṭho samāno na khvāhaṁ timbarukkha
sukhadukkhaṁ na jānāmi na passāmi jānāmi khvāhaṁ timbarukkha sukhadukkhaṁ
passāmi khvāhaṁ timbarukkha sukhadukkhanti vadesi ācikkhatu ca me bhavaṁ
gotamo sukhadukkhaṁ desetu ca me bhavaṁ gotamo sukhadukkhanti.

[55] Sā vedanā so vedayatīti kho timbarukkha ādito sato
sayaṁkataṁ sukhadukkhanti evañcāhaṁ 1 na vadāmi. Aññā vedanā añño
1 Ma. Yu. evampāhaṁ. evamuparipi.
Vedayatīti kho timbarukkha vedanābhitunnassa sato parakataṁ sukhadukkhanti
evañcāhaṁ na vadāmi. Ete te timbarukkha ubho ante anupagamma
majjhena tathāgato dhammaṁ deseti avijjāpaccayā saṅkhārā saṅkhārapaccayā
viññāṇaṁ .pe. Evametassa kevalassa dukkhakkhandhassa
samudayo hoti. Avijjāya tveva asesavirāganirodhā saṅkhāranirodho
saṅkhāranirodhā viññāṇanirodho .pe. Evametassa kevalassa
dukkhakkhandhassa nirodho hotīti.

[56] Evaṁ vutte timbarukkho paribbājako bhagavantaṁ etadavoca
abhikkantaṁ bho gotama abhikkantaṁ bho gotama .pe. Esāhaṁ
bhante bhavantaṁ gotamaṁ saraṇaṁ gacchāmi dhammañca bhikkhusaṅghañca
upāsakaṁ maṁ bhavaṁ gotamo dhāretu ajjatagge pāṇupetaṁ
saraṇaṅgatanti. Aṭṭhamaṁ.

[57] Sāvatthiyaṁ viharati ... Avijjānīvaraṇassa bhikkhave bālassa
taṇhāya saṁyuttassa 1 evamayaṁ kāyo samudāgato iti ayañceva
kāyo bahiddhā ca nāmarūpaṁ itthetaṁ dvayaṁ dvayaṁ paṭicca phasso
saḷevāyatanāni yehi phuṭṭho bālo sukhadukkhaṁ paṭisaṁvedayati etesaṁ
vā aññatarena. Avijjānīvaraṇassa bhikkhave paṇḍitassa taṇhāya
saṁyuttassa evamayaṁ kāyo samudāgato iti ayañceva kāyo bahiddhā
ca nāmarūpaṁ itthetaṁ dvayaṁ dvayaṁ paṭicca phasso saḷevāyatanāni yehi
phuṭṭho paṇḍito sukhadukkhaṁ paṭisaṁvedayati etesaṁ vā aññatarena.
1 Ma. Yu. sampayuttassa. evamuparipi.

[58] Tatra bhikkhave ko viseso ko adhippāyaso 1 kinnānākaraṇaṁ
paṇḍitassa bālenāti. Bhagavaṁmūlakā no bhante dhammā bhagavaṁnettikā
bhagavaṁpaṭisaraṇā sādhu vata me bhante bhagavantaṁyeva paṭibhātu
etassa bhāsitassa attho bhagavato sutvā bhikkhū dhāressantīti.
Tenahi bhikkhave suṇātha sādhukaṁ manasikarotha bhāsissāmīti. Evaṁ
bhanteti kho te bhikkhū bhagavato paccassosuṁ.