[817] Mataṁ vā amma rodanti yo vā jīvaṁ na dissati
jīvantaṁ amma passantī kasmā maṁ amma rodasīti.

[818] Mataṁ vā putta rodanti yo vā jīvaṁ na dissati
yo ca kāme cajitvāna 3 punarāgacchate 4 idha
taṁ vāpi putta rodanti puna jīvaṁ mato hi so
kukkulā ubbhato tāta kukkulaṁ patitumicchasi
narakā ubhato tāta narakaṁ patitumicchasi
1 Yu. iti me. 2 Ma. Yu. sace ca. 3 Yu. vajitvāna. 4 Po. punarāvattate.
Abhidhāvatha bhaddante kassa ujjhāpayāmase
ādittā nibbhataṁ bhaṇḍaṁ puna ḍayhitumicchasīti.
Chaṭṭhaṁ piyaṅkarasuttaṁ

[819] Ekaṁ samayaṁ āyasmā anuruddho sāvatthiyaṁ viharati jetavane
anāthapiṇḍikassa ārāme. Tena kho pana samayena āyasmā anuruddho
rattiyā paccūsasamayaṁ paccuṭṭhāya dhammapadāni bhāsati.

[820] Atha kho piyaṅkaramātā yakkhinī puttakaṁ evaṁ tosesi
mā saddamakarī piyaṅkara
bhikkhu dhammapadāni bhāsati
apica dhammapadaṁ vijāniya
paṭipajjema hitāya no siyāti.

[821] Pāṇesu ca saññamāmase
sampajānamusā na bhaṇāmase
sikkhema susīlyamattano
api muccema pisācayoniyāti.
Sattamaṁ punabbasusuttaṁ

[822] Ekaṁ samayaṁ bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhagavā bhikkhū
nibbānapaṭisaṁyuttāya dhammiyā kathāya sandasseti samādapeti
samuttejeti sampahaṁseti. Te ca bhikkhū aṭṭhikatvā manasikatvā
Sabbacetaso samannāharitvā ohitasotā dhammaṁ suṇanti.

[823] Atha kho punabbasumātā yakkhinī puttakaṁ 1 evaṁ tosesi
tuṇhī uttarike hohi tuṇhī hohi punabbasu
yāvāhaṁ buddhaseṭṭhassa dhammaṁ sossāmi satthuno
nibbānaṁ bhagavā āha sabbaganthappamocanaṁ
ativelā ca me hoti asmiṁ dhamme piyāyanā
piyo loke sako putto piyo loke sako pati
tato piyataraṁ 2 mayhaṁ assa dhammassa magganā
na hi putto pati vāpi piyo dukkhā pamocaye
yathā saddhammassavanaṁ dukkhā moceti pāṇinaṁ
loke dukkhaparetasmiṁ jarāmaraṇasaṁyute
jarāmaraṇamokkhāya yaṁ dhammaṁ abhisambudhaṁ
taṁ dhammaṁ sotumicchāmi tuṇhī hohi punabbasūti.

[824] Amma 3 na byāharissāmi tuṇhībhūtāyamuttarā
dhammameva nisāmehi saddhammassavanaṁ sukhaṁ
saddhammassa anaññāya amma 4 dukkhaṁ carāmase
esa devamanussānaṁ sammūḷhānaṁ pabhaṅkaro
buddho antimasārīro dhammaṁ deseti cakkhumāti.

[825] Sādhu kho paṇḍito nāma putto jāto ure sayo 5
putto me buddhaseṭṭhassa dhammasuddhaṁ piyāyati
1 Po. Ma. Yu. puttake. 2 Ma. Yu. piyatarā. 3-4 Ma. ammā. 5 Yu. seyyo.
Punabbasu sukhī hohi ajjāhamhi samuggatā
diṭṭhāni ariyasaccāni uttarāpi suṇātu meti.
Aṭṭhamaṁ sudattasuttaṁ

[826] Ekaṁ samayaṁ bhagavā rājagahe viharati sītavane. Tena
kho pana samayena anāthapiṇḍiko gahapati rājagahaṁ anuppatto hoti
kenacideva karaṇīyena. Assosi kho anāthapiṇḍiko gahapati buddho
kira loke uppannoti tāvadeva ca pana bhagavantaṁ dassanāya
upasaṅkamitukāmo hoti 1 . Atha 2 kho anāthapiṇḍikassa gahapatissa
etadahosi akālo kho ajja bhagavantaṁ dassanāya upasaṅkamituṁ
svedānāhaṁ kālena bhagavantaṁ dassanāya upasaṅkamissāmīti. Buddhagatāya
satiyā nipajji rattiyā sudaṁ tikkhattuṁ vuṭṭhāsi pabhātanti
maññamāno. Atha kho anāthapiṇḍiko gahapati yena sīvathikadvāraṁ
tenupasaṅkami. Amanussā dvāraṁ vivariṁsu.