[807] Ekaṁ samayaṁ bhagavā gayāyaṁ viharati ṭaṅkitamañce
sūcilomassa yakkhassa bhavane. Tena kho pana samayena kharo ca yakkho
sūcilomo ca yakkho bhagavato avidūre atikkamanti. Atha kho
kharo yakkho sūcilomaṁ yakkhaṁ etadavoca eso samaṇoti. Neso
samaṇo samaṇako eso yāva jānāmi yadi vā so samaṇo
yadi vā 3 samaṇakoti.

[808] Atha kho sūcilomo yakkho yena bhagavā tenupasaṅkami
upasaṅkamitvā bhagavato kāyaṁ upanāmesi. Atha kho bhagavā kāyaṁ
apanāmesi. Atha kho sūcilomo yakkho bhagavantaṁ etadavoca bhāyasi
maṁ samaṇāti. Na khvāhantaṁ āvuso bhāyāmi apica te samphasso
pāpakoti. Pañhaṁ taṁ samaṇa pucchissāmi sace me samaṇa na
byākarissasi cittaṁ vā te khipissāmi hadayaṁ vā te phālessāmi
1 Po. Ma. yadaññamanusāsasīti. 2 Yu. sānukampā. 3 Ma. Yu. yadi vā pana so.
Pādesu vā gahetvā pāragaṅgāya khipissāmīti. Na khvāhantaṁ
āvuso passāmi sadevake loke samārake sabrahmake sassamaṇabrāhmaṇiyā
pajāya sadevamanussāya yo me cittaṁ vā khipeyya
hadayaṁ vā phāleyya pādesu vā gahetvā pāragaṅgāya tīre khipeyya
apica tvaṁ āvuso puccha yadākaṅkhasīti.

[809] Rāgo ca doso ca kutonidānā
aratī rati lomahaṁso kutojā
kuto samuṭṭhāya manovitakkā
kumārakā dhaṅkamivossajantīti.

[810] Rāgo ca doso ca itonidānā
aratī rati lomahaṁso itojā
ito samuṭṭhāya manovitakkā
kumārakā dhaṅkamivossajanti
snehajā attasambhūtā nigrodhasseva khandhajā
puthū visattā kāmesu māluvā vitthatā vane
ye naṁ pajānanti yatonidānaṁ 1
te naṁ vinodenti suṇohi yakkha
te duttaraṁ oghamimaṁ taranti
atiṇṇapubbaṁ apunabbhavāyāti.
1 Sī. yatonidānā.
Catutthaṁ maṇibhaddasuttaṁ

[811] Ekaṁ samayaṁ bhagavā magadhesu viharati maṇimāḷake cetiye
maṇibhaddassa yakkhassa bhavane.

[812] Atha kho maṇibhaddo yakkho yena bhagavā tenupasaṅkami
upasaṅkamitvā bhagavato santike imaṁ gāthaṁ abhāsi
satimato sadā bhaddaṁ satimā sukhamedhati
satimato suve seyyo verā ca parimuccatīti 1 .
Satimato sadā bhaddaṁ satimā sukhamedhati
satimato suve seyyo verā na parimuccatīti.

[813] Yassa sabbamahorattiṁ 2 ahiṁsāya rato mano
mettaṁso 3 sabbabhūtesu verantassa na kenacīti.
Pañcamaṁ sānusuttaṁ

[814] Ekaṁ samayaṁ bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena aññatarissā
upāsikāya sānu nāma putto yakkhena gahito hoti.

[815] Atha kho sā upāsikā paridevamānā tāyaṁ velāyaṁ
imā gāthāyo abhāsi
1 Ma. ayaṁ gāthā na dissati. 2 Ma. Yu. sabbamahorattaṁ. 3 mettaṁ sotipi
pāṭhena bhavitabbaṁ.
Cātuddasiṁ pañcadasiṁ yā ca pakkhassa aṭṭhamī
pārihārikapakkhañca aṭṭhaṅgasusamāgataṁ
uposathaṁ upavasanti brahmacariyaṁ caranti ye
na tehi yakkhā kīḷanti iti me arahataṁ sutaṁ
sādāni ajja passāmi yakkhā kīḷanti sānunāti.

[816] Cātuddasiṁ pañcadasiṁ yā ca pakkhassa aṭṭhamī
pārihārikapakkhañca aṭṭhaṅgasusamāgataṁ
uposathaṁ upavasanti brahmacariyaṁ caranti ye
na tehi yakkhā kīḷanti sāhu 1 te arahataṁ sutaṁ
sānuṁ pabuddhaṁ vajjāsi yakkhānaṁ vacanaṁ idaṁ
mākāsi pāpakaṁ kammaṁ āvi vā yadi vā raho
saceva 2 pāpakaṁ kammaṁ karissasi karosi vā
na te dukkhā pamutyatthi uppaccāpi palāyatoti.