[797] Na harāmi na bhañjāmi ārā siṅghāmi vārijaṁ
atha kena nu vaṇṇena gandhatthenoti vuccati
yvāyaṁ bhiṁsāni khanati puṇḍarīkāni bhañjati
evaṁ ākiṇṇakammanto kasmā eso na vuccatīti.

[798] Ākiṇṇaluddho puriso ativelaṁva 1 makkhito
tasmiṁ me vacanaṁ natthi tañca arahāmi vattave
anaṅgaṇassa posassa niccaṁ sucigavesino
vālaggamattaṁ pāpassa abbhāmattaṁva khāyatīti.

[799] Addhā maṁ yakkha jānāsi atho maṁ anukampasi
punapi yakkha vajjāsi yadā passasi edisanti.

[800] Neva taṁ upajīvāmi napi te bhaddakamhase 2
tvameva bhikkhu jāneyya yena gaccheyya sugatinti.
Atha kho so bhikkhu tāya devatāya saṁvejito saṁvegamāpādīti.
Vanasaṁyuttaṁ samattaṁ.
1 Ma. Yu. dhāticelaṁva. 2 Ma. bhatakāmahase. Yu. katakammase.
Tassuddānaṁ
vivekaṁ upaṭṭhānañca kassapagottena sambahulā
ānando anuruddhañca nāgadattañca kulagharaṇī
vajjīputto ca vesālī sajjhāyena ayoniso
majjhantakālamhi pākatindriyā padumapupphena cuddasa bhaveti.
--------
Yakkhasaṁyuttaṁ
---------
paṭhamaṁ indakasuttaṁ

[801] Evamme sutaṁ ekaṁ samayaṁ bhagavā rājagahe viharati
indakūṭe pabbate indakassa yakkhassa bhavane.

[802] Atha kho indako yakkho yena bhagavā tenupasaṅkami
upasaṅkamitvā bhagavantaṁ gāthāya ajjhabhāsi
rūpaṁ na jīvanti vadanti buddhā
kathaṁ nvayaṁ vindatimaṁ sarīraṁ
kutassa aṭṭhīyakapiṇḍameti
kathaṁ nvayaṁ sajjati gabbhasminti.

[803] Paṭhamaṁ kalalaṁ hoti kalalā hoti abbudaṁ
abbudā jāyate pesi pesi nibbattatī ghano
ghanā pasākhā jāyanti kesā lomā nakhāpi ca
yañcassa bhuñjati mātā annaṁ pānañca bhojanaṁ
tena so tattha yāpeti mātukucchiggato naroti.
Dutiyaṁ sakkasuttaṁ

[804] Ekaṁ samayaṁ bhagavā rājagahe viharati gijjhakūṭe pabbate.

[805] Atha kho sakkanāmako yakkho yena bhagavā tenupasaṅkami
Upasaṅkamitvā bhagavantaṁ gāthāya ajjhabhāsi
sabbaganthappahīnassa vippamuttassa te sato
samaṇassa na taṁ sādhu yadaññamanusāsatīti 1 .

[806] Yena kenaci vaṇṇena saṁvāso sakka jāyati
na taṁ arahati sappañño manasā anukampituṁ
manasā ce pasannena yadaññamanusāsati
na tena hoti saṁyutto yānukampā 2 anuddayāti.
Tatiyaṁ sūcilomasuttaṁ