[777] Na tvaṁ bāle vijānāsi yathā arahataṁ vaco
aniccā sabbe saṅkhārā uppādavayadhammino
uppajjitvā nirujjhanti tesaṁ vūpasamo sukho
natthidāni punāvāso devakāyasmi jālinī
vikkhīṇo jātisaṁsāro natthidāni punabbhavoti.
Sattamaṁ nāgadattasuttaṁ

[778] Ekaṁ samayaṁ āyasmā nāgadatto kosalesu viharati
aññatarasmiṁ vanasaṇḍe. Tena kho pana samayena āyasmā
nāgadatto atikālena gāmaṁ pavisati atidivā paṭikkamati.

[779] Atha kho yā tasmiṁ vanasaṇḍe adhivatthā devatā
āyasmato nāgadattassa anukampikā atthakāmā āyasmantaṁ
nāgadattaṁ saṁvejetukāmā yenāyasmā nāgadatto tenupasaṅkami
upasaṅkamitvā āyasmantaṁ nāgadattaṁ gāthāhi ajjhabhāsi
kāle pavissa nāgadatta divā ca āgantvā ativelacārī
saṁsaṭṭho gahaṭṭhehi samānasukhadukkho
bhāyāmi nāgadattaṁ supagabbhaṁ kulesu vinibaddhaṁ
māheva maccurañño balavato antakassa vasamesīti 1 .
Atha kho āyasmā nāgadatto tāya devatāya saṁvejito saṁvegamāpādīti.
1 Ma. vasaṁ upesi. Yu. vasameyyāti.
Aṭṭhamaṁ kulagharaṇīsuttaṁ

[780] Ekaṁ samayaṁ aññataro bhikkhu kosalesu viharati aññatarasmiṁ
vanasaṇḍe. Tena kho pana samayena so bhikkhu aññatarasmiṁ
kule ativelaṁ ajjhogāḷhappatto viharati.

[781] Atha kho yā tasmiṁ vanasaṇḍe adhivatthā devatā tassa
bhikkhuno anukampikā atthakāmā taṁ bhikkhuṁ saṁvejetukāmā yā tasmiṁ
kule kulagharaṇī tassā vaṇṇaṁ abhinimminitvā yena so bhikkhu
tenupasaṅkami upasaṅkamitvā taṁ bhikkhuṁ gāthāya ajjhabhāsi
nadītīresu saṇṭhāne sabhāsu rathiyāsu ca
janā saṅgamma mantenti mañca tañca kimantaranti.

[782] Bahū hi saddā paccūhā khamitabbā tapassinā
na tena maṅkuhotabbaṁ na hi tena kilissati
yo ca saddapparittāsī vane vātamigo yathā
lahucittoti taṁ āhu nāssa sampajjate vatanti.
Navamaṁ vajjīputtasuttaṁ

[783] Ekaṁ samayaṁ aññataro vajjīputtako bhikkhu vesāliyaṁ
viharati aññatarasmiṁ vanasaṇḍe. Tena kho pana samayena [1]-
vesāliyaṁ sabbarattivāro 2 hoti.

[784] Atha kho so bhikkhu vesāliyaṁ turiya tāḷita vāditanigghosasaddaṁ
1 Ma. etthantare vajjiputtakoti atthi. 2 Ma. Yu. A. sabbaratticāro.
Sutvā paridevamāno tāyaṁ velāyaṁ imaṁ gāthaṁ abhāsi
ekakā mayaṁ araññe viharāma
apaviṭṭhaṁva 1 vanasmiṁ dārukaṁ
etādisikāya rattiyā
ko su nāmamhehi pāpiyoti.

[785] Atha kho yā tasmiṁ vanasaṇḍe adhivatthā devatā tassa
bhikkhuno anukampikā atthakāmā taṁ bhikkhuṁ saṁvejetukāmā yena so
bhikkhu tenupasaṅkami upasaṅkamitvā taṁ bhikkhuṁ gāthāya ajjhabhāsi
ekakova tvaṁ araññe viharasi
apaviṭṭhaṁva vanasmiṁ dārukaṁ
tassa te bahukā pihayanti
nerayikā viya saggagāminanti.
Atha kho so bhikkhu tāya devatāya saṁvejito saṁvegamāpādīti.
Dasamaṁ sajjhāyasuttaṁ

[786] Ekaṁ samayaṁ aññataro bhikkhu kosalesu viharati aññatarasmiṁ
vanasaṇḍe. Tena kho pana samayena so bhikkhu yaṁ sudaṁ
pubbe ativelaṁ sajjhāyabahulo viharati. So aparena samayena
appossukko tuṇhībhūto sakamāyati 2 .