[757] Ekaṁ samayaṁ bhagavā campāyaṁ viharati gaggarāya pokkharaṇiyā
tīre mahatā bhikkhusaṅghena saddhiṁ pañcamattehi bhikkhusatehi sattahi
ca upāsakasatehi anekehi ca devatāsahassehi. Tyāssudaṁ bhagavā
atirocati vaṇṇena ceva yasasā ca.

[758] Atha kho āyasmato vaṅgīsassa etadahosi ayaṁ kho
bhagavā campāyaṁ viharati gaggarāya pokkharaṇiyā tīre mahatā bhikkhusaṅghena
saddhiṁ pañcamattehi bhikkhusatehi sattahi ca upāsakasatehi [2]-
anekehi ca devatāsahassehi tyāssudaṁ bhagavā atirocati vaṇṇena
ceva yasasā ca yannūnāhaṁ bhagavantaṁ sammukhā sarūpāya gāthāya
abhitthaveyyanti. Atha kho āyasmā vaṅgīso uṭṭhāyāsanā ekaṁsaṁ
uttarāsaṅgaṁ karitvā yena bhagavā tenañjalimpaṇāmetvā bhagavantaṁ
etadavoca paṭibhāti maṁ bhagavā paṭibhāti maṁ sugatāti. Paṭibhātu
taṁ vaṅgīsāti bhagavā avoca.

[759] Atha kho āyasmā vaṅgīso bhagavantaṁ sammukhā sarūpāya
gāthāya abhitthavi
1 Ma. Yu. anupariyeti. 2 Ma. Yu. etthantare sattahi ca upāsikāsatehi.
Cando yathā vītavalāhake nabhe
virocati vītamalova bhāṇumā
evampi aṅgīrasa tvaṁ mahāmuni
atirocasi yasasā sabbalokanti.
Dvādasamaṁ vaṅgīsasuttaṁ

[760] Ekaṁ samayaṁ āyasmā vaṅgīso sāvatthiyaṁ viharati jetavane
anāthapiṇḍikassa ārāme. Tena kho pana samayena āyasmā
vaṅgīso acirārahattappatto hoti 1 vimuttisukhaṁ paṭisaṁvedī tāyaṁ
velāyaṁ imā gāthāyo abhāsi
kāveyyamattā vicarimha pubbe gāmā gāmaṁ purā puraṁ
athaddasāma sambuddhaṁ saddhā no upapajjatha
so me dhammamadesesi khandhe āyatanāni dhātuyo
tassāhaṁ dhammaṁ sutvāna pabbajiṁ anagāriyaṁ
bahunnaṁ vata atthāya bodhimajjhagamā muni
bhikkhūnaṁ bhikkhunīnañca ye niyāmagataddasā
svāgataṁ vata me āsi mama buddhassa santike
tisso vijjā anuppattā kataṁ buddhassa sāsanaṁ
pubbenivāsaṁ jānāmi dibbacakkhuṁ visodhitaṁ
tevijjo iddhipattomhi cetopariyāyakovidoti.
Vaṅgīsasaṁyuttaṁ samattaṁ.
1 Ma. Yu. hutvā.
Tassuddānaṁ
nikkhantārati ceva pesalāatimaññanā
ānandena subhāsitā sārīputtapavāraṇā
parosahassaṁ koṇḍañño moggallānena gaggarā
vaṅgīsena dvādasāti.
---------------
Vanasaṁyuttaṁ
------
paṭhamaṁ vivekasuttaṁ

[761] Evamme sutaṁ ekaṁ samayaṁ aññataro bhikkhu kosalesu
viharati aññatarasmiṁ vanasaṇḍe. Tena kho pana samayena so bhikkhu
divāvihāragato pāpake akusale vitakke vitakketi gehanissite.

[762] Atha kho yā tasmiṁ vanasaṇḍe adhivatthā devatā tassa
bhikkhuno anukampikā atthakāmā taṁ bhikkhuṁ saṁvejetukāmā yena so
bhikkhu tenupasaṅkami upasaṅkamitvā taṁ bhikkhuṁ gāthāhi ajjhabhāsi
vivekakāmosi vanaṁ paviṭṭho
atha te mano niccharati bahiddhā
tvaṁ 1 jano janasmiṁ vinayassu chandaṁ
tato sukhī hohisi vītarāgo
aratiṁ pajahāsi sato
bhavāsi sataṁ taṁ sārayāmase
pātālarajo hi duttaro
mā taṁ kāmarajo avāhari
sakuṇo yathā paṁsukuṇḍito 2
vidhunaṁ pātayati sitaṁ rajaṁ
1 Ma. Yu. ayaṁ pāṭho natthi. 2 Po. Yu. kuṇṭhito. Ma. kuntito.
Evaṁ bhikkhu padhānavā satimā
pātayati sitaṁ rajanti.
Atha kho so bhikkhu tāya devatāya saṁvejito saṁvegamāpādīti.
Dutiyaṁ upaṭṭhānasuttaṁ

[763] Ekaṁ samayaṁ aññataro bhikkhu kosalesu viharati aññatarasmiṁ
vanasaṇḍe. Tena kho pana samayena so bhikkhu divāvihāragato
supati.

[764] Atha kho yā tasmiṁ vanasaṇḍe adhivatthā devatā tassa
bhikkhuno anukampikā atthakāmā taṁ bhikkhuṁ saṁvejetukāmā yena so
bhikkhu tenupasaṅkami upasaṅkamitvā taṁ bhikkhuṁ gāthāhi ajjhabhāsi
uṭṭhehi bhikkhu kiṁ sopi 1 ko attho supitena te
āturassa hi te 2 niddā sallaviddhassa ruppato
yāya saddhāpabbajito 3 agārasmānagāriyaṁ
tameva saddhaṁ brūhehi mā niddāya vasaṁ gamīti.

[765] Aniccā addhuvā kāmā yesu mandova mucchito
baddhesu muttaṁ asitaṁ kasmā pabbajitaṁ tape
chandarāgassa vinayā avijjāsamatikkamā
taṁ ñāṇaṁ paramodātaṁ 4 kasmā pabbajitaṁ tape
1 Ma. Yu. sesi. 2 Ma. Yu. kā. 3 Ma. Yu. saddhāya pabbajito. 4 Ma. parimodānaṁ.
Yu. pariyodātaṁ.
Bhetvā 1 avijjaṁ vijjāya āsavānaṁ parikkhayā
asokaṁ anupāyāsaṁ kasmā pabbajitaṁ tape
āraddhaviriyaṁ pahitattaṁ niccaṁ daḷhaparakkamaṁ
nibbānaṁ abhikaṅkhantaṁ kasmā pabbajitaṁ tapeti.
Tatiyaṁ kassapagottasuttaṁ

[766] Ekaṁ samayaṁ āyasmā kassapagotto kosalesu viharati
aññatarasmiṁ vanasaṇḍe. Tena kho pana samayena āyasmā
kassapagotto divāvihāragato aññataraṁ chetaṁ ovadati.