[747] Ekaṁ samayaṁ bhagavā sāvatthiyaṁ viharati jetavane anāthapiṇḍikassa
ārāme mahatā bhikkhusaṅghena saddhiṁ aḍḍhaterasehi
bhikkhusatehi. Tena kho pana samayena bhagavā bhikkhū nibbānapaṭisaṁyuttāya
dhammiyā kathāya sandasseti samādapeti samuttejeti
sampahaṁseti. Te ca bhikkhū aṭṭhikatvā manasikatvā sabbacetaso
samannāharitvā ohitasotā dhammaṁ suṇanti.

[748] Atha kho āyasmato vaṅgīsassa etadahosi ayaṁ kho
bhagavā bhikkhū nibbānapaṭisaṁyuttāya dhammiyā kathāya sandasseti
samādapeti samuttejeti sampahaṁseti te ca bhikkhū aṭṭhikatvā
manasikatvā sabbacetaso samannāharitvā ohitasotā dhammaṁ suṇanti
yannūnāhaṁ bhagavantaṁ sammukhā sarūpāhi gāthāhi abhitthaveyyanti.
Atha kho āyasmā vaṅgīso uṭṭhāyāsanā ekaṁsaṁ uttarāsaṅgaṁ karitvā
yena bhagavā tenañjalimpaṇāmetvā bhagavantaṁ etadavoca paṭibhāti
maṁ bhagavā paṭibhāti maṁ sugatāti. Paṭibhātu taṁ vaṅgīsāti bhagavā
avoca.

[749] Atha kho āyasmā vaṅgīso bhagavantaṁ sammukhā sarūpāhi
gāthāhi abhitthavi
parosahassa bhikkhūnaṁ sugataṁ payirupāsati
desentaṁ virajaṁ dhammaṁ nibbānaṁ akutobhayaṁ
suṇanti dhammaṁ vimalaṁ sammāsambuddhadesitaṁ
sobhati vata sambuddho bhikkhusaṅghapurakkhato
nāganāmosi bhagavā isīnaṁ isisattamo
mahāmeghova hutvāna sāvake abhivassati
divāvihārā nikkhamma satthudassanakāmatā 1
sāvako te mahāvīra pāde vandati vaṅgīsoti.
Kiṁ nu te vaṅgīsa imā gāthāyo pubbe parivitakkitā udāhu
ṭhānasova taṁ paṭibhantīti. Na kho me bhante imā gāthāyo
pubbe parivitakkitā atha kho ṭhānasova maṁ paṭibhantīti. Tenahi
taṁ vaṅgīsa bhiyyoso mattāya pubbe aparivitakkitā gāthāyo
paṭibhantūti.

[750] Evaṁ bhanteti kho āyasmā vaṅgīso bhagavato paṭissutvā
1 Ma. Yu. satthudassanakāmayatā.
Bhiyyoso mattāya bhagavantaṁ pubbe aparivitakkitāhi gāthāhi abhitthavi
ummaggasataṁ 1 mārassa abhibhuyya
carasi pabhijja khīlāni
taṁ passatha bandhapamuñcakaraṁ
asitaṁ bhāgaso pavibhajjaṁ
oghassa hi nittharaṇatthaṁ
anekavihitaṁ maggaṁ akkhāsi
tasmiṁ ce amate akkhāte
dhammaddasā ṭhitā asaṁhirā
pajjotakaro ativijjha dhammaṁ 2
sabbadiṭṭhīnaṁ atikkamamaddasa
ñatvā ca sacchikatvā ca aggaṁ so desayi dasaṭṭhānaṁ
evaṁ sudesite dhamme ko pamādo vijānataṁ [3]-
tasmā hi tassa bhagavato sāsane
appamatto sadā namassamanusikkheti.
Navamaṁ koṇḍaññasuttaṁ

[751] Ekaṁ samayaṁ bhagavā rājagahe viharati veḷuvane
kalandakanivāpe. Atha kho āyasmā aññākoṇḍañño 4 sucirasseva
yena bhagavā tenupasaṅkami upasaṅkamitvā bhagavato pādesu sirasā
1 Ma. Yu. ummagpathaṁ. 2 Ma. Yu. ayaṁpāṭhonatthi. 3 Ma. Yu. etthantare dhammanti
dissati. 4 Ma. Yu. aññāsikoṇḍañño.
Nipatitvā bhagavato pādāni mukhena ca paricumbati pāṇīhi ca
parisambāhati nāmañca sāveti koṇḍaññohaṁ bhagavā koṇḍaññohaṁ
sugatāti.

[752] Atha kho āyasmato vaṅgīsassa etadahosi ayaṁ kho
āyasmā aññākoṇḍañño sucirasseva yena bhagavā tenupasaṅkami
upasaṅkamitvā bhagavato pādesu sirasā nipatitvā bhagavato pādāni
mukhena ca paricumbati pāṇīhi ca parisambāhati nāmañca sāveti
koṇḍaññohaṁ bhagavā koṇḍaññohaṁ sugatāti yannūnāhaṁ āyasmantaṁ
aññākoṇḍaññaṁ bhagavato sammukhā sarūpāhi gāthāhi abhitthaveyyanti.
Atha kho āyasmā vaṅgīso uṭṭhāyāsanā ekaṁsaṁ uttarāsaṅgaṁ
karitvā yena bhagavā tenañjalimpaṇāmetvā bhagavantaṁ
etadavoca paṭibhāti maṁ bhagavā paṭibhāti maṁ sugatāti. Paṭibhātu
taṁ vaṅgīsāti bhagavā avoca.

[753] Atha kho āyasmā vaṅgīso āyasmantaṁ aññākoṇḍaññaṁ
bhagavato sammukhā sarūpāhi gāthāhi abhitthavi
buddhānubuddho so thero koṇḍañño tibbanikkamo
lābhī sukhavihārānaṁ vivekānaṁ abhiṇhaso
yaṁ sāvakena pattabbaṁ satthusāsanakārinā
sabbassa taṁ anuppattaṁ appamattassa sikkhato
Mahānubhāvo tevijjo cetopariyāyakovido
koṇḍañño buddhadāyādo 1 pāde vandati satthunoti.
Dasamaṁ moggallānasuttaṁ

[754] Ekaṁ samayaṁ bhagavā rājagahe viharati isigilipasse
kāḷasilāyaṁ mahatā bhikkhusaṅghena saddhiṁ pañcamattehi bhikkhusatehi
sabbeheva arahantehi. Tesaṁ sudaṁ āyasmā mahāmoggallāno
cetasā cittaṁ samannesati vippamuttaṁ nirūpadhiṁ.

[755] Atha kho āyasmato vaṅgīsassa etadahosi ayaṁ kho
bhagavā rājagahe viharati isigilipasse kāḷasilāyaṁ mahatā bhikkhusaṅghena
saddhiṁ pañcamattehi bhikkhusatehi sabbeheva arahantehi tesaṁ sudaṁ
āyasmā mahāmoggallāno cetasā cittaṁ samannesati vippamuttaṁ
nirūpadhiṁ yannūnāhaṁ āyasmantaṁ mahāmoggallānaṁ bhagavato sammukhā
sarūpāhi gāthāhi abhitthaveyyanti. Atha kho āyasmā vaṅgīso
uṭṭhāyāsanā ekaṁsaṁ uttarāsaṅgaṁ karitvā yena bhagavā tenañjalimpaṇāmetvā
bhagavantaṁ etadavoca paṭibhāti maṁ bhagavā paṭibhāti
maṁ sugatāti. Paṭibhātu taṁ vaṅgīsāti bhagavā avoca.

[756] Atha kho āyasmā vaṅgīso āyasmantaṁ mahāmoggallānaṁ
bhagavato sammukhā sarūpāhi gāthāhi abhitthavi
nagassa passe āsīnaṁ muniṁ dukkhassa pāraguṁ
sāvakā payirupāsanti tevijjā maccuhāyino
1 Yu. buddhasāvako.
Te cetasā anupariyesati 1 moggallāno mahiddhiko
cittaṁ nesaṁ samannesaṁ vippamuttaṁ nirūpadhiṁ
evaṁ sabbaṅgasampannaṁ muniṁ dukkhassa pāraguṁ
anekākārasampannaṁ payirupāsanti gotamanti.
Ekādasamaṁ gaggarāsuttaṁ