[737] Saññāya vipariyesā cittante pariḍayhati
nimittaṁ parivajjehi subhaṁ rāgūpasañhitaṁ
saṅkhāre parato passa dukkhato mā ca attato
nibbāpehi mahārāgaṁ mā ḍayhittho punappunaṁ
asubhāya cittaṁ bhāvehi ekaggaṁ susamāhitaṁ
sati kāyagatā tyatthu nibbidābahulo bhava
animittañca bhāvehi mānānusayamujjaha
tato mānābhisamayā upasanto carissasīti.
Pañcamaṁ subhāsitasuttaṁ

[738] Sāvatthīnidānaṁ. Tatra kho bhagavā bhikkhū āmantesi
bhikkhavoti. Bhadanteti te bhikkhū bhagavato paccassosuṁ. Bhagavā
etadavoca catūhi bhikkhave aṅgehi samannāgatā vācā subhāsitā
hoti no dubbhāsitā anavajjā ca ananuvajjā ca viññūnaṁ. Katamehi
catūhi. Idha bhikkhave bhikkhu subhāsitaṁyeva bhāsati no dubbhāsitaṁ
dhammaṁyeva bhāsati no adhammaṁ piyaṁyeva bhāsati no appiyaṁ saccaṁyeva
bhāsati no alikaṁ. Imehi kho bhikkhave catūhi aṅgehi samannāgatā
vācā subhāsitā hoti no dubbhāsitā anavajjā ca ananuvajjā ca
viññūnanti.

[739] Idamavoca bhagavā idaṁ vatvāna sugato athāparaṁ
etadavoca satthā
Subhāsitaṁ uttamamāhu santo
dhammaṁ bhaṇe nādhammantaṁ dutiyaṁ
piyaṁ bhaṇe nāppiyantaṁ tatiyaṁ
saccaṁ bhaṇe nālikantaṁ catutthanti.
Atha kho āyasmā vaṅgīso uṭṭhāyāsanā ekaṁsaṁ uttarāsaṅgaṁ karitvā
yena bhagavā tenañjalimpaṇāmetvā bhagavantaṁ etadavoca paṭibhāti
maṁ bhagavā paṭibhāti maṁ sugatāti. Paṭibhātu taṁ vaṅgīsāti bhagavā
avoca.

[740] Atha kho āyasmā vaṅgīso bhagavantaṁ sammukhā sarūpāhi
gāthāhi abhitthavi
tameva vācaṁ bhāseyya yāyattānaṁ na tāpaye
pare ca na vihiṁseyya sā ve vācā subhāsitā
piyavācameva bhāseyya yā vācā paṭinanditā
yaṁ anādāya pāpāni paresaṁ bhāsate piyaṁ
saccaṁ ve amatā vācā esa dhammo sanantano
sacce atthe ca dhamme ca āhu santo patiṭṭhitā
yaṁ buddho bhāsati 1 vācaṁ khemaṁ nibbānapattiyā
dukkhassantakiriyāya sā ve vācānamuttamāti.
Chaṭṭhaṁ sārīputtasuttaṁ

[741] Ekaṁ samayaṁ āyasmā sārīputto sāvatthiyaṁ viharati
1 Ma. Yu. bhāsate.
Jetavane anāthapiṇḍikassārāme. Tena kho pana samayena āyasmā
sārīputto bhikkhū dhammiyā kathāya sandasseti samādapeti samuttejeti
sampahaṁseti poriyā vācāya vissaṭṭhāya anelagaḷāya atthassa
viññāpaniyā. Te ca bhikkhū aṭṭhikatvā manasikatvā sabbacetaso
samannāharitvā ohitasotā dhammaṁ suṇanti.

[742] Atha kho āyasmato vaṅgīsassa etadahosi ayaṁ kho
āyasmā sārīputto bhikkhū dhammiyā kathāya sandasseti .pe.
Atthassa viññāpaniyā te ca bhikkhū aṭṭhikatvā .pe. Dhammaṁ
suṇanti yannūnāhaṁ āyasmantaṁ sārīputtaṁ sammukhā sarūpāhi gāthāhi
abhitthaveyyanti. Atha kho āyasmā vaṅgīso uṭṭhāyāsanā ekaṁsaṁ
uttarāsaṅgaṁ karitvā yenāyasmā sārīputto tenañjalimpaṇāmetvā
āyasmantaṁ sārīputtaṁ etadavoca paṭibhāti maṁ āvuso sārīputta
paṭibhāti maṁ āvuso sārīputtāti. Paṭibhātu taṁ āvuso vaṅgīsāti.

[743] Atha kho āyasmā vaṅgīso āyasmantaṁ sārīputtaṁ
sammukhā sarūpāhi gāthāhi abhitthavi
gambhīrapañño medhāvī maggāmaggassa kovido
sārīputto mahāpañño dhammaṁ deseti bhikkhunaṁ
saṅkhittenapi deseti vitthārenapi bhāsati
sālikā viya nigghoso paṭibhāṇaṁ mudīriyi 1
tassa taṁ desayantassa suṇanti madhuraṁ giraṁ
1 Po. Ma. mudīrayi. Yu. paṭibhāṇa mudīrayu.
Sarena rajanīyena savanīyena vaggunā
udaggacittā muditā sotaṁ odhenti bhikkhavoti.
Sattamaṁ pavāraṇāsuttaṁ

[744] Ekaṁ samayaṁ bhagavā sāvatthiyaṁ viharati pubbārāme
migāramātupāsāde mahatā bhikkhusaṅghena saddhiṁ pañcamattehi
bhikkhusatehi sabbeheva arahantehi. Tena kho pana samayena bhagavā
tadahuposathe paṇṇarase pavāraṇāya bhikkhusaṅghaparivuto ajjhokāse
nisinno hoti. Atha kho bhagavā tuṇhībhūtaṁ bhikkhusaṅghaṁ anuviloketvā
bhikkhū āmantesi handadāni bhikkhave pavārayāmi 1 vo na ca
me kiñci garahatha kāyikaṁ vā vācasikaṁ vāti.

[745] Evaṁ vutte āyasmā sārīputto uṭṭhāyāsanā ekaṁsaṁ
uttarāsaṅgaṁ karitvā yena bhagavā tenañjalimpaṇāmetvā bhagavantaṁ
etadavoca na kho mayaṁ bhante bhagavato kiñci garahāma kāyikaṁ
vā vācasikaṁ vā bhagavā hi bhante anuppannassa maggassa
uppādetā asañjātassa maggassa sañjanetā anakkhātassa maggassa
akkhātā maggaññū maggavidū maggakovido maggānugā ca bhante
etarahi sāvakā viharanti pacchā samannāgatā ahañca kho bhante
bhagavantaṁ pavāremi na ca me bhagavā kiñci garahati kāyikaṁ vā
vācasikaṁ vāti. Na khvāhaṁ te sārīputta kiñci garahāmi kāyikaṁ
vā vācasikaṁ vā paṇḍito tvaṁ sārīputta mahāpañño tvaṁ
1 Ma. pavāremi.
Sārīputta puthupañño tvaṁ sārīputta hāsapañño tvaṁ sārīputta
javanapañño tvaṁ sārīputta tikkhapañño tvaṁ sārīputta nibbedhikapañño
tvaṁ sārīputta seyyathāpi sārīputta rañño cakkavattissa
jeṭṭhaputto pitarā pavattitaṁ cakkaṁ sammadeva anupavatteti evameva
kho tvaṁ sārīputta mayā anuttaraṁ dhammacakkaṁ pavattitaṁ sammadeva
anupavattesīti. No ce kira me bhante bhagavā kiñci garahati
kāyikaṁ vā vācasikaṁ vā imesaṁ pana bhante bhagavā pañcannaṁ
bhikkhusatānaṁ na kiñci garahati kāyikaṁ vā vācasikaṁ vāti. Imesaṁpi
khvāhaṁ sārīputta pañcannaṁ bhikkhusatānaṁ na kiñci garahāmi kāyikaṁ
vā vācasikaṁ vā imesaṁ hi sārīputta pañcannaṁ bhikkhusatānaṁ saṭṭhī
bhikkhū tevijjā saṭṭhī bhikkhū chaḷabhiññā saṭṭhī bhikkhū ubhatobhāgavimuttā
atha itare paññāvimuttāti. Atha kho āyasmā vaṅgīso
uṭṭhāyāsanā ekaṁsaṁ uttarāsaṅgaṁ karitvā yena bhagavā
tenañjalimpaṇāmetvā bhagavantaṁ etadavoca paṭibhāti maṁ bhagavā paṭibhāti
maṁ sugatāti. Paṭibhātu taṁ vaṅgīsāti bhagavā avoca.

[746] Atha kho āyasmā vaṅgīso bhagavantaṁ sammujā sarūpāhi
gāthāhi abhitthavi
ajja paṇṇarase visuddhiyā
bhikkhupañcasatā samāgatā
Saññojanabandhanacchidā
anīghā khīṇapunabbhavā isī
cakkavatti yathā rājā amaccaparivārito
samantā anupariyeti sāgarantaṁ mahiṁ imaṁ
evaṁ vijitasaṅgāmaṁ satthavāhaṁ anuttaraṁ
sāvakā payirupāsanti tevijjā maccuhāyino
sabbe bhagavato puttā palāpettha na vijjati
taṇhāsallassa hantāraṁ vande ādiccabandhunanti.
Aṭṭhamaṁ parosahassasuttaṁ