[717] Na tena bhikkhako hoti yāvatā bhikkhate pare
vissaṁ dhammaṁ samādāya bhikkhu hoti na tāvatā
Yodha puññañca pāpañca pavāhetvā 1 brahmacariyaṁ
saṅkhāya loke carati sa ve bhikkhūti vuccatīti.

[718] Evaṁ vutte bhikkhako brāhmaṇo bhagavantaṁ etadavoca
abhikkantaṁ bho gotama abhikkantaṁ bho gotama .pe. Upāsakaṁ maṁ
bhavaṁ gotamo dhāretu ajjatagge pāṇupetaṁ saraṇaṅgatanti.
Ekādasamaṁ saṅgaravasuttaṁ

[719] Sāvatthīnidānaṁ. Tena kho pana samayena saṅgaravo
nāma brāhmaṇo sāvatthiyaṁ paṭivasati udakasuddhiko udakena suddhiṁ 2
pacceti sāyapātaṁ udakorohaṇānuyogamanuyutto viharati. Atha kho
āyasmā ānando pubbaṇhasamayaṁ nivāsetvā pattacīvaramādāya
sāvatthiyaṁ piṇḍāya pāvisi sāvatthiyaṁ piṇḍāya caritvā pacchābhattaṁ
piṇḍapātapaṭikkanto yena bhagavā tenupasaṅkami upasaṅkamitvā
bhagavantaṁ abhivādetvā ekamantaṁ nisīdi.

[720] Ekamantaṁ nisinno kho āyasmā ānando bhagavantaṁ
etadavoca idha bhante saṅgaravo nāma brāhmaṇo sāvatthiyaṁ
paṭivasati udakasuddhiko udakena suddhiṁ pacceti sāyapātaṁ
udakorohaṇānuyogamanuyutto viharati sādhu bhante bhagavā yena
saṅgaravassa brāhmaṇassa nivesanaṁ tenupasaṅkamatu anukampaṁ upādāyāti.
Adhivāsesi bhagavā tuṇhībhāvena. Atha kho bhagavā pubbaṇhasamayaṁ
nivāsetvā pattacīvaramādāya yena saṅgaravassa brāhmaṇassa nivesanaṁ
1 Ma. Yu. bāhitvā. 2 Ma. parisuddhiṁ.
Tenupasaṅkami upasaṅkamitvā paññatte āsane nisīdi.

[721] Atha kho saṅgaravo brāhmaṇo yena bhagavā tenupasaṅkami
upasaṅkamitvā bhagavatā saddhiṁ sammodi sammodanīyaṁ kathaṁ sārāṇīyaṁ
vītisāretvā ekamantaṁ nisīdi. Ekamantaṁ nisinnaṁ kho saṅgaravaṁ
brāhmaṇaṁ bhagavā etadavoca saccaṁ kira tvaṁ brāhmaṇa udakasuddhiko
udakena suddhiṁ paccesi sāyapātaṁ udakorohaṇānuyogamanuyutto
viharasīti. Evaṁ bho gotamāti. Kiṁ pana tvaṁ brāhmaṇa
atthavasaṁ sampassamāno udakasuddhiko udakena suddhiṁ paccesi sāyapātaṁ
udakorohaṇānuyogamanuyutto viharasīti. Idha me bho gotama yaṁ
divā pāpakammaṁ kataṁ hoti taṁ sayaṁ nhānena pavāhemi yaṁ
rattiṁ pāpakammaṁ kataṁ hoti taṁ pātaṁ nhānena pavāhemi imaṁ ca
khvāhaṁ bho gotama atthavasaṁ sampassamāno udakasuddhiko udakena
suddhiṁ paccemi sāyapātaṁ udakorohaṇānuyogamanuyutto viharāmīti.

[722] Dhammo rahado brāhmaṇa sīlatittho
anāvilo sabbhi sataṁ pasattho
yattha have vedaguno sinātā
anallagattāva taranti pāranti.

[723] Evaṁ vutte saṅgaravo brāhmaṇo bhagavantaṁ etadavoca
abhikkantaṁ bho gotama abhikkantaṁ bho gotama .pe. Upāsakaṁ maṁ
bhavaṁ gotamo dhāretu ajjatagge pāṇupetaṁ saraṇaṅgatanti.
Dvādasamaṁ khomadussasuttaṁ

[724] Evamme sutaṁ ekaṁ samayaṁ bhagavā sakkesu viharati
khomadussannāma sakyānaṁ nigamo. Atha kho bhagavā pubbaṇhasamayaṁ
nivāsetvā pattacīvaramādāya khomadussaṁ piṇḍāya pāvisi. Tena
kho pana samayena khomadussakā brāhmaṇagahapatikā sabhāyaṁ sannipatitā
honti kenacideva karaṇīyena. Devo ca ekamekaṁ phusāyati. Atha kho
bhagavā yena sā sabhā tenupasaṅkami. Addasaṁsu kho khomadussakā
brāhmaṇagahapatikā bhagavantaṁ dūratova āgacchantaṁ disvāna etadavocuṁ
ke ca muṇḍakā samaṇakā ke ca sabhādhammaṁ jānissantīti.

[725] Atha kho bhagavā khomadussake brāhmaṇagahapatike gāthāya
ajjhabhāsi
nesā sabhā yattha na santi santo
santo na te ye na vadanti dhammaṁ
rāgañca dosañca pahāya mohaṁ
dhammaṁ vadantā ca bhavanti santoti.

[726] Evaṁ vutte khomadussakā brāhmaṇagahapatikā bhagavantaṁ
etadavocuṁ abhikkantaṁ bho gotama abhikkantaṁ bho gotama seyyathāpi
bho gotama nikkujjitaṁ vā ukkujjeyya paṭicchannaṁ vā vivareyya
mūḷhassa vā maggaṁ ācikkheyya andhakāre vā telapajjotaṁ dhāreyya
cakkhumanto rūpāni dakkhantīti evameva bhotā gotamena
Anekapariyāyena dhammo pakāsito ete mayaṁ bhavantaṁ gotamaṁ saraṇaṁ
gacchāma dhammañca bhikkhusaṅghañca upāsake no bhavaṁ gotamo
dhāretu ajjatagge pāṇupete saraṇaṅgateti.
Upāsakavaggo dutiyo.
Tassuddānaṁ
kasī udayo devahito aññataramahāsālaṁ
mānatthaddhañca paccanikañca navakammaṁ kaṭṭhahāraṁ
mātuposakaṁ bhikkhako saṅgaravo khomadussena dvādasāti.
Brāhmaṇasaṁyuttaṁ samattaṁ
---------
Vaṅgīsasaṁyuttaṁ
------------
paṭhamaṁ nikkhantasuttaṁ