[707] Na ca me vanasmiṁ karaṇīyamatthi
ucchinnamūlaṁ me vanaṁ visūkaṁ
svāhaṁ vane nibbanatho visallo
eko rame aratiṁ vippahāyāti.

[708] Evaṁ vutte navakammikabhāradvājo brāhmaṇo bhagavantaṁ
etadavoca abhikkantaṁ bho gotama abhikkantaṁ bho gotama .pe.
Upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṅgatanti.
Aṭṭhamaṁ kaṭṭhahārasuttaṁ

[709] Ekaṁ samayaṁ bhagavā kosalesu viharati aññatarasmiṁ
vanasaṇḍe. Tena kho pana samayena aññatarassa bhāradvājagottassa
1 Ma. Yu. samaṇo gotamo.
Brāhmaṇassa sambahulā antevāsikā kaṭṭhahārakā māṇavakā yena so
vanasaṇḍo tenupasaṅkamiṁsu upasaṅkamitvā addasaṁsu bhagavantaṁ tasmiṁ
vanasaṇḍe nisinnaṁ pallaṅkaṁ ābhujitvā ujuṁ kāyaṁ paṇidhāya parimukhaṁ
satiṁ upaṭṭhapetvā disvāna yena bhāradvājagotto brāhmaṇo
tenupasaṅkamiṁsu upasaṅkamitvā bhāradvājagottaṁ brāhmaṇaṁ etadavocuṁ
yagghe bhavaṁ jāneyya asukasmiṁ vanasaṇḍe samaṇo gotamo nisinno
pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvāti.

[710] Atha kho bhāradvājagotto brāhmaṇo tehi māṇavakehi
saddhiṁ yena so vanasaṇḍo tenupasaṅkami upasaṅkamitvā addasa 1
bhagavantaṁ tasmiṁ vanasaṇḍe nisinnaṁ pallaṅkaṁ ābhujitvā ujuṁ kāyaṁ
paṇidhāya parimukhaṁ satiṁ upaṭṭhapetvā disvāna yena bhagavā
tenupasaṅkami upasaṅkamitvā bhagavantaṁ gāthāya ajjhabhāsi
gambhīrarūpe bahubherave vane
suññaṁ araññaṁ vijanaṁ vigāhiya
aniñjamānena hitena vaggunā
sucārurūpaṁ vata bhikkhu jhāyasi
na yattha gītaṁ napi yattha vāditaṁ
eko araññe vanavassito muni
accherarūpaṁ paṭibhāti maṁ idaṁ
yadekako pītimano vane vase
1 Ma. Yu. addasā kho.
Maññāmahaṁ lokādhipatisahabyataṁ
ākaṅkhamāno tidivaṁ anuttaraṁ
kasmā bhavaṁ vijanamaraññamassito
tapo idha kubbati 1 brahmapattiyāti.

[711] Yākāci kaṅkhā abhinandanā vā
anekadhātūsu puthū sadā sitā
aññāṇamūlappabhavā pajappitā
sabbā mayā byantīkatā samūlikā
svāhaṁ akaṅkho asito anupayo
sabbesu dhammesu visuddhadassano
pappuyya sambodhimanuttaraṁ sivaṁ
jhāyāmahaṁ brahmaraho visārahoti.

[712] Evaṁ vutte bhāradvājagotto brāhmaṇo bhagavantaṁ
etadavoca abhikkantaṁ bho gotama abhikkantaṁ bho gotama .pe.
Ajjatagge pāṇupetaṁ saraṇaṅgatanti.
Navamaṁ mātuposakasuttaṁ

[713] Sāvatthīnidānaṁ. Atha kho mātuposako brāhmaṇo
yena bhagavā tenupasaṅkami upasaṅkamitvā bhagavatā saddhiṁ sammodi
sammodanīyaṁ kathaṁ sārāṇīyaṁ vītisāretvā ekamantaṁ nisīdi. Ekamantaṁ
nisinno kho mātuposako brāhmaṇo bhagavantaṁ etadavoca ahañhi
1 Po. Ma. Yu. kubbasi.
Bho gotama dhammena bhikkhaṁ pariyesāmi dhammena bhikkhaṁ pariyesitvā
mātāpitaro posemi kaccāhaṁ bho gotama evaṁkārī kiccakārī
homīti. Taggha tvaṁ brāhmaṇa evaṁkārī kiccakārī ahosi yo
kho brāhmaṇa dhammena bhikkhaṁ pariyesati dhammena bhikkhaṁ pariyesitvā
mātāpitaro poseti bahuṁ so puññaṁ pasavatīti.

[714] Idamavoca .pe.
Yo mātaraṁ pitaraṁ vā macco dhammena posati
tāya naṁ pāricariyāya mātāpitūsu paṇḍitā
idheva naṁ pasaṁsanti pecca sagge pamodatīti.

[715] Evaṁ vutte mātuposako brāhmaṇo bhagavantaṁ etadavoca
abhikkantaṁ bho gotama abhikkantaṁ bho gotama .pe. Upāsakaṁ maṁ
bhavaṁ gotamo dhāretu ajjatagge pāṇupetaṁ saraṇaṅgatanti.
Dasamaṁ bhikkhakasuttaṁ

[716] Sāvatthīnidānaṁ. Atha kho bhikkhako brāhmaṇo yena bhagavā
tenupasaṅkami upasaṅkamitvā bhagavatā saddhiṁ sammodi sammodanīyaṁ
kathaṁ sārāṇīyaṁ vītisāretvā ekamantaṁ nisīdi. Ekamantaṁ nisinno kho
bhikkhako brāhmaṇo bhagavantaṁ etadavoca ahamasmi bho gotama
bhikkhako bhavampi bhikkhako idha no kiṁ nānākaraṇanti.