[687] Pubbenivāsaṁ yo vedi saggāpāyañca passati
atho jātikkhayaṁ patto abhiññā vosito muni
ettha dajjā deyyadhammaṁ ettha dinnaṁ mahapphalaṁ
evaṁ hi yajamānassa evaṁ ijjhati dakkhiṇāti.

[688] Evaṁ vutte devahito brāhmaṇo bhagavantaṁ etadavoca
abhikkantaṁ bho gotama abhikkantaṁ bho gotama .pe. Upāsakaṁ maṁ
bhavaṁ gotamo dhāretu ajjatagge pāṇupetaṁ saraṇaṅgatanti.
Catutthaṁ mahāsālasuttaṁ

[689] Sāvatthinidānaṁ. Atha kho aññataro brāhmaṇamahāsālo
lūkho lūkhapāpuraṇo 2 yena bhagavā tenupasaṅkami upasaṅkamitvā
bhagavatā saddhiṁ sammodi sammodanīyaṁ kathaṁ sārāṇīyaṁ vītisāretvā
ekamantaṁ nisīdi. Ekamantaṁ nisinnaṁ kho taṁ brāhmaṇamahāsālaṁ
1 Ma. Yu. kathaṁ. 2 Ma. lūkhapāvuraṇo.
Bhagavā etadavoca kinnu tvaṁ brāhmaṇa lūkho lūkhapāpuraṇoti.
Idha me bho gotama cattāro puttā te maṁ dārehi saṁpuccha 1 gharā
nikkhāmentīti.

[690] Tenahi tvaṁ brāhmaṇa imā gāthāyo pariyāpuṇitvā 2
sabhāyaṁ mahājanakāye sannipatite puttesu ca sannisinnesu bhāsassu
yehi jātehi nandissaṁ yesañca bhavamicchisaṁ
te maṁ dārehi saṁpuccha sāva vādenti sūkaraṁ
asantā kira maṁ jammā tāta tātāti bhāsare
rakkhasā puttarūpena tena jahanti vayogataṁ
assova jiṇṇo nibbhogo khādanā apanīyati
bālakānaṁ pitā thero parāgāresu bhikkhati
daṇḍova kira me seyyo yañce puttā anassavā
caṇḍampi goṇaṁ vāreti atho caṇḍampi kukkuraṁ
andhakāre pure hoti gambhīre gādhamedhati
daṇḍassa ānubhāvena khalitvā paṭitiṭṭhatīti.

[691] Atha kho so brāhmaṇamahāsālo bhagavato santike imā
gāthāyo pariyāpuṇitvā sabhāyaṁ mahājanakāye sannipatite puttesu
ca sannisinnesu abhāsi
yehi jātehi nandisaṁ yesañca bhavamicchisaṁ
1 dārehi saṁpucchā itipi pāṭhena bhavitabbaṁ. 2 Po. paṭissuṇitvā.
Te maṁ dārehi saṁpuccha sāva vādenti sūkaraṁ
asantā kira maṁ jammā tāta tātāti bhāsare
rakkhasā puttarūpena te jahanti vayogataṁ
assova jiṇṇo nibbhogo khādanā apanīyati
bālakānaṁ pitā thero parāgāresu bhikkhati
daṇḍova kira me seyyo yañce puttā anassavā
caṇḍampi goṇaṁ vāreti atho caṇḍampi kukkuraṁ
andhakāre pure hoti gambhīre gādhamedhati
daṇḍassa ānubhāvena khalitvā paṭitiṭṭhatīti.

[692] Atha kho naṁ brāhmaṇamahāsālaṁ puttā gharaṁ netvā
nhāpetvā paccekaṁ dussayugena acchādesuṁ. Atha kho so brāhmaṇamahāsālo
ekaṁ dussayugaṁ ādāya yena bhagavā tenupasaṅkami upasaṅkamitvā
bhagavatā saddhiṁ sammodi sammodanīyaṁ kathaṁ sārāṇīyaṁ vītisāretvā
ekamantaṁ nisīdi. Ekamantaṁ nisinno kho so brāhmaṇamahāsālo
bhagavantaṁ etadavoca mayaṁ bho gotama brāhmaṇā nāma
ācariyassa ācariyadhanaṁ pariyesāma paṭiggaṇhātu me bhavaṁ gotamo
ācariyo 1 ācariyabhāganti 2 . Paṭiggahesi bhagavā anukampaṁ upādāya.

[693] Atha kho so brāhmaṇamahāsālo bhagavantaṁ etadavoca
abhikkantaṁ bho gotama .pe. Upāsakaṁ maṁ bhavaṁ gotamo dhāretu
ajjatagge pāṇupetaṁ saraṇaṅgatanti.
1 Ma. Yu. ācariyoti padaṁ natthi. 2 Ma. Yu. ācariyadhanaṁ.
Pañcamaṁ mānatthaddhasuttaṁ

[694] Sāvatthinidānaṁ. Tena kho pana samayena mānatthaddho
nāma brāhmaṇo sāvatthiyaṁ paṭivasati. So neva mātaraṁ abhivādeti
na pitaraṁ abhivādeti na ācariyaṁ abhivādeti na jeṭṭhabhātaraṁ abhivādeti.

[695] Tena kho pana samayena bhagavā mahatiyā parisāya parivuto
dhammaṁ deseti. Atha kho mānatthaddhassa brāhmaṇassa etadahosi
ayaṁ kho samaṇo gotamo mahatiyā parisāya parivuto dhammaṁ deseti
yannūnāhaṁ yena samaṇo gotamo tenupasaṅkameyyaṁ sace maṁ samaṇo
gotamo ālapissati ahampi taṁ ālapissāmi no ce maṁ samaṇo
gotamo ālapissati ahampi taṁ nālapissāmīti. Atha kho mānatthaddho
brāhmaṇo yena bhagavā tenupasaṅkami upasaṅkamitvā [1]-
ekamantaṁ aṭṭhāsi. Atha kho bhagavā [2]- nālapati. Atha kho mānatthaddho
brāhmaṇo nāyaṁ samaṇo gotamo kiñci jānātīti tatova puna
nivattitukāmo ahosi.

[696] Atha kho bhagavā mānatthaddhassa brāhmaṇassa cetasā
cetoparivitakkamaññāya mānatthaddhaṁ brāhmaṇaṁ gāthāya ajjhabhāsi
na mānaṁ brāhmaṇa sādhu atthi kassīdha brāhmaṇa
yena atthena āgañchi 3 tamevamanubrūhayeti.