[667] Ekaṁ samayaṁ bhagavā kosalesu viharati aññatarasmiṁ vanasaṇḍe.
Tena kho pana samayena aññatarassa bhāradvājagottassa
brāhmaṇassa catuddasa balibaddā naṭṭhā honti.

[668] Atha kho bhāradvājagotto brāhmaṇo te balibadde
gavesanto yena so vanasaṇḍo tenupasaṅkami upasaṅkamitvā addasa
bhagavantaṁ tasmiṁ vanasaṇḍe nisinnaṁ pallaṅkaṁ ābhujitvā ujuṁ kāyaṁ
paṇidhāya parimukhaṁ satiṁ upaṭṭhapetvā disvāna yena bhagavā tenupasaṅkami
upasaṅkamitvā bhagavato santike imā gāthāyo abhāsi
1 yū. anallinagattāva.
Naha 1 nūnimassa samaṇassa balibaddā catuddasa
ajjasaṭṭhiṁ na dissanti tenāyaṁ samaṇo sukhī
naha nūnimassa samaṇassa tilā khettasmi pāpikā
ekapaṇṇā dupaṇṇā ca tenāyaṁ samaṇo sukhī
naha nūnimassa samaṇassa tucchakoṭṭhasmi mūsikā
ussoḷhikāya naccanti tenāyaṁ samaṇo sukhī
naha nūnimassa samaṇassa santhāro sattamāsiko
uppādakehi sañchanno tenāyaṁ samaṇo sukhī
naha nūnimassa samaṇassa vidhavā puttadhītaro
ekaputtā duputtā ca tenāyaṁ samaṇo sukhī
naha nūnimassa samaṇassa piṅgalā tilakāhatā
sottaṁ pādena potheti tenāyaṁ samaṇo sukhī
naha nūnimassa samaṇassa paccūsamhi iṇāyikā
detha dethāti codenti tenāyaṁ samaṇo sukhīti.

[669] Naha mayhaṁ brāhmaṇa balibaddā catuddasa
ajjasaṭṭhiṁ na dissanti tenāhaṁ brāhmaṇa sukhī
naha mayhaṁ brāhmaṇa tilā khettasmi pāpikā
ekapaṇṇā dupaṇṇā ca tenāhaṁ brāhmaṇa sukhī
naha mayhaṁ brāhmaṇa tucchakoṭṭhasmi mūsikā
ussoḷhikāya naccanti tenāhaṁ brāhmaṇa sukhī
1 Ma. Yu. sabbattha na hīti khāyati.
Naha mayhaṁ brāhmaṇa santhāro sattamāsiko
uppādakehi sañchanno tenāhaṁ brāhmaṇa sukhī
naha mayhaṁ brāhmaṇa vidhavā puttadhītaro
ekaputtā dviputtā ca tenāhaṁ brāhmaṇa sukhī
naha mayhaṁ brāhmaṇa piṅgalā tilakāhatā
sottaṁ pādena potheti tenāhaṁ brāhmaṇa sukhī
naha mayhaṁ brāhmaṇa paccūsamhi iṇāyikā
detha dethāti codenti tenāhaṁ brāhmaṇa sukhīti.

[670] Evaṁ vutte bhāradvājagotto brāhmaṇo bhagavantaṁ
etadavoca abhikkantaṁ bho gotama abhikkantaṁ bho gotama seyyathāpi
bho gotama nikkujjitaṁ vā ukkujjeyya paṭicchannaṁ vā vivareyya
mūḷhassa vā maggaṁ ācikkheyya andhakāre vā telapajjotaṁ dhāreyya
cakkhumanto rūpāni dakkhantīti evameva bhotā gotamena anekapariyāyena
dhammo pakāsito esāhaṁ bhavantaṁ gotamaṁ saraṇaṁ gacchāmi
dhammañca bhikkhusaṅghañca labheyyāhaṁ bhoto gotamassa santike
pabbajjaṁ labheyyaṁ upasampadanti. Alattha kho bhāradvājagotto
brāhmaṇo bhagavato santike pabbajjaṁ alattha upasampadaṁ.
Acirūpasampanno ca panāyasmā bhāradvājo eko vūpakaṭṭho
appamatto ātāpī pahitatto viharanto na cirasseva yassatthāya
kulaputtā sammadeva agārasmā anagāriyaṁ pabbajanti tadanuttaraṁ
Brahmacariyapariyosānaṁ diṭṭheva dhamme sayaṁ abhiññā sacchikatvā
upasampajja vihāsi khīṇā jāti vusitaṁ brahmacariyaṁ kataṁ karaṇīyaṁ
nāparaṁ itthattāyāti abbhaññāsi. Aññataro ca panāyasmā
bhāradvājo arahataṁ ahosīti.
Arahantavaggo paṭhamo.
Tassuddānaṁ
dhanañjānī ca akkosaṁ asurinda bilaṅgikaṁ
ahiṁsakaṁ jaṭā ceva suddhikañceva aggikā
sundarikā bahudhiti yena ca te dasāti.
------------------
Upāsakavaggo dutiyo
------------
paṭhamaṁ kasisuttaṁ

[671] Evamme sutaṁ ekaṁ samayaṁ bhagavā magadhesu viharati
dakkhiṇāgirismiṁ ekanālāyaṁ brāhmaṇagāme. Tena kho pana samayena
kasibhāradvājassa brāhmaṇassa pañcamattāni naṅgalasatāni payuttāni
honti vappakāle.

[672] Atha kho bhagavā pubbaṇhasamayaṁ nivāsetvā pattacīvaramādāya
yena kasibhāradvājassa brāhmaṇassa kammanto tenupasaṅkami.
Tena kho pana samayena kasibhāradvājassa brāhmaṇassa parivesanā
vattati. Atha kho bhagavā yena parivesanā tenupasaṅkami upasaṅkamitvā
ekamantaṁ aṭṭhāsi. Addasā kho kasibhāradvājo
brāhmaṇo bhagavantaṁ piṇḍāya ṭhitaṁ disvāna bhagavantaṁ etadavoca
ahaṁ kho samaṇa kasāmi ca vapāmi ca kasitvā ca vapitvā ca
bhuñjāmi tvampi samaṇa kasa ca vapassu ca kasitvā ca vapitvā ca
bhuñjassūti. Ahampi kho brāhmaṇa kasāmi ca vapāmi ca kasitvā ca
vapitvā ca bhuñjāmīti. Na kho pana mayaṁ passāma bhoto gotamassa
yugaṁ vā naṅgalaṁ vā phālaṁ vā pācanaṁ vā balibadde vā atha ca
Pana bhavaṁ gotamo evamāha ahampi kho brāhmaṇa kasāmi ca
vapāmi ca kasitvā ca vapitvā ca bhuñjāmīti.

[673] Atha kho kasibhāradvājo brāhmaṇo bhagavantaṁ gāthāya
ajjhabhāsi
kassako paṭijānāsi na ca passāmi te kasiṁ
kassako pucchito brūhi kathaṁ jānemu taṁ kasinti.

[674] Saddhā bījaṁ tapo vuṭṭhi paññā me yuganaṅgalaṁ
hiri īsā mano yottaṁ sati me phālapācanaṁ
kāyagutto vacīgutto āhāre udare yato
saccaṁ karomi niddānaṁ soraccaṁ me pamocanaṁ
viriyaṁ me dhuradhorayhaṁ yogakkhemādhivāhanaṁ
gacchati anivattantaṁ yattha gantvā na socati
evamesā kasī kaṭṭhā sā hoti amatapphalā
etaṁ kasiṁ kasitvāna sabbadukkhā pamuccatīti.
Bhuñjatu bhavaṁ gotamo kassako bhavaṁ yañhi bhavaṁ gotamo amatapphalaṁpi 1
kasatīti.

[675] Gāthābhigītaṁ me abhojaneyyaṁ
sampassataṁ brāhmaṇa esa 2 dhammo
gāthābhigītaṁ panudanti buddhā
dhamme sati brāhmaṇa vutti resā
1 Ma. Yu. etthantare kasiṁ iti dissati. 2 nesa.
Aññena ca kevalinaṁ mahesiṁ
khīṇāsavaṁ kukkuccavūpasantaṁ
annena pānena upaṭṭhahassu
khettañhi taṁ puññapekkhassa hotīti.

[676] Evaṁ vutte kasibhāradvājo brāhmaṇo bhagavantaṁ
etadavoca abhikkantaṁ bho gotama abhikkantaṁ bho gotama .pe.
Ajjatagge pāṇupetaṁ saraṇaṅgatanti.
Dutiyaṁ udayasuttaṁ