[677] Sāvatthīnidānaṁ. Atha kho bhagavā pubbaṇhasamayaṁ
nivāsetvā pattacīvaramādāya yena udayassa brāhmaṇassa nivesanaṁ
tenupasaṅkami. Atha kho udayo brāhmaṇo bhagavato pattaṁ
odanena pūresi.

[678] Dutiyampi kho bhagavā pubbaṇhasamayaṁ nivāsetvā pattacīvaramādāya
yena udayassa brāhmaṇassa nivesanaṁ tenupasaṅkami.
Dutiyampi kho udayo brāhmaṇo bhagavato pattaṁ odanena pūresi.

[679] Tatiyampi kho bhagavā pubbaṇhasamayaṁ nivāsetvā pattacīvaramādāya
yena udayassa brāhmaṇassa nivesanaṁ tenupasaṅkami.
Tatiyampi kho udayo brāhmaṇo bhagavato pattaṁ odanena pūretvā
bhagavantaṁ etadavoca pakaṭṭhakvāyaṁ samaṇo gotamo punappunaṁ
āgacchatīti.

[680] Punappunaṁ ceva vapanti bījaṁ
punappunaṁ vassati devarājā
punappunaṁ khettaṁ kasanti kassakā
punappunaṁ dhaññamupenti raṭṭhaṁ
punappunaṁ yācakā yācayanti
punappunaṁ dānapatī dadanti
punappunaṁ dānapatī daditvā
punappunaṁ saggamupenti ṭhānaṁ
punappunaṁ khīraṇikā duhanti
punappunaṁ vaccho upeti mātaraṁ
punappunaṁ kilamati phandati ca
punappunaṁ gabbhamupeti mando
punappunaṁ jāyati miyyati ca
punappunaṁ sīvathikaṁ haranti
maggañca laddhā apunabbhavāya
punappunaṁ 1 jāyati bhūripaññoti.

[681] Evaṁ vutte udayo brāhmaṇo bhagavantaṁ etadavoca
abhikkantaṁ bho gotama abhikkantaṁ bho gotama .pe. Upāsakaṁ maṁ
bhavaṁ gotamo dhāretu ajjatagge pāṇupetaṁ saraṇaṅgatanti.
3 Ma. Yu. nasaddo dissati.
Tatiyaṁ devahitasuttaṁ

[682] Sāvatthiyaṁ viharati jetavane ... Tena kho pana samayena
bhagavā vātehābādhiko hoti. Āyasmā ca upavāṇo bhagavato
upaṭṭhāko hoti. Atha kho bhagavā āyasmantaṁ upavāṇaṁ āmantesi
iṅgha me tvaṁ upavāṇa uṇhodakaṁ jānāhīti. Evaṁ bhanteti
kho āyasmā upavāṇo bhagavato paṭissutvā nivāsetvā pattacīvaramādāya
yena devahitassa brāhmaṇassa nivesanaṁ tenupasaṅkami
upasaṅkamitvā tuṇhībhūto ekamantaṁ aṭṭhāsi.

[683] Addasā kho devahito brāhmaṇo āyasmantaṁ upavāṇaṁ
tuṇhībhūtaṁ ekamantaṁ ṭhitaṁ disvāna āyasmantaṁ upavāṇaṁ gāthāya
ajjhabhāsi
tuṇhībhūto bhavaṁ tiṭṭha muṇḍo saṅghāṭipāruto
kiṁ patthayāno kiṁ esaṁ kiṁ nu yācitumāgatoti.

[684] Arahaṁ sugato loke vātehābādhiko muni
sace uṇhodakaṁ atthi munino dehi brāhmaṇa
pūjito pūjaneyyānaṁ sakkareyyāna sakkato
apacito apacineyyānaṁ 1 tassa icchāmi hātaveti.

[685] Atha kho devahito brāhmaṇo uṇhodakassa kājaṁ purisena
gāhāpetvā phāṇitassa ca puṭaṁ ca āyasmato upavāṇassa pādāsi.
Atha kho āyasmā upavāṇo yena bhagavā tenupasaṅkami upasaṅkamitvā
1 Ma. Yu. apaceyyānaṁ.
Bhagavantaṁ uṇhodakena nhāpetvā uṇhodakena phāṇitaṁ āloḷetvā
bhagavato pādāsi. Atha kho bhagavato so ābādho paṭippassambhi.

[686] Atha kho devahito brāhmaṇo yena bhagavā tenupasaṅkami
upasaṅkamitvā bhagavatā saddhiṁ sammodi sammodanīyaṁ kathaṁ sārāṇīyaṁ
vītisāretvā ekamantaṁ nisīdi. Ekamantaṁ nisinno kho devahito
brāhmaṇo bhagavantaṁ gāthāya ajjhabhāsi
kattha dajjā deyyadhammaṁ kattha dinnaṁ mahapphalaṁ
kathaṁ hi yajamānassa kattha 1 ijjhati dakkhiṇāti.