[827] Atha kho anāthapiṇḍikassa gahapatissa nagaramhā
nikkhamantassa āloko antaradhāyi andhakāro pāturahosi bhayaṁ
chambhitattaṁ lomahaṁso udapādi. Tato ca puna nivattitukāmo ahosi.
Atha kho sivako yakkho antarahito saddaṁ anussāvesi
sataṁ hatthī sataṁ assā sataṁ assatarī rathā
sataṁ kaññāsahassāni āmuttamaṇikuṇḍalā
ekassa padavītihārassa kalaṁ nāgghanti soḷasiṁ
1 Yu. ahosi. 2 Ma. Yu. athassa.
Abhikkama gahapati abhikkama gahapati
abhikkamanante seyyo no paṭikkamananti.
Atha kho anāthapiṇḍikassa gahapatissa andhakāro antaradhāyi āloko
pāturahosi yaṁ ahosi bhayaṁ chambhitattaṁ lomahaṁso so paṭippassambhi.

[828] Dutiyampi kho anāthapiṇḍikassa gahapatissa āloko
antaradhāyi andhakāro pāturahosi bhayaṁ chambhitattaṁ lomahaṁso
udapādi. Tato ca puna nivattitukāmo ahosi. Dutiyampi kho
sivako yakkho antarahito saddamanussāvesi
sataṁ hatthī sataṁ assā .pe. Kalaṁ nāgghanti soḷasiṁ
abhikkama gahapati abhikkama gahapati
abhikkamanante seyyo no paṭikkamananti.
Atha kho anāthapiṇḍikassa gahapatissa andhakāro antaradhāyi āloko
pāturahosi yaṁ ahosi bhayaṁ chambhitattaṁ lomahaṁso so paṭippassambhi.

[829] Tatiyampi kho anāthapiṇḍikassa gahapatissa āloko
antaradhāyi andhakāro pāturahosi bhayaṁ chambhitattaṁ lomahaṁso
udapādi. Tato ca puna nivattitukāmo ahosi. Tatiyampi kho
sivako yakkho antarahito saddamanussāvesi
sataṁ hatthī sataṁ assā .pe. Kalaṁ nāgghanti soḷasiṁ
abhikkama gahapati abhikkama gahapati
abhikkamanante seyyo no paṭikkamananti.
Atha kho anāthapiṇḍikassa gahapatissa andhakāro antaradhāyi āloko
pāturahosi yaṁ ahosi bhayaṁ chambhitattaṁ lomahaṁso so paṭippassambhi.

[830] Atha kho anāthapiṇḍiko gahapati yena sītavanaṁ
tenupasaṅkami. Tena kho pana samayena bhagavā rattiyā paccūsasamayaṁ
paccuṭṭhāya ajjhokāse caṅkamati. Addasā kho bhagavā anāthapiṇḍikaṁ
gahapatiṁ dūratova āgacchantaṁ disvāna caṅkamā orohitvā
paññatte āsane nisīdi. Nisajja kho bhagavā anāthapiṇḍikaṁ gahapatiṁ
etadavoca ehi sudattāti. Atha kho anāthapiṇḍiko gahapati
nāmena maṁ bhagavā ālapatīti tattheva bhagavato pādesu sirasā nipatitvā
bhagavantaṁ etadavoca kacci bhante bhagavā sukhaṁ vasitthāti 1 .

[831] Sabbadā ve sukhaṁ seti brāhmaṇo parinibbuto
yo na limpati kāmesu sītibhūto nirūpadhi
sabbā āsattiyo chetvā vineyya hadaye daraṁ
upasanto sukhaṁ seti santiṁ pappuyya cetasāti.
Navamaṁ paṭhamasukkāsuttaṁ

[832] Ekaṁ samayaṁ bhagavā rājagahe viharati veḷuvane kalandakanivāpe.
Tena kho pana samayena sukkā bhikkhunī mahatiyā parisāya
parivutā dhammaṁ deseti.

[833] Atha kho sukkāya bhikkhuniyā abhippasanno yakkho rājagahe
1 Yu. sukhamasayitthāti.
Rathikāya rathikaṁ siṅghāṭakena siṅghāṭakaṁ upasaṅkamitvā tāyaṁ velāyaṁ
imā gāthāyo abhāsi
kimme katā rājagahe manussā madhupitāva seyare 1
ye sukkaṁ na payirupāsanti desentiṁ amataṁ padaṁ
tañca pana appaṭivāniyaṁ asecanakamojavaṁ
pivanti maññe sappaññā valāhakamiva panthagūti.
Dasamaṁ dutiyasukkāsuttaṁ

[834] Ekaṁ samayaṁ bhagavā rājagahe viharati veḷuvane kalandakanivāpe.
Tena kho pana samayena aññataro upāsako sukkāya
bhikkhuniyā bhojanaṁ adāsi.

[835] Atha kho sukkāya bhikkhuniyā abhippasanno yakkho rājagahe
rathikāya rathikaṁ siṅghāṭakena siṅghāṭakaṁ upasaṅkamitvā tāyaṁ velāyaṁ
imaṁ gāthaṁ abhāsi
puññaṁ vata pasavi bahuṁ sappañño vatāyamupāsako
yo sukkāya adāsi bhojanaṁ sabbaganthehi vippamuttāyāti 2 .
Ekādasamaṁ cīrāsuttaṁ

[836] Ekaṁ samayaṁ bhagavā rājagahe viharati veḷuvane kalandakanivāpe.
Tena kho pana samayena aññataro upāsako cīrāya 3
bhikkhuniyā cīvaraṁ adāsi.
1 acchare. 2 Ma. Yu. vippamuttiyāti. evaṁ sabbattha ñātabbaṁ. 3 Sī. vīrāya.