[837] Atha kho cīrāya bhikkhuniyā abhippasanno yakkho rājagahe
rathikāya rathikaṁ siṅghāṭakena siṅghāṭakaṁ upasaṅkamitvā tāyaṁ velāyaṁ
imaṁ gāthaṁ abhāsi
puññaṁ vata pasavi bahuṁ sappañño vatāyamupāsako
yo cīrāya adāsi cīvaraṁ sabbayogehi vippamuttāyāti.
Dvādasamaṁ āḷavakasuttaṁ

[838] Evamme sutaṁ ekaṁ samayaṁ bhagavā āḷaviyaṁ viharati
āḷavakassa yakkhassa bhavane. Atha kho āḷavako yakkho yena
bhagavā tenupasaṅkami upasaṅkamitvā bhagavantaṁ etadavoca nikkhama
samaṇāti. Sādhāvusoti bhagavā nikkhami. Pavisa samaṇāti.
Sādhāvusoti bhagavā pāvisi. Dutiyampi kho āḷavako yakkho bhagavantaṁ
etadavoca nikkhama samaṇāti. Sādhāvusoti bhagavā nikkhami. Pavisa
samaṇāti. Sādhāvusoti bhagavā pāvisi. Tatiyampi kho āḷavako
yakkho bhagavantaṁ etadavoca nikkhama samaṇāti. Sādhāvusoti bhagavā
nikkhami. Pavisa samaṇāti. Sādhāvusoti bhagavā pāvisi.

[839] Catutthampi kho āḷavako yakkho bhagavantaṁ etadavoca
nikkhama samaṇāti. Na khvāhaṁ āvuso nikkhamissāmi yante karaṇīyaṁ
taṁ karohīti. Pañhaṁ taṁ samaṇa pucchissāmi sace me na byākarissasi
cittaṁ vā te khipissāmi hadayaṁ vā te phālessāmi pādesu vā gahetvā
pāragaṅgāya khipissāmīti. Na khvāhantaṁ āvuso passāmi sadevake loke
Samārake sabrahmake sassamaṇabrāhmaṇiyā pajāya sadevamanussāya
yo me cittaṁ vā khipeyya hadayaṁ vā phāleyya pādesu vā gahetvā
pāragaṅgāya khipeyya apica tvaṁ āvuso puccha yadākaṅkhasīti.

[840] Kiṁsūdha vittaṁ purisassa seṭṭhaṁ
kiṁsu suciṇṇaṁ sukhamāvahāti
kiṁsu have sādhutaraṁ rasānaṁ
kathaṁjīviṁ 1 jīvitamāhu seṭṭhanti.

[841] Saddhīdha vittaṁ purisassa seṭṭhaṁ
dhammo suciṇṇo sukhamāvahāti
saccaṁ have sādhutaraṁ rasānaṁ
paññājīviṁ jīvitamāhu seṭṭhanti.

[842] Kathaṁsu tarati oghaṁ kathaṁsu tarati aṇṇavaṁ
kathaṁsu dukkhamacceti kathaṁsu parisujjhatīti.

[843] Saddhāya tarati oghaṁ appamādena aṇṇavaṁ
viriyena dukkhamacceti paññāya parisujjhatīti.

[844] Kathaṁsu labhate paññaṁ kathaṁsu vindate dhanaṁ
kathaṁsu kittiṁ pappoti kathaṁ mittāni ganthati
asmā lokā paraṁ lokaṁ kathaṁ pecca na socatīti.

[845] Saddahāno arahataṁ dhammaṁ nibbānapattiyā
1 ghatvāvaggassa vittasutte kathaṁjīvīti ... paññājīvīti dissanti.
Sussūsaṁ 1 labhate paññaṁ appamatto vicakkhaṇo
paṭirūpakārī dhuravā uṭṭhātā vindate dhanaṁ
saccena kittiṁ pappoti dadaṁ mittāni ganthati
yassete caturo dhammā saddhassa gharamesino
saccaṁ dhammo dhiti cāgo sa ve pecca na socati
iṅgha aññepi pucchassu puthū samaṇabrāhmaṇe
yadi saccā damā cāgā khantyā bhiyyodha vijjatīti.

[846] Kathaṁ nudāni puccheyyaṁ puthū samaṇabrāhmaṇe
yohaṁ ajja pajānāmi yo attho samparāyiko
atthāya vata me buddho vāsāyāḷavimāgamā 2
yohaṁ ajja pajānāmi yattha dinnaṁ mahapphalaṁ
so ahaṁ vicarissāmi gāmā gāmaṁ purā puraṁ
namassamāno sambuddhaṁ dhammassa ca sudhammatanti.
Yakkhasaṁyuttaṁ samattaṁ.
Tassuddānaṁ
indako sakkasūci ca maṇibhaddo ca sānu ca
piyaṅkarapunabbasu sudatto ca dve sukkā cīrā
āḷavakena dvādasāti.
------------
1 Yu. sussūsā labhate paññā. 2 Yu. ...vimāgato.
Sakkasaṁyuttaṁ
paṭhamavaggo paṭhamo
----------
paṭhamaṁ suvīrasuttaṁ