[597] Purisassa hi jātassa kudhārī 2 jāyate mukhe
yāya chindati attānaṁ bālo dubbhāsitaṁ bhaṇaṁ
yo nindiyaṁ pasaṁsati taṁ vā nindati yo pasaṁsiyo
vicināti mukhena so kaliṁ kalinā tena sukhaṁ na vindati
appamatto 3 ayaṁ kali yo akkhesu dhanaparājayo
sabbassāpi sahāpi attanā
ayameva mahantataro kali
yo sugatesu manaṁ padosaye.
Sataṁ sahassāna nirabbudānaṁ
chattiṁsati pañca ca abbudāni
yamariye 4 garahī nirayaṁ upeti
vācaṁ manañca paṇidhāya pāpakanti.
Dasamaṁ dutiyakokālikasuttaṁ

[598] Sāvatthiyaṁ ... Atha kho kokāliko bhikkhu yena bhagavā
tenupasaṅkami upasaṅkamitvā bhagavantaṁ abhivādetvā ekamantaṁ
nisīdi. Ekamantaṁ nisinno kho kokāliko bhikkhu bhagavantaṁ etadavoca
pāpicchā bhante sārīputtamoggallānā pāpikānaṁ icchānaṁ vasaṁ
gatāti.
1 Ma. Yu. atha kiñcarahi. 2 Ma. Yu. kuṭhārī. 3 Ma. Yu. appamattatho.
4 Ma. Yu. yamariyagarahī.

[599] Evaṁ vutte bhagavā kokālikaṁ bhikkhuṁ etadavoca mā
hevaṁ kokālika avaca mā hevaṁ kokālika avaca pasādehi kokālika
sārīputtamoggallānesu cittaṁ pesalā sārīputtamoggallānāti.
Dutiyampi kho kokāliko bhikkhu bhagavantaṁ etadavoca kiñcāpi me
bhante [1]- saddhāyako paccayako atha kho pāpicchāva sārīputtamoggallānā
pāpakānaṁ icchānaṁ vasaṁ gatāti. Dutiyampi kho bhagavā
kokālikaṁ bhikkhuṁ etadavoca mā hevaṁ kokālika avaca mā
hevaṁ kokālika avaca pasādehi kokālika sārīputtamoggallānesu
cittaṁ pesalā sārīputtamoggallānāti. Tatiyampi kho kokāliko
bhikkhu bhagavantaṁ etadavoca .pe. Icchānaṁ vasaṁ gatāti. Tatiyampi
kho bhagavā kokālikaṁ bhikkhuṁ etadavoca .pe. Pesalā
sārīputtamoggallānāti.

[600] Atha kho kokāliko bhikkhu uṭṭhāyāsanā bhagavantaṁ
abhivādetvā padakkhiṇaṁ katvā pakkāmi. Acirapakkantassa ca kokālikassa
bhikkhuno sāsapamattīhi piḷakāhi sabbo kāyo phuṭṭho ahosi
sāsapamattiyo hutvā muggamattiyo ahesuṁ muggamattiyo hutvā
kaḷāyamattiyo ahesuṁ kaḷāyamattiyo hutvā kolaṭṭhimattiyo ahesuṁ
kolaṭṭhimattiyo hutvā kolamattiyo ahesuṁ kolamattiyo hutvā
āmalakamattiyo ahesuṁ āmalakamattiyo hutvā veluvasalāṭukamattiyo
ahesuṁ veluvasalāṭukamattiyo hutvā billamattiyo ahesuṁ
1 Ma. Yu. etthantare bhagavā saddhāyiko paccayikoti dissanti.
Billamattiyo hutvā pabhijjiṁsu pubbañca lohitañca pagghariṁsu. Atha kho
kokāliko bhikkhu teneva ābādhena kālamakāsi. Kālakato ca
kokāliko bhikkhu padumanirayaṁ upapajji sārīputtamoggallānesu cittaṁ
āghātetvā.

[601] Atha kho brahmā sahampati abhikkantāya rattiyā
abhikkantavaṇṇo kevalakappaṁ jetavanaṁ obhāsetvā yena bhagavā
tenupasaṅkami upasaṅkamitvā bhagavantaṁ abhivādetvā ekamantaṁ aṭṭhāsi.
Ekamantaṁ ṭhito kho brahmā sahampati bhagavantaṁ etadavoca kokāliko
bhante bhikkhu kālakato 1 kālakato ca bhante kokāliko bhikkhu
padumanirayaṁ upapanno sārīputtamoggallānesu cittaṁ āghātetvāti.
Idamavoca brahmā sahampati idaṁ vatvā bhagavantaṁ abhivādetvā
padakkhiṇaṁ katvā tatthevantaradhāyīti.

[602] Atha kho bhagavā tassā rattiyā accayena bhikkhū āmantesi
imaṁ bhikkhave rattiṁ brahmā sahampati abhikkantāya rattiyā
abhikkantavaṇṇo kevalakappaṁ jetavanaṁ obhāsetvā yenāhaṁ tenupasaṅkami
upasaṅkamitvā maṁ abhivādetvā ekamantaṁ aṭṭhāsi ekamantaṁ ṭhito
kho bhikkhave brahmā sahampati maṁ etadavoca kokāliko bhante
bhikkhu kālakato kālakato ca bhante kokāliko bhikkhu padumanirayaṁ
upapanno sārīputtamoggallānesu cittaṁ āghātetvāti idamavoca
1 kālamakāsīti vā pāṭho.
Bhikkhave brahmā sahampati idaṁ vatvā maṁ abhivādetvā padakkhiṇaṁ
katvā tatthevantaradhāyīti.

[603] Evaṁ vutte aññataro bhikkhu bhagavantaṁ etadavoca
kīvadīghaṁ nu kho bhante padumaniraye āyuppamāṇanti. Dīghaṁ kho
bhikkhu padumaniraye āyuppamāṇaṁ taṁ na sukaraṁ saṅkhātuṁ ettakāni
vassāni iti vā ettakāni vassasatāni iti vā ettakāni
vassasahassāni iti vā ettakāni vassasatasahassāni iti vāti.
Sakkā pana bhante upamā kātunti.

[604] Sakkā bhikkhūti bhagavā avoca seyyathāpi bhikkhu vīsatikhāriko
kosalako tilavāho tato puriso vassasatassa vassasatassa 1
accayena ekamekaṁ tilaṁ uddhareyya khippataraṁ kho so bhikkhu
vīsatikhāriko kosalako tilavāho iminā upakkamena parikkhayaṁ pariyādānaṁ
gaccheyya na tveva eko abbudo nirayo seyyathāpi bhikkhu
vīsati abbudā nirayā evameko nirabbudo nirayo seyyathāpi
bhikkhu vīsati nirabbudā nirayā evameko ababo nirayo seyyathāpi
bhikkhu vīsati ababā nirayā evameko aṭaṭo nirayo seyyathāpi
bhikkhu vīsati aṭaṭā nirayā evameko ahaho nirayo seyyathāpi
bhikkhu vīsati ahahā nirayā evameko kumudo nirayo seyyathāpi
bhikkhu vīsati kumudā nirayā evameko sogandhiko nirayo seyyathāpi
bhikkhu vīsati sogandhikā nirayā evameko uppalako 2 nirayo
1 Yu. vassasahassassa. 2 Ma. Yu. uppalanirayo.
Seyyathāpi bhikkhu vīsati uppalakā nirayā evameko puṇḍarīko
nirayo seyyathāpi bhikkhu vīsati puṇḍarīkā nirayā evameko
padumo nirayo padumaṁ kho pana bhikkhu nirayaṁ 1 kokāliko bhikkhu
upapanno sārīputtamoggallānesu cittaṁ āghātetvāti.

[605] Idamavoca bhagavā idaṁ vatvāna sugato athāparaṁ
etadavoca satthā
purisassa hi khātassa kudhārī jāyate mukhe
yāya chindati attānaṁ bālo dubbhāsitaṁ bhaṇaṁ
yo nindiyaṁ pasaṁsati taṁ vā nindati yo pasaṁsiyo
vicināti mukhena so kaliṁ kalinā tena sukhaṁ na vindati
appamatto ayaṁ kali yo akkhesu dhanaparājayo
sabbassāpi sahāpi attanā
ayameva mahantataro kali
yo sugatesu manaṁ padosaye.
Sataṁ sahassāna nirabbudānaṁ
chattiṁsati pañca ca abbudāni
yamariye garahī nirayaṁ upeti
vācaṁ manañca paṇidhāya pāpakanti.
Paṭhamo vaggo.
1 Ma. padume pana bhikkhu niraye. Yu. padumake ....
Tassuddānaṁ
āyācanaṁ gāravo brahmadevo
bako ca brahmā aparā ca diṭṭhi
pamādakokālikatissako ca
tudu ca brahmā aparo kokālikoti.
-------------
Dutiyavaggo dutiyo
--------
paṭhamaṁ sanaṅkumārasuttaṁ

[606] Evamme sutaṁ ekaṁ samayaṁ bhagavā rājagahe viharati
sappinītīre. Atha kho brahmā sanaṅkumāro abhikkantāya rattiyā
abhikkantavaṇṇo kevalakappaṁ sappinītīraṁ obhāsetvā yena bhagavā
tenupasaṅkami upasaṅkamitvā bhagavantaṁ abhivādetvā ekamantaṁ
aṭṭhāsi.