[617] Tatra sudaṁ bhikkhave brahmā ca brahmaparisā ca
brahmapārisajjā ca acchariyabbhūtacittajātā ahesuṁ acchariyaṁ vata bho
abbhūtaṁ vata bho samaṇassa mahiddhikatā mahānubhāvatāti. Atha
kho bhikkhave 2 abhibhū bhikkhu sikhiṁ bhagavantaṁ arahantaṁ sammāsambuddhaṁ
etadavoca abhijānāmi khvāhaṁ bhante bhikkhusaṅghassa majjhe
evarūpiṁ vācaṁ bhāsitā pahomi khvāhaṁ āvuso brahmaloke ṭhito
sahassīlokadhātuṁ sarena viññāpetunti. Etassa brāhmaṇa kālo
etassa brāhmaṇa kālo yaṁ tvaṁ brāhmaṇa brahmaloke ṭhito
1 Po. Ma. Yu. pisaddo natthi. 2 Po. Ma. Yu. bhikkhaveti ālapanapadaṁ na dissati.
Sahassīlokadhātuṁ sarena viññāpeyyāsīti. Evaṁ bhanteti kho bhikkhave
abhibhū bhikkhu sikhissa bhagavato arahato sammāsambuddhassa paṭissutvā
brahmaloke ṭhito imā gāthāyo abhāsi
ārabbhatha nikkamatha 1 yuñjatha buddhasāsane
dhunātha maccuno senaṁ naḷāgāraṁva kuñjaro
yo imasmiṁ dhammavinaye appamatto vihessati 2
pahāya jātisaṁsāraṁ dukkhassantaṁ karissatīti.

[618] Atha kho bhikkhave sikhī ca bhagavā arahaṁ sammāsambuddho
abhibhū ca bhikkhu brahmānañca brahmaparisañca brahmapārisajje ca
saṁvejetvā seyyathāpi nāma .pe. Tasmiṁ brahmaloke antarahitā
aruṇavatiyā rājadhāniyā pāturahesuṁ. Atha kho bhikkhave sikhī bhagavā
arahaṁ sammāsambuddho bhikkhū āmantesi assuttha no tumhe
bhikkhave abhibhussa bhikkhuno brahmaloke ṭhitassa gāthāyo bhāsamānassāti.
Assumhā 3 kho mayaṁ bhante abhibhussa bhikkhuno brahmaloke
ṭhitassa gāthāyo bhāsamānassāti. Yathākathaṁ pana tumhe bhikkhave
assuttha abhibhussa bhikkhuno brahmaloke ṭhitassa gāthāyo
bhāsamānassāti. Evaṁ kho mayaṁ bhante assumhā abhibhussa bhikkhuno
brahmaloke ṭhitassa gāthāyo bhāsamānassa
ārabbhatha nikkamatha yuñjatha buddhasāsane
dhunātha maccuno senaṁ naḷāgāraṁva kuñjaro
1 Yu. nikkhamatha. 2 Ma. Yu. vihassati. 3 Ma. Yu. assumha.
Yo imasmiṁ dhammavinaye appamatto vihessati
pahāya jātisaṁsāraṁ dukkhassantaṁ karissatīti
evaṁ kho mayaṁ bhante assumhā abhibhussa bhikkhuno brahmaloke
ṭhitassa gāthāyo bhāsamānassāti.

[619] Sādhu sādhu bhikkhave sādhu kho tumhe bhikkhave assuttha
abhibhussa bhikkhuno brahmaloke ṭhitassa gāthāyo bhāsamānassāti.
Idamavoca bhagavā attamanā te bhikkhū bhagavato bhāsitaṁ abhinandunti.
Pañcamaṁ parinibbānasuttaṁ

[620] Ekaṁ samayaṁ bhagavā kusinārāyaṁ viharati upavattane mallānaṁ
sālavane antarena yamakasālānaṁ parinibbānasamaye. Atha kho bhagavā
bhikkhū āmantesi handadāni bhikkhave āmantayāmi vo vayadhammā
saṅkhārā appamādena sampādethāti ayaṁ tathāgatassa pacchimā
vācāti 1 .

[621] Atha kho bhagavā paṭhamajjhānaṁ samāpajji paṭhamajjhānā
vuṭṭhahitvā dutiyajjhānaṁ samāpajji dutiyajjhānā vuṭṭhahitvā tatiyajjhānaṁ
samāpajji tatiyajjhānā vuṭṭhahitvā catutthajjhānaṁ samāpajji
catutthajjhānā vuṭṭhahitvā ākāsānañcāyatanaṁ samāpajji ākāsānañcāyatanā
vuṭṭhahitvā viññāṇañcāyatanaṁ samāpajji viññāṇañcāyatanā
vuṭṭhahitvā ākiñcaññāyatanaṁ samāpajji ākiñcaññāyatanā
vuṭṭhahitvā nevasaññānāsaññāyatanaṁ samāpajji nevasaññānāsaññāyatanā
1 Po. Ma. Yu. itisaddo natthi.
Vuṭṭhahitvā saññāvedayitanirodhaṁ samāpajji saññāvedayitanirodhā
vuṭṭhahitvā nevasaññānāsaññāyatanaṁ samāpajji
nevasaññānāsaññāyatanā vuṭṭhahitvā ākiñcaññāyatanaṁ samāpajji
ākiñcaññāyatanā vuṭṭhahitvā viññāṇañcāyatanaṁ samāpajji
viññāṇañcāyatanā vuṭṭhahitvā ākāsānañcāyatanaṁ samāpajji
ākāsānañcāyatanā vuṭṭhahitvā catutthajjhānaṁ samāpajji catutthajjhānā
vuṭṭhahitvā tatiyajjhānaṁ samāpajji tatiyajjhānā vuṭṭhahitvā dutiyajjhānaṁ
samāpajji dutiyajjhānā vuṭṭhahitvā paṭhamajjhānaṁ samāpajji paṭhamajjhānā
vuṭṭhahitvā dutiyajjhānaṁ samāpajji dutiyajjhānā vuṭṭhahitvā
tatiyajjhānaṁ samāpajji tatiyajjhānā vuṭṭhahitvā catutthajjhānaṁ
samāpajji catutthajjhānā vuṭṭhahitvā samanantaraṁ bhagavā parinibbāyi.

[622] Parinibbute bhagavati saha parinibbānā brahmā sahampati
imaṁ gāthaṁ abhāsi
sabbeva nikkhipissanti bhūtā loke samussayaṁ
yattha etādiso satthā loke appaṭipuggalo
tathāgato balappatto sambuddho parinibbutoti.

[623] Parinibbute bhagavati saha parinibbānā sakko
devānamindo imaṁ gāthaṁ abhāsi
aniccā vata saṅkhārā uppādavayadhammino
uppajjitvā nirujjhanti tesaṁ vūpasamo sukhoti.

[624] Parinibbute bhagavati saha parinibbānā āyasmā ānando
imaṁ gāthaṁ abhāsi
tadāsi yaṁ bhiṁsanakaṁ tadāsi lomahaṁsanaṁ
sabbākāravarūpete sambuddhe parinibbuteti.

[625] Parinibbute bhagavati saha parinibbānā āyasmā anuruddho
imā gāthāyo abhāsi
nāhu assāsapassāso ṭhitacittassa tādino
anejo santimārabbha cakkhumā parinibbuto 1
asallīnena cittena vedanaṁ ajjhavāsayi
pajjotasseva nibbānaṁ vimokkho cetaso ahūti.
Brahmapañcakaṁ.
Tassuddānaṁ
brahmāsanaṁ devadatto andhakavindo aruṇavatī
parinibbānena ca desitaṁ idaṁ brahmapañcakaṁ 2 .
Brahmasaṁyuttaṁ samattaṁ.
1 dī. mahā. 10/182. mahāparinibbānasutte yaṁ kālamakarī munīti pāṭho dissati.
2 imasmiñca brahmasaṁyuttassante.
tassuddānaṁ
brahmāyācanaṁ gāravañca brahmadevo bako brahmā
Aññataro ca brahmā ca brahmaloko kokālikañca
āḷavikañca tudu ca brahmā kokālikabhikkhu
sanaṅkumārena devadattaṁ andhavindaṁ aruṇavatī
parinibbānena paṇṇarasāti
īdisā pāṭhakkamā dissanti.
----------------
Brāhmaṇasaṁyuttaṁ
arahantavaggo paṭhamo
----------
paṭhamaṁ dhanañjānīsuttaṁ

[626] Evamme sutaṁ ekaṁ samayaṁ bhagavā rājagahe viharati
veḷuvane kalandakanivāpe. Tena kho pana samayena aññatarassa
bhāradvājagottassa brāhmaṇassa dhanañjānī nāma brāhmaṇī
abhippasannā hoti buddhe ca dhamme ca saṅghe ca.