[637] Evaṁ vutte asurindakabhāradvājo brāhmaṇo bhagavantaṁ
etadavoca abhikkantaṁ bho gotama abhikkantaṁ bho gotama .pe.
Abbhaññāsi. Aññataro ca panāyasmā bhāradvājo arahataṁ
ahosīti.
Catutthaṁ bilaṅgikasuttaṁ

[638] Ekaṁ samayaṁ bhagavā rājagahe viharati veḷuvane kalandakanivāpe.
Assosi kho bilaṅgikabhāradvājo brāhmaṇo bhāradvājagotto
kira brāhmaṇo samaṇassa gotamassa santike agārasmā
anagāriyaṁ pabbajitoti kupito anattamano yena bhagavā tenupasaṅkami
upasaṅkamitvā tuṇhībhūto ekamantaṁ aṭṭhāsi.

[639] Atha kho bhagavā bilaṅgikabhāradvājassa brāhmaṇassa
cetasā cetoparivitakkamaññāya bilaṅgikabhāradvājaṁ brāhmaṇaṁ gāthāya
Ajjhabhāsi
yo appaduṭṭhassa narassa dussati
suddhassa posassa anaṅgaṇassa
tameva bālaṁ pacceti pāpaṁ
sukhumo rajo paṭivātaṁva khittoti.

[640] Evaṁ vutte bilaṅgikabhāradvājo brāhmaṇo bhagavantaṁ
etadavoca abhikkantaṁ bho gotama abhikkantaṁ bho gotama .pe.
Esāhaṁ bhavantaṁ gotamaṁ saraṇaṁ gacchāmi dhammañca bhikkhusaṅghañca
labheyyāhaṁ bhoto gotamassa santike pabbajjaṁ .pe. Tadanuttaraṁ
brahmacariyapariyosānaṁ diṭṭheva dhamme sayaṁ abhiññā sacchikatvā
upasampajja vihāsi khīṇā jāti vusitaṁ brahmacariyaṁ kataṁ karaṇīyaṁ
nāparaṁ itthattāyāti abbhaññāsi. Aññataro ca panāyasmā
bhāradvājo arahataṁ ahosīti.
Pañcamaṁ ahiṁsakasuttaṁ

[641] Sāvatthīnidānaṁ. Atha kho ahiṁsakabhāradvājo brāhmaṇo
yena bhagavā tenupasaṅkami upasaṅkamitvā bhagavatā saddhiṁ sammodi
sammodanīyaṁ kathaṁ sārāṇīyaṁ vītisāretvā ekamantaṁ nisīdi. Ekamantaṁ
nisinno kho ahiṁsakabhāradvājo brāhmaṇo bhagavantaṁ etadavoca
ahiṁsakāhaṁ 1 bho gotama ahiṁsakāhaṁ bho gotamāti.
1 Po. ahiṁsako khvāhaṁ.

[642] Yathā nāmaṁ tathā cassa siyā kho tvaṁ ahiṁsako
yo ca kāyena vācāya manasā ca na hiṁsati
sace ahiṁsako hoti yo paraṁ na vihiṁsatīti.

[643] Evaṁ vutte ahiṁsakabhāradvājo brāhmaṇo bhagavantaṁ
etadavoca abhikkantaṁ bho gotama .pe. Abbhaññāsi.
Aññataro ca panāyasmā bhāradvājo arahataṁ ahosīti.
Chaṭṭhaṁ jaṭāsuttaṁ

[644] Sāvatthīnidānaṁ. Atha kho jaṭābhāradvājo brāhmaṇo
yena bhagavā tenupasaṅkami upasaṅkamitvā bhagavatā saddhiṁ sammodi
sammodanīyaṁ kathaṁ sārāṇīyaṁ vītisāretvā ekamantaṁ nisīdi.

[645] Ekamantaṁ nisinno kho jaṭābhāradvājo brāhmaṇo
bhagavantaṁ gāthāya ajjhabhāsi
anto jaṭā bahi jaṭā jaṭāya jaṭitā pajā
taṁ taṁ gotama pucchāmi ko imaṁ vijaṭaye jaṭanti.

[646] Sīle patiṭṭhāya naro sapañño cittaṁ paññañca bhāvayaṁ
ātāpī nipako bhikkhu so imaṁ vijaṭaye jaṭaṁ
yesaṁ rāgo ca doso ca avijjā ca virājitā
khīṇāsavā arahanto tesaṁ vijaṭitā jaṭā
yattha nāmañca rūpañca asesaṁ uparujjhati
paṭigharūpasaññā ca etthesā chijjate jaṭāti.