[577] Atha kho āyasmato mahākappinassa etadahosi kahaṁ
nu kho bhagavā etarahi viharatīti. Atha [1]- kho āyasmā mahākappino
bhagavantaṁ dibbena cakkhunā .pe. Tejodhātuṁ samāpannaṁ disvāna
seyyathāpi nāma balavā puriso .pe. Evameva jetavane antarahito
tasmiṁ brahmaloke pāturahosi. Atha kho āyasmā mahākappino
pacchimaṁ disaṁ nissāya tassa brahmuno uparivehāsaṁ pallaṅkena nisīdi
tejodhātuṁ samāpajjitvā nīcatarakaṁ bhagavato.

[578] Atha kho āyasmato anuruddhassa etadahosi kahaṁ nu
kho bhagavā etarahi viharatīti. Addasā kho āyasmā anuruddho
.pe. Tejodhātuṁ samāpannaṁ disvāna seyyathāpi nāma balavā
puriso .pe. Tasmiṁ brahmaloke pāturahosi. Atha kho āyasmā
anuruddho uttaraṁ disaṁ nissāya tassa brahmuno uparivehāsaṁ pallaṅkena
nisīdi tejodhātuṁ samāpajjitvā nīcatarakaṁ bhagavato.

[579] Atha kho āyasmā mahāmoggallāno [2]- brahmānaṁ
gāthāya ajjhabhāsi
ajjāpi te āvuso sā diṭṭhi yā te diṭṭhi pure ahu
passasi vītivattantaṁ brahmaloke parāyananti. 3

[580] Na me mārisa sā diṭṭhi yā me diṭṭhi pure ahu
passāmi vītivattantaṁ brahmaloke parāyanaṁ 4
svāhaṁ ajja kathaṁ vajjaṁ ahaṁ niccomhi sassatoti.
1-2 Ma. Yu. etthantare taṁ iti dissati. 3-4 Ma. Yu. pabhassaranti.

[581] Atha kho bhagavā taṁ brahmānaṁ saṁvejetvā seyyathāpi
nāma balavā puriso sammiñjitaṁ vā bāhaṁ pasāreyya pasāritaṁ
vā bāhaṁ sammiñjeyya evameva tasmiṁ brahmaloke antarahito
jetavane pāturahosi. Atha kho so brahmā aññataraṁ brahmapārisajjaṁ
āmantesi ehi tvaṁ mārisa yenāyasmā mahāmoggallāno
tenupasaṅkama upasaṅkamitvā āyasmantaṁ mahāmoggallānaṁ evaṁ vadehi
atthi nu kho mārisa moggallāna aññepi tassa bhagavato sāvakā
evaṁmahiddhikā evaṁmahānubhāvā seyyathāpi nāma 1 bhavaṁ moggallāno
kassapo kappino anuruddhoti. Evaṁ mārisāti kho so brahmapārisajjo
tassa brahmuno paṭissuṇitvā 2 seyyathāpi nāma balavā
puriso .pe. Evameva tasmiṁ brahmaloke antarahito āyasmato
mahāmoggallānassa purato pāturahosi.

[582] Atha kho so brahmapārisajjo āyasmantaṁ mahāmoggallānaṁ
abhivādetvā ekamantaṁ aṭṭhāsi. Ekamantaṁ ṭhito so
brahmapārisajjo āyasmantaṁ mahāmoggallānaṁ etadavoca atthi nu
mārisa .pe. Anuruddhoti.

[583] Atha kho āyasmā mahāmoggallāno [3]- brahmapārisajjaṁ
gāthāya ajjhabhāsi
tevijjā iddhipattā ca cetopariyāyakovidā
khīṇāsavā arahanto bahū buddhassa sāvakāti.
1 Po. Ma. Yu. nāmasaddo natthi. 2 Ma. Yu. paṭissutvā. 3 Ma. Yu. etthantare
taṁ iti dissati.

[584] Atha kho so brahmapārisajjo āyasmato
mahāmoggallānassa bhāsitaṁ abhinanditvā anumoditvā yena so brahmā
tenupasaṅkami upasaṅkamitvā taṁ brahmānaṁ etadavoca āyasmā
mārisa mahāmoggallāno evamāha
tevijjā iddhipattā ca cetopariyāyakovidā
khīṇāsavā arahanto bahū buddhassa sāvakāti.

[585] Idamavoca so brahmapārisajjo attamano ca so
brahmā tassa brahmapārisajjassa bhāsitaṁ abhinandīti.
Chaṭṭhaṁ pamādasuttaṁ

[586] Sāvatthīnidānaṁ. Tena kho pana samayena bhagavā
divāvihāragato hoti paṭisallīno. Atha kho subrahmā ca paccekabrahmā
suddhāvāso ca paccekabrahmā yena bhagavā tenupasaṅkamiṁsu
upasaṅkamitvā paccekaṁ dvārabāhaṁ upanissāya aṭṭhaṁsu. Atha kho
subrahmā paccekabrahmā suddhāvāsaṁ paccekabrahmānaṁ etadavoca
akālo kho tāva mārisa bhagavantaṁ payirupāsituṁ divāvihāragato
bhagavā paṭisallīno ca amu 1 ca brahmaloko iddho ceva phīto ca
brahmā ca tattha pamādavihāraṁ viharati āyāma mārisa yena
so brahmaloko tenupasaṅkamissāma upasaṅkamitvā taṁ brahmānaṁ
saṁvejeyyāmāti. Evaṁ mārisāti kho suddhāvāso paccekabrahmā
subrahmuno paccekabrahmuno paccassosi. Atha kho subrahmā
1 Ma. Yu. asuko.
Paccekabrahmā suddhāvāso ca paccekabrahmā seyyathāpi nāma
balavā puriso .pe. Evameva bhagavato purato antarahitā tasmiṁ
brahmaloke pāturahesuṁ. Addasā kho so brahmā te brahmāno
dūratova āgacchante disvāna te brahmāno etadavoca handa
kuto nu tumhe mārisā āgacchathāti. Atha 1 kho mayaṁ mārisa
āgacchāma tassa bhagavato arahato sammāsambuddhassa santikā
gacchasi 2 pana tvaṁ mārisa tassa bhagavato upaṭṭhānaṁ arahato
sammāsambuddhassāti.