[547] Kiṁ nu uddissa muṇḍāsi samaṇī viya dissasi
na ca rocesi pāsaṇḍaṁ kimidaṁ 1 carasi momuhāti.

[548] Ito bahiddhā pāsaṇḍā diṭṭhīsu saṁsidanti 2 te
na tesaṁ dhammaṁ rocemi na te dhammassa kovidā
atthi sakyakule jāto buddho appaṭipuggalo
sabbābhibhū māranudo sabbattha maparājito
sabbattha mutto assito sabbaṁ passati cakkhumā
sabbakammakkhayaṁ patto vimutto upadhisaṅkhaye
so mayhaṁ bhagavā satthā tassa rocemi sāsananti.
Atha kho māro pāpimā jānāti maṁ sīsupacālā bhikkhunīti dukkhī
dummano tatthevantaradhāyīti.
Navamaṁ selāsuttaṁ

[549] Sāvatthiyaṁ ... Atha kho selā bhikkhunī pubbaṇhasamayaṁ
nivāsetvā .pe. Aññatarasmiṁ rukkhamūle divāvihāraṁ nisīdi.

[550] Atha kho māro pāpimā selāya bhikkhuniyā bhayaṁ .pe.
1 Po. Ma. Yu. kimiva. 2 Ma. Yu. pasīdanti te - ye.
Selaṁ bhikkhuniṁ gāthāya ajjhabhāsi
kenidaṁ pakataṁ bimbaṁ kvaci 1 bimbassa kārako
kvaci 2 3 bimbaṁ samuppannaṁ kvaci 4 bimbaṁ nirujjhatīti.

[551] Atha kho selāya bhikkhuniyā etadahosi ko nu khvāyaṁ
manusso vā amanusso vā gāthaṁ bhāsatīti. Atha kho selāya
bhikkhuniyā etadahosi māro kho ayaṁ pāpimā mama bhayaṁ chambhitattaṁ
lomahaṁsaṁ uppādetukāmo samādhimhā cāvetukāmo gāthaṁ bhāsatīti.
Atha kho selā bhikkhunī māro ayaṁ pāpimā iti viditvā māraṁ
pāpimantaṁ gāthāhi ajjhabhāsi
nayidaṁ pakataṁ 5 bimbaṁ nayidaṁ pakataṁ 6 aghaṁ
hetuṁ paṭicca sambhūtaṁ hetubhaṅgā nirujjhati
yathāpi aññataraṁ bījaṁ khette vuttaṁ virūhati
paṭhavīrasañca āgamma sinehañca tadūbhayaṁ
evaṁ khandhā ca dhātuyo cha ca āyatanā ime
hetuṁ paṭicca sambhūtā hetubhaṅgā nirujjhareti.
Atha kho māro pāpimā jānāti maṁ selā bhikkhunīti dukkhī
dummano tatthevantaradhāyīti.
Dasamaṁ vajirāsuttaṁ

[552] Evamme sutaṁ ekaṁ samayaṁ bhagavā sāvatthiyaṁ viharati
jetavane anāthapiṇḍikassa ārāme. Atha kho vajirā bhikkhunī
1-2-4 Ma. Yu. kvanu. 3 Yu. kvañca. 4 Ma. Yu. attakataṁ. 6 Po. Ma. Yu. parakataṁ.
Pubbaṇhasamayaṁ nivāsetvā pattacīvaramādāya sāvatthiṁ piṇḍāya pāvisi
sāvatthiyaṁ piṇḍāya caritvā pacchābhattaṁ piṇḍapātapaṭikkantā yena
andhavanaṁ tenupasaṅkami divāvihārāya andhavanaṁ ajjhogahetvā
aññatarasmiṁ rukkhamūle divāvihāraṁ nisīdi.

[553] Atha kho māro pāpimā vajirāya bhikkhuniyā bhayaṁ chambhitattaṁ
lomahaṁsaṁ uppādetukāmo samādhimhā cāvetukāmo yena vajirā bhikkhunī
tenupasaṅkami upasaṅkamitvā vajiraṁ bhikkhuniṁ gāthāya ajjhabhāsi
kenāyaṁ pakato satto kvaci 1 sattassa kārako
kvaci 2 satto samuppanno kvaci 3 satto nirujjhatīti.

[554] Atha kho vajirāya bhikkhuniyā etadahosi ko nu khvāyaṁ
manusso vā amanusso vā gāthaṁ bhāsatīti. Atha kho vajirāya
bhikkhuniyā etadahosi māro kho ayaṁ pāpimā mama bhayaṁ chambhitattaṁ
lomahaṁsaṁ uppādetukāmo samādhimhā cāvetukāmo gāthaṁ bhāsatīti.
Atha kho vajirā bhikkhunī māro ayaṁ pāpimā iti viditvā māraṁ
pāpimantaṁ gāthāhi ajjhabhāsi
kiṁ nu sattoti pacceti 4 māra diṭṭhigataṁ nu te
suddhasaṅkhārapuñjo yaṁ nayidha sattupalabbhati
yathā hi aṅgasambhārā hoti saddo ratho iti
evaṁ khandhesu santesu hoti sattoti sammati 5
1-2-3 Po. Ma. Yu. kuvaṁ. 4 Po. Ma. Yu. paccesi. 5 Ma. Yu. sammuti.
Dukkhameva hi sambhoti dukkhaṁ tiṭṭhati veti ca
nāññatra dukkhā sambhoti nāññatra dukkhā nirujjhatīti.
Atha kho māro pāpimā jānāti maṁ vajirā bhikkhunīti dukkhī
dummano tatthevantaradhāyīti.
Bhikkhunīsaṁyuttaṁ samattaṁ.
Tassuddānaṁ
āḷavikā ca somā ca gotamī vijayā saha
uppalavaṇṇā ca cālā ca upacālā sīsupacālā
selā vajirāya te dasāti.
---------------
Brahmasaṁyuttaṁ
paṭhamavaggo paṭhamo
---------
paṭhamaṁ āyācanasuttaṁ

[555] Evamme sutaṁ ekaṁ samayaṁ bhagavā uruvelāyaṁ viharati
najjā nerañjarāya tīre ajapālanigrodhe paṭhamābhisambuddho.
Atha kho bhagavato rahogatassa paṭisallīnassa evaṁ cetaso parivitakko
udapādi adhigato kho myāyaṁ dhammo gambhīro duddaso duranubodho
santo paṇīto atakkāvacaro nipuṇo paṇḍitavedanīyo ālayarāmā
kho panāyaṁ pajā ālayaratā ālayasamuditā ālayarāmāya kho
pana pajāya ālayaratāya ālayasamuditāya duddasaṁ idaṁ ṭhānaṁ yadidaṁ
idappaccayatā paṭiccasamuppādo idampi kho ṭhānaṁ duddasaṁ yadidaṁ
sabbasaṅkhārasamatho sabbūpadhipaṭinissaggo taṇhakkhayo virāgo nirodho
nibbānaṁ ahañceva kho pana dhammaṁ deseyyaṁ pare ca me na
ājāneyyuṁ so mamassa kilamatho sā mamassa vihesāti. Apissudaṁ 1
bhagavantaṁ imā anacchariyā gāthāyo paṭibhaṁsu pubbe assutapubbā
kicchena me adhigataṁ halandāni pakāsituṁ
rāgadosaparetehi nāyaṁ dhammo susambudho
1 Ma. apissu.
Paṭisotagāmiṁ nipuṇaṁ gambhīraṁ duddasaṁ aṇuṁ
rāgaratā na dakkhanti tamokkhandhena āvutāti 1 .
Iti 2 bhagavato paṭisañcikkhato appossukkatāya cittaṁ namati no
dhammadesanāyāti.

[556] Atha kho brahmuno sahampatissa bhagavato cetasā
cetoparivitakkamaññāya etadahosi nassati vata bho loko vinassati vata
bho loko yatra hi nāma tathāgatassa arahato sammāsambuddhassa
appossukkatāya cittaṁ namati no dhammadesanāyāti. Atha kho
brahmā sahampati seyyathāpi nāma balavā puriso sammiñjitaṁ vā
bāhaṁ pasāreyya pasāritaṁ vā bāhaṁ sammiñjeyya evameva
brahmaloke antarahito bhagavato purato pāturahosi. Atha kho
brahmā sahampati ekaṁsaṁ uttarāsaṅgaṁ karitvā dakkhiṇajānumaṇḍalaṁ
paṭhaviyaṁ nihantvā yena bhagavā tenañjaliṁ paṇāmetvā bhagavantaṁ
etadavoca desetu bhante bhagavā dhammaṁ desetu sugato dhammaṁ
santi sattā apparajakkhajātikā assavanatā dhammassa parihāyanti
bhavissanti dhammassa aññātāroti. Idamavoca brahmā sahampati
idaṁ vatvā athāparaṁ etadavoca
pāturahosi magadhesu pubbe
dhammo asuddho samalehi cintito
apāpuretaṁ 3 amatassa dvāraṁ
1 Ma. āvuṭā. 2 Ma. itiha. 3 Yu. avāpuretaṁ.
Suṇantu dhammaṁ vimalenānubuddhaṁ
sele yathā pabbatamuddhaniṭṭhito
yathāpi passe janataṁ samantato
tathūpamaṁ dhammamayaṁ sumedhaso 1
pāsādamāruyha samantacakkhu
sokāvatiṇṇaṁ janatamapetasoko
avekkhassu jātijarābhibhūtanti 2 .
Uṭṭhehi vīra vijitasaṅgāma
satthavāha anaṇa vicara loke
desetu 3 bhagavā dhammaṁ aññātāro bhavissantīti.