[527] Atha kho somāya bhikkhuniyā etadahosi ko nu kho ayaṁ
manusso vā amanusso vā gāthaṁ bhāsatīti. Atha kho somāya
1 Po. Ma. ajjhogāhetuvā.
Bhikkhuniyā etadahosi māro kho ayaṁ pāpimā mama bhayaṁ chambhitattaṁ
lomahaṁsaṁ uppādetukāmo samādhimhā cāvetukāmo gāthaṁ bhāsatīti.
Atha kho somā bhikkhunī māro ayaṁ pāpimā iti viditvā māraṁ
pāpimantaṁ gāthāhi ajjhabhāsi
itthībhāvo kiṁ kayirā cittamhi susamāhite
ñāṇamhi vattamānamhi sammā dhammaṁ vipassato
yassa nūna siyā evaṁ itthīhaṁ purisoti vā
kiñci vā pana asmīti taṁ māro vattumarahatīti.
Atha kho māro pāpimā jānāti maṁ somā bhikkhunīti dukkhī dummano
tatthevantaradhāyīti.
Tatiyaṁ gotamīsuttaṁ

[528] Sāvatthīnidānaṁ. Atha kho kisāgotamī bhikkhunī pubbaṇhasamayaṁ
nivāsetvā pattacīvaramādāya sāvatthiṁ piṇḍāya pāvisi sāvatthiyaṁ
piṇḍāya caritvā pacchābhattaṁ piṇḍapātapaṭikkantā yena andhavanaṁ
tenupasaṅkami divāvihārāya andhavanaṁ ajjhogahetvā aññatarasmiṁ
rukkhamūle divāvihāraṁ nisīdi.

[529] Atha kho māro pāpimā kisāgotamiyā bhikkhuniyā bhayaṁ
chambhitattaṁ lomahaṁsaṁ uppādetukāmo samādhimhā cāvetukāmo yena
kisāgotamī bhikkhunī tenupasaṅkami upasaṅkamitvā kisāgotamiṁ bhikkhuniṁ
gāthāya ajjhabhāsi
Kiṁ nu tvaṁ hataputtāva ekamāsī rudammukhī
vanamajjhagatā ekā purisaṁ nu gavesasīti.

[530] Atha kho kisāgotamiyā bhikkhuniyā etadahosi ko nu
kho ayaṁ manusso vā amanusso vā gāthaṁ bhāsatīti. Atha kho
kisāgotamiyā bhikkhuniyā etadahosi māro kho ayaṁ pāpimā mama
bhayaṁ chambhitattaṁ lomahaṁsaṁ uppādetukāmo samādhimhā cāvetukāmo
gāthaṁ bhāsatīti. Atha kho kisāgotamī bhikkhunī māro kho ayaṁ
pāpimā iti viditvā māraṁ pāpimantaṁ gāthāhi ajjhabhāsi
accantaṁ hataputtamhi purisā etadantikā
na socāmi na rodāmi na taṁ bhāyāmi āvuso
sabbattha vihitā 1 nandi tamokkhandho padālito
jetvāna maccuno senaṁ viharāmi anāsavāti.
Atha kho māro pāpimā jānāti maṁ kisāgotamī bhikkhunīti dukkhī
dummano tatthevantaradhāyīti.
Catutthaṁ vijayāsuttaṁ

[531] Sāvatthīnidānaṁ. Atha kho vijayā bhikkhunī pubbaṇhasamayaṁ
nivāsetvā .pe. Aññatarasmiṁ rukkhamūle divāvihāraṁ nisīdi.

[532] Atha kho māro pāpimā vijayāya bhikkhuniyā bhayaṁ .pe.
Samādhimhā cāvetukāmo yena vijayā bhikkhunī tenupasaṅkami
upasaṅkamitvā vijayaṁ bhikkhuniṁ gāthāya ajjhabhāsi
1 Po. Ma. Yu. vihatā.
Daharā tvaṁ rūpavatī ahañca daharo susu
pañcaṅgikena turiyena ehayyebhiramāmhaseti.

[533] Atha kho vijayāya bhikkhuniyā etadahosi ko nu kho
ayaṁ manusso vā amanusso vā gāthaṁ bhāsatīti. Atha kho vijayāya
bhikkhuniyā etadahosi māro kho ayaṁ pāpimā .pe. Gāthaṁ
bhāsatīti. Atha kho vijayā bhikkhunī māro ayaṁ pāpimā iti
viditvā māraṁ pāpimantaṁ gāthāhi ajjhabhāsi
rūpā saddā gandhā rasā phoṭṭhabbā ca manoramā
niyyātayāmi tuyheva māra na 1 hi tena atthikā
iminā pūtikāyena bhindanena pabhaṅgunā
aṭṭiyāmi harāyāmi kāmataṇhā samūhatā
ye ca rūpūpagā sattā ye ca arūpabhāgino 2
yā ca santā samāpatti sabbattha vihato tamoti.
Atha kho māro pāpimā jānāti maṁ vijayā bhikkhunīti dukkhī dummano
tatthevantaradhāyīti.
Pañcamaṁ uppalavaṇṇāsuttaṁ

[534] Sāvatthīnidānaṁ. Atha kho uppalavaṇṇā bhikkhunī
pubbaṇhasamayaṁ nivāsetvā .pe. Aññatarasmiṁ supupphitasālarukkhamūle
aṭṭhāsi.
1 Ma. nāhaṁ. 2 Ma. Yu. āruppaṭṭhāyino.

[535] Atha kho māro pāpimā uppalavaṇṇāya bhikkhuniyā bhayaṁ
chambhitattaṁ lomahaṁsaṁ uppādetukāmo samādhimhā cāvetukāmo yena
uppalavaṇṇā bhikkhunī tenupasaṅkami upasaṅkamitvā uppalavaṇṇaṁ
bhikkhuniṁ gāthāya ajjhabhāsi
supupphitaggaṁ upagamma bhikkhuni
ekā tuvaṁ tiṭṭhasi sālamūle
na catthi te dutiyā vaṇṇadhātu
idhāgatā tādisikā bhaveyyuṁ
bālena tvaṁ bhāyasi dhuttakānanti.

[536] Atha kho uppalavaṇṇāya bhikkhuniyā etadahosi ko
nu khvāyaṁ manusso vā amanusso vā gāthaṁ bhāsatīti. Atha kho
uppalavaṇṇāya bhikkhuniyā etadahosi māro kho ayaṁ pāpimā
mama bhayaṁ .pe. Gāthaṁ bhāsatīti. Atha kho uppalavaṇṇā bhikkhunī
māro ayaṁ pāpimā iti viditvā māraṁ pāpimantaṁ gāthāhi ajjhabhāsi
sataṁ sahassānipi dhuttakānaṁ
idhāgatā tādisikā bhaveyyuṁ
lomaṁ na iñjāmi na santasāmi
māra na bhāyāmi tamekikāpi
esā antaradhāyāmi kucchiṁ vā pavisāmi te
pakhumantarikāyampi tiṭṭhanti maṁ na dakkhasi
Cittasmiṁ vasibhūtamhi iddhipādā subhāvitā
sabbabandhanamuttomhi 1 na taṁ bhāyāmi āvusoti.
Atha kho māro pāpimā jānāti maṁ uppalavaṇṇā bhikkhunīti
dukkhī dummano tatthevantaradhāyīti.
Chaṭṭhaṁ cālāsuttaṁ