[507] Atha kho taṇhā ca aratī ca rāgā ca māradhītaro
yena bhagavā tenupasaṅkamiṁsu upasaṅkamitvā bhagavantaṁ etadavocuṁ
pāde te samaṇa paricāremāti. Atha kho bhagavā na manasākāsi
yathātaṁ anuttare upadhisaṅkhaye vimutto.

[508] Atha kho taṇhā ca aratī ca rāgā ca māradhītaro
ekamantaṁ apakkamma evaṁ samacintesuṁ uccāvacā kho purisānaṁ
adhippāyā yannūna mayaṁ ekasataekasataṁ kumārīvaṇṇasataṁ abhinimmineyyāmāti.
Atha kho taṇhā ca aratī ca rāgā ca māradhītaro
ekasataekasataṁ kumārīvaṇṇasataṁ abhinimminitvā yena bhagavā
tenupasaṅkamiṁsu upasaṅkamitvā bhagavantaṁ etadavocuṁ pāde te samaṇa
paricāremāti. Tampi bhagavā na manasākāsi yathātaṁ anuttare
upadhisaṅkhaye vimutto.

[509] Atha kho taṇhā ca aratī ca rāgā ca māradhītaro
ekamantaṁ apakkamma evaṁ samacintesuṁ uccāvacā kho purisānaṁ
Adhippāyā yannūna mayaṁ ekasataekasataṁ avijātavaṇṇasataṁ abhinimmineyyāmāti.
Atha kho taṇhā ca aratī ca rāgā ca māradhītaro
ekasataekasataṁ avijātavaṇṇasataṁ abhinimminitvā yena bhagavā
tenupasaṅkamiṁsu upasaṅkamitvā bhagavantaṁ etadavocuṁ pāde te samaṇa
paricāremāti. Tampi bhagavā na manasākāsi yathātaṁ anuttare
upadhisaṅkhaye vimutto.

[510] Atha kho taṇhā ca aratī ca rāgā ca māradhītaro
ekamantaṁ apakkamma evaṁ samacintesuṁ uccāvacā kho purisānaṁ
adhippāyā yannūna mayaṁ ekasataekasataṁ sakiṁ vijātavaṇṇasataṁ
abhinimmineyyāmāti. Atha kho taṇhā ca .pe. Sakiṁ vijātavaṇṇasataṁ
abhinimminitvā yena bhagavā .pe. Yathātaṁ anuttare upadhisaṅkhaye
vimutto.

[511] Atha kho taṇhā ca .pe. Duvijātavaṇṇasataṁ
abhinimminitvā yena bhagavā .pe. Yathātaṁ anuttare upadhisaṅkhaye
vimutto.

[512] Atha kho taṇhā ca .pe. Majjhimitthīvaṇṇasataṁ
abhinimmineyyāmāti. Atha kho taṇhā ca .pe. Majjhimitthīvaṇṇasataṁ
abhinimminitvā yena bhagavā .pe. Yathātaṁ anuttare
upadhisaṅkhaye vimutto.

[513] Atha kho taṇhā ca .pe. Mahitthīvaṇṇasataṁ abhinimmineyyāmāti.
Atha kho taṇhā ca .pe. Mahitthīvaṇṇasataṁ abhinimminitvā
yena bhagavā .pe. Yathātaṁ anuttare upadhisaṅkhaye vimutto.

[514] Atha kho taṇhā ca aratī ca rāgā ca māradhītaro
ekamantaṁ apakkamma etadavocuṁ saccaṁ kira no pitā avoca
arahaṁ sugato loke na rāgena suvānayo
māradheyyaṁ atikkanto tasmā socāmahaṁ bhusanti.
Yañhi mayaṁ samaṇaṁ vā brāhmaṇaṁ vā avītarāgaṁ iminā upakkamena
upakkameyyāma hadayaṁ vāssa phaleyya uṇhaṁ vā lohitaṁ mukhato
uggaccheyya ummādaṁ vā pāpuṇeyya cittavikkhepaṁ 1 vā seyyathāpi
pana naḷo harito luto ussussati visussati milāyati evameva
ussusseyya visusseyya milāyeyyāti. Atha kho taṇhā ca
aratī ca rāgā ca māradhītaro yena bhagavā tenupasaṅkamiṁsu
upasaṅkamitvā ekamantaṁ aṭṭhaṁsu.

[515] Ekamantaṁ ṭhitā kho taṇhā māradhītā bhagavantaṁ gāthāya
ajjhabhāsi
sokāvatiṇṇo nu vanasmiṁ jhāyasi
vittaṁ nu jinno uda patthayāno
āgunnu gāmasmimakāsi kiñci
kasmā janena karosi sakkhiṁ
sakkhī na sampajjati kenaci teti.
1 Po. Ma. cittakkhepaṁ.

[516] Atthassa pattiṁ hadayassa santiṁ
jetvāna senaṁ piyasātarūpaṁ
ekāhaṁ jhāyaṁ sukhamānubodhyaṁ
tasmā janena na karomi sakkhiṁ
sakkhī na sampajjati kenaci meti.