[517] Atha kho aratī māradhītā bhagavantaṁ gāthāya ajjhabhāsi
kathaṁvihārībahulodha bhikkhu
pañcoghatiṇṇo atarīdha chaṭṭhaṁ
kathaṁ jhāyaṁ 1 bahulaṁ kāmasaññā
paribāhirā honti aladdhayo tanti.

[518] Passaddhakāyo suvimuttacitto
asaṅkharāno satimā anoko
aññāya dhammaṁ avitakkajhāyī
na kuppati na sarati na thino
evaṁvihārībahulodha bhikkhu
pañcoghatiṇṇo atarīdha chaṭṭhaṁ
evaṁ jhāyaṁ bahulaṁ kāmasaññā
paribāhirā honti aladdhayo tanti.

[519] Atha kho rāgā māradhītā bhagavantaṁ gāthāya ajjhabhāsi
1 Ma. Yu. jhāyiṁ.
Acchejja taṇhaṁ taṇasaṅghavārī 1
addhā carissanti 2 bahū ca saddhā
bahuṁ vatāyaṁ janataṁ anoko
acchejja 3 nessati maccurājassa pāranti.

[520] Nayanti ve mahāvīrā saddhammena tathāgatā
dhammena nayamānānaṁ kā ussuyā 4 vijānatanti.

[521] Atha kho taṇhā ca aratī ca rāgā ca māradhītaro
yena māro pāpimā tenupasaṅkamiṁsu. Addasā kho māro pāpimā
taṇhañca aratiñca rāgañca māradhītaro dūratova āgacchantiyo
disvāna gāthāhi ajjhabhāsi
bālā kumudanāḷehi pabbataṁ abhimatthatha
giriṁ nakhena khanatha ayodantebhi khādatha
selaṁva sirasi ohacca pātāle gādhamesatha
khāṇuṁva urasāsajja nibbijjāpetha gotamanti.
Daddalhamānā 5 āgañchuṁ taṇhā ca aratī rāgā
tā tattha panudī satthā tulaṁ bhaṭṭhaṁva mālutoti 6 .
Tatiyo vaggo.
1 Ma. gaṇasaṅghacārī. 2 Sī. tarissanti. 3 Yu. acchijja. 4 Ma. Yu. usūyā.
5 Ma. Yu. daddallamānāti dissati. 6 Sī. Yu. māruto.
Tassuddānaṁ bhavati
sambahulā samiddhi ca godhikasattavassāni
dhītaraṁ desitaṁ buddha seṭṭhena imaṁ mārapañcakanti.
Mārasaṁyuttaṁ samattaṁ.
-------
Bhikkhunīsaṁyuttaṁ
---
paṭhamaṁ āḷavikāsuttaṁ

[522] Evamme sutaṁ ekaṁ samayaṁ bhagavā sātthiyaṁ viharati
jetavane anāthapiṇḍikassa ārāme. Atha kho āḷavikā bhikkhunī
pubbaṇhasamayaṁ nivāsetvā pattacīvaramādāya sāvatthiṁ piṇḍāya
pāvisi sāvatthiyaṁ piṇḍāya caritvā pacchābhattaṁ piṇḍapātapaṭikkantā
yena andhavanaṁ tenupasaṅkami vivekatthikinī 1 .

[523] Atha kho māro pāpimā āḷavikāya bhikkhuniyā bhayaṁ
chambhitattaṁ lomahaṁsaṁ uppādetukāmo vivekamhā cāvetukāmo yena
āḷavikā bhikkhunī tenupasaṅkami upasaṅkamitvā āḷavikaṁ bhikkhuniṁ
gāthāya ajjhabhāsi
natthi nissaraṇaṁ loke kiṁ vivekena kāhasi
bhuñjassu kāmaratiyo māhu pacchānutāpinīti.

[524] Atha kho āḷavikāya bhikkhuniyā etadahosi ko nu kho
ayaṁ manusso vā amanusso vā gāthaṁ bhāsatīti. Atha kho āḷavikāya
bhikkhuniyā etadahosi māro kho ayaṁ pāpimā mama bhayaṁ chambhitattaṁ
lomahaṁsaṁ uppādetukāmo vivekamhā cāvetukāmo gāthaṁ bhāsatīti.
Atha kho āḷavikā bhikkhunī māro ayaṁ pāpimā iti viditvā māraṁ
1 Ma. vivekatthinī.
Pāpimantaṁ gāthāhi ajjhabhāsi
atthi nissaraṇaṁ loke paññāya me suphussitaṁ
pamattabandhu pāpima na tvaṁ jānāsi taṁ padaṁ
sattisūlūpamā kāmā khandhāsaṁ adhikuṭṭhanā
yaṁ tvaṁ kāmaratiṁ brūsi arati mayha sā ahūti.
Atha kho māro pāpimā jānāti maṁ āḷavikā bhikkhunīti dukkhī
dummano tatthevantaradhāyīti.
Dutiyaṁ somāsuttaṁ

[525] Sāvatthīnidānaṁ. Atha kho somā bhikkhunī pubbaṇhasamayaṁ
nivāsetvā pattacīvaramādāya sāvatthiṁ piṇḍāya pāvisi sāvatthiyaṁ
piṇḍāya caritvā pacchābhattaṁ piṇḍapātapaṭikkantā yena andhavanaṁ
tenupasaṅkami divāvihārāya andhavanaṁ ajjhogahetvā 1 aññatarasmiṁ
rukkhamūle divāvihāraṁ nisīdi.

[526] Atha kho māro pāpimā somāya bhikkhuniyā bhayaṁ chambhitattaṁ
lomahaṁsaṁ uppādetukāmo samādhimhā cāvetukāmo yena somā bhikkhunī
tenupasaṅkami upasaṅkamitvā somaṁ bhikkhuniṁ gāthāya ajjhabhāsi
yantaṁ isīhi pattabbaṁ ṭhānaṁ durabhisambhavaṁ
na taṁ dvaṅgulapaññāya sakkā pappotumitthiyāti.