[477] Pabbattassa suvaṇṇassa jātarūpassa kevalā 4
dvitāva nālamekassa 5 iti viddhā 6 samañcare
yo dukkhamaddakkhi yatonidānaṁ
kāmesu so jantu kathaṁ nameyya
upadhiṁ viditvāna saṅgoti loke
tasseva jantu vinayāya sikkheti.
1 Sī. kiṁ. 2 Ma. Yu. bhagavatā. 3 Ma. suvaṇṇañcapanassāti. 4 Ma. Yu.
kevalo. 5 Sī. vittavinālamekassa. 6 Sī. viditvāti vā vidvāti vā pāṭho.
Yu. vidvā. Ma. vijjā.
Atha kho māro pāpimā jānāti maṁ bhagavā jānāti maṁ
sugatoti dukkhī dummano tatthevantaradhāyīti.
Dutiyo vaggo.
Tassuddānaṁ
pāsāṇo sīho sakalikaṁ paṭirūpañca mānasaṁ
pattaṁ āyatanaṁ piṇḍaṁ kassakaṁ rajjena te dasāti.
---------
Tatiyavaggo tatiyo
-----
paṭhamaṁ sambahulasuttaṁ

[478] Evamme sutaṁ ekaṁ samayaṁ bhagavā sakkesu viharati
silāvatiyaṁ. Tena kho pana samayena sambahulā bhikkhū bhagavato
avidūre appamattā ātāpino pahitattā viharanti.

[479] Atha kho māro pāpimā brāhmaṇavaṇṇaṁ abhinimminitvā
mahantena jaṭaṇḍuvena ajinakkhipanivattho jiṇṇo gopānasivaṅko
ghurughurupassāsī udumbaradaṇḍaṁ gahetvā yena te bhikkhū tenupasaṅkami
upasaṅkamitvā te bhikkhū etadavoca daharā bhavanto pabbajitā susū
kāḷakesā bhadrena yobbanena samannāgatā paṭhamena vayasā anikkīḷitāvino
kāmesu bhuñjantu bhavanto mānusake kāme mā sandiṭṭhikaṁ
hitvā kālikaṁ anudhāvitthāti. Na kho mayaṁ brāhmaṇa sandiṭṭhikaṁ hitvā
kālikaṁ anudhāvāma kālikañca kho mayaṁ brāhmaṇa hitvā sandiṭṭhikaṁ
anudhāvāma kālikā hi brāhmaṇa kāmā vuttā bhagavatā bahudukkhā
bahūpāyāsā ādīnavo ettha bhiyyo sandiṭṭhiko ayaṁ dhammo
akāliko ehipassiko opanayiko paccattaṁ veditabbo viññūhīti.
Evaṁ vutte māro pāpimā sīsaṁ okampetvā jivhaṁ nillāḷetvā
tivisākhaṁ nalāṭena nalāṭikaṁ vuṭṭhāpetvā ḍaṇḍamolubbha pakkāmi.

[480] Atha kho te bhikkhū bhagavā tenupasaṅkamiṁsu upasaṅkamitvā
bhagavantaṁ abhivādetvā ekamantaṁ nisīdiṁsu. Ekamantaṁ nisinnā
kho te bhikkhū bhagavantaṁ etadavocuṁ idha mayaṁ bhante bhagavato
avidūre appamattā ātāpino pahitattā viharāma atha kho
bhante aññataro brāhmaṇo mahantena jaṭaṇḍuvena ajinakkhipanivattho
jiṇṇo gopānasivaṅko ghurughurupassāsī udumbaradaṇḍaṁ gahetvā
yena mayaṁ tenupasaṅkami upasaṅkamitvā amhe etadavoca daharā
bhavanto pabbajitā susū kāḷakesā bhadrena yobbanena samannāgatā
paṭhamena vayasā anikkīḷitāvino kāmesu bhuñjantu bhavanto
mānusake kāme mā sandiṭṭhikaṁ hitvā kālikaṁ anudhāvitthāti
evaṁ vutte mayaṁ bhante taṁ brāhmaṇaṁ etadavocumha na kho
mayaṁ brāhmaṇa sandiṭṭhikaṁ hitvā kālikaṁ anudhāvāma kālikañca
kho mayaṁ brāhmaṇa hitvā sandiṭṭhikaṁ anudhāvāma kālikā hi
brāhmaṇa kāmā vuttā bhagavatā bahudukkhā bahūpāyāsā ādīnavo
ettha bhiyyo sandiṭṭhiko ayaṁ dhammo akāliko ehipassiko
opanayiko paccattaṁ veditabbo viññūhīti evaṁ vutte bhante
so brāhmaṇo sīsaṁ okampetvā jivhaṁ nillāḷetvā tivisākhaṁ
nalāṭena nalāṭikaṁ vuṭṭhāpetvā daṇḍamolubbha pakkantoti.

[481] Neso bhikkhave brāhmaṇo māro eso pāpimā
tumhākaṁ vicakkhukammāya āgatoti. Atha kho bhagavā etamatthaṁ
Viditvā tāyaṁ velāyaṁ imaṁ gāthaṁ abhāsi
yo dukkhamaddakkhi yatonidānaṁ
kāmesu so jantu kathaṁ nameyya
upadhiṁ viditvā saṅgoti loke
tasseva jantu vinayāya sikkheti.
Dutiyaṁ samiddhisutataṁ

[482] Evamme sutaṁ ekaṁ samayaṁ bhagavā sakkesu viharati
silāvatiyaṁ. Tena kho pana samayena āyasmā samiddhi bhagavato
avidūre appamatto ātāpī pahitatto viharati. Atha kho āyasmato
samiddhissa rahogatassa paṭisallalīnassa evaṁ cetaso parivitakko udapādi
lābhā vata me suladdhaṁ vata me yassa me satthā arahaṁ sammāsambuddho
lābhā vata me suladdhaṁ vata me yohaṁ evaṁ svākkhāte
dhammavinaye pabbajito lābhā vata me suladdhaṁ vata me yassa
me sabrahmacārino 1 sīlavanto kalyāṇadhammāti.

[483] Atha kho māro pāpimā āyasmato samiddhissa cetasā
cetoparivitakkamaññāya yenāyasmā samiddhi tenupasaṅkami upasaṅkamitvā
āyasmato samiddhissa avidūre mahantaṁ bhayabheravaṁ saddamakāsi
apissudaṁ paṭhavī maññe udrīyatīti.

[484] Atha kho āyasmā samiddhi yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ nisīdi. Ekamantaṁ
1 Po. sabrahmacārayo. Yu. sabrahmacāriyo.
Nisinno kho āyasmā samiddhi bhagavantaṁ etadavoca idhāhaṁ bhante
bhagavato avidūre appamatto ātāpī pahitatto viharāmi tassa
mayhaṁ bhante rahogatassa paṭisallīnassa evaṁ cetaso parivitakko
udapādi lābhā vata me suladdhaṁ vata me yassa me satthā
arahaṁ sammāsambuddho lābhā vata me suladdhaṁ vata me yohaṁ
evaṁ svākkhāte dhammavinaye pabbajito lābhā vata me suladdhaṁ
vata me yassa me sabrahmacārino sīlavanto kalyāṇadhammāti
tassa mayhaṁ bhante avidūre mahābhayabheravasaddo ahosi apissudaṁ
paṭhavī maññe udrīyatīti.

[485] Nesā samiddhi paṭhavī udrīyati māro eso pāpimā
tuyhaṁ vicakkhukammāya āgato gaccha tvaṁ samiddhi tattheva appamatto
ātāpī pahitatto viharāhīti. Evaṁ bhanteti kho āyasmā samiddhi
bhagavato paṭissutvā uṭṭhāyāsanā bhagavantaṁ abhivādetvā padakkhiṇaṁ
katvā pakkāmi.

[486] Dutiyampi kho āyasmā samiddhi tattheva appamatto
ātāpī pahitatto vihāsi. Dutiyampi kho āyasmato samiddhissa
rahogatassa paṭisallīnassa .pe. Dutiyampi kho māro pāpimā
āyasmato samiddhissa cetasā cetoparivitakkamaññāya .pe.
Apissudaṁ paṭhavī maññe udrīyatīti.