[467] Ekaṁ samayaṁ bhagavā magadhesu viharati pañcasālāyaṁ
brāhmaṇagāme. Tena kho pana samayena pañcasālāyaṁ brāhmaṇagāme
1 Po. Ma. itisaddo natthi.
Kumārakānaṁ 1 pāhunakāni bhavanti. Atha kho bhagavā pubbaṇhasamayaṁ
nivāsetvā pattacīvaramādāya pañcasālaṁ brāhmaṇagāmaṁ piṇḍāya
pāvisi. Tena kho pana samayena pañcasāleyyakā brāhmaṇagahapatikā
mārena pāpimatā anvāviṭṭhā bhavanti mā samaṇo gotamo
piṇḍamalatthāti. Atha kho bhagavā yathā dhotena pattena pañcasālaṁ
brāhmaṇagāmaṁ piṇḍāya pāvisi tathā dhotena pattena paṭikkami.

[468] Atha kho māro pāpimā yena bhagavā tenupasaṅkami
upasaṅkamitvā bhagavantaṁ etadavoca api samaṇa [2]- piṇḍamalatthāti.
Tathā nu tvaṁ pāpima akāsi yathāhaṁ piṇḍaṁ na labheyyanti. Tena
hi bhante bhagavā dutiyampi pañcasālaṁ brāhmaṇagāmaṁ piṇḍāya
pavisatu tathāhaṁ karissāmi yathā bhagavā piṇḍaṁ lacchatīti.

[469] Apuññaṁ pasavi māro āsajjanaṁ tathāgataṁ
kiṁ nu maññasi pāpima na me pāpaṁ vipaccati
susukhaṁ vata jīvāma yesanno natthi kiñcanaṁ
pītibhakkhā bhavissāma devā ābhassarā yathāti.
Atha kho māro pāpimā jānāti maṁ bhagavā jānāti maṁ sugatoti
dukkhī dummano tatthevantaradhāyīti.
Navamaṁ kassakasuttaṁ

[470] Sāvatthīnidānaṁ. Tena kho pana samayena bhagavā bhikkhū
nibbānapaṭisaṁyuttāya dhammiyā kathāya sandasseti samādapeti samuttejeti
1 Po. Ma. kumārikānaṁ. 2 Ma. etthantare tavanti dissati.
Sampahaṁseti. Te ca bhikkhū aṭṭhikatvā manasikatvā sabbacetaso
samannāharitvā ohitasotā dhammaṁ suṇanti. Atha kho mārassa
pāpimato etadahosi ayaṁ kho samaṇo gotamo bhikkhū nibbānapaṭisaṁyuttāya
dhammiyā kathāya .pe. Yannūnāhaṁ yena samaṇo gotamo
tenupasaṅkameyyaṁ vicakkhukammāyāti.

[471] Atha kho māro pāpimā kassakavaṇṇaṁ abhinimminitvā
mahantaṁ naṅgalaṁ khandhe karitvā dīghaṁ pācanayaṭṭhiṁ gahetvā haṭahaṭakeso
sāṇasāṭakanivattho 1 kaddamamakkhitehi pādehi yena bhagavā tenupasaṅkami
upasaṅkamitvā bhagavantaṁ etadavoca api samaṇa balibadde addasāti.
Kiṁ pana pāpima te balibaddehīti. Mameva samaṇa cakkhu mama rūpā
mama cakkhusamphassaviññāṇāyatanaṁ kuhiṁ me samaṇa gantvā mokkhasi
mameva samaṇa sotaṁ mama saddā .pe. Mameva samaṇa ghānaṁ mama
gandhā .pe. Mameva samaṇa jivhā mama rasā .pe. Mameva
samaṇa kāyo mama phoṭṭhabbā .pe. Mameva samaṇa mano mama
dhammā mama manosamphassaviññāṇāyatanaṁ kuhiṁ me samaṇa gantvā
mokkhasīti.

[472] Taveva pāpima cakkhuṁ tava rūpā tava cakkhusamphassaviññāṇāyatanaṁ
yattha ca kho pāpima natthi cakkhu natthi rūpā
natthi cakkhusamphassaviññāṇāyatanaṁ agati tava tattha pāpima taveva
1 Yu. sāṇasāṭinivattho.
Pāpima sotaṁ tava saddā tava sotasamphassaviññāṇāyatanaṁ yattha
ca kho pāpima natthi sotaṁ natthi saddā natthi sotasamphassaviññāṇāyatanaṁ
agati tava tattha pāpima taveva pāpima ghānaṁ
tava gandhā tava ghānasamphassaviññāṇāyatanaṁ yattha ca kho pāpima
natthi ghānaṁ natthi gandhā natthi ghānasamphassaviññāṇāyatanaṁ agati
tava tattha pāpima taveva pāpima jivhā tava rasā tava jivhāsamphassa-
viññāṇāyatanaṁ .pe. Taveva pāpima kāyo tava phoṭṭhabbā
tava kāyasamphassaviññāṇāyatanaṁ .pe. Taveva pāpima mano tava
dhammā tava manosamphassaviññāṇāyatanaṁ yattha ca kho pāpima
natthi mano natthi dhammā natthi manosamphassaviññāṇāyatanaṁ agati
tava tattha pāpimāti.

[473] Yaṁ vadanti mamayidanti ye vadanti mamanti ca
ettha ce te mano atthi na me samaṇa mokkhasīti.

[474] Yaṁ vadanti na taṁ mayhaṁ ye vadanti na te ahaṁ
evaṁ pāpima jānāhi na me maggampi dakkhasīti.
Atha kho māro pāpimā .pe. Tatthevantaradhāyīti.
Dasamaṁ rajjasuttaṁ

[475] Ekaṁ samayaṁ bhagavā kosalesu viharati himavantappadese 1
araññakuṭikāyaṁ. Atha kho bhagavato rahogatassa paṭisallīnassa evaṁ
1 Sī. himavantapasse.
Cetaso parivitakko udapādi sakkā nu kho rajjaṁ kāretuṁ ahanaṁ
aghātanaṁ ajinaṁ ajāpayaṁ asocaṁ asocāpayaṁ dhammenāti.

[476] Atha kho māro pāpimā bhagavato cetasā ceto
parivitakkamaññāya yena bhagavā tenupasaṅkami upasaṅkamitvā bhagavantaṁ
etadavoca kāretu bhante bhagavā rajjaṁ kāretu sugato rajjaṁ
ahanaṁ aghātanaṁ ajinaṁ ajāpayaṁ asocaṁ asocāpayaṁ dhammenāti.
Kiṁ pana me tvaṁ pāpima passasi yaṁ 1 maṁ tvaṁ evaṁ vadesi kāretu
bhante bhagavā rajjaṁ kāretu sugato rajjaṁ ahanaṁ aghātayaṁ ajinaṁ
ajāpayaṁ asocaṁ asocāpayaṁ dhammenāti. Bhagavato 2 kho bhante
cattāro iddhipādā bhāvitā bahulīkatā yānīkatā vatthukatā anuṭṭhitā
paricitā susamāraddhā ākaṅkhamāno pana bhante bhagavā himavantaṁ
pabbatarājaṁ suvaṇṇantveva adhimucceyya suvaṇṇapabbatassāti. 3