[437] Evamme sutaṁ ekaṁ samayaṁ bhagavā sāvatthiyaṁ viharati
jetavane anāthapiṇḍikassa ārāme.

[438] Atha kho māro pāpimā yena bhagavā tenupasaṅkami
upasaṅkamitvā bhagavato santike imaṁ gāthaṁ abhāsi
nandati puttehi puttimā
gomiko gohi 1 tatheva nandati
upadhīhi narassa nandanā
na hi so nandati yo nirūpadhīti.

[439] Socati puttehi puttimā
gomiko gohi tatheva socati
upadhīhi narassa socanā
na hi so socati yo nirūpadhīti.
Atha kho māro pāpimā jānāti maṁ bhagavā jānāti maṁ sugatoti
dukkhī dummano tatthevantaradhāyīti.
1 Ma. gomā gobhi.
Navamaṁ paṭhamāayusuttaṁ

[440] Evamme sutaṁ ekaṁ samayaṁ bhagavā rājagahe viharati
veḷuvane kalandakanivāpe. Tatra kho bhagavā bhikkhū āmantesi
bhikkhavoti. Bhadanteti te bhikkhū bhagavato paccassosuṁ. Bhagavā
etadavoca appamidaṁ bhikkhave manussānaṁ āyu gamanīyo samparāyo
kattabbaṁ kusalaṁ caritabbaṁ brahmacariyaṁ natthi jātassa amaraṇaṁ yo
bhikkhave ciraṁ jīvati so vassasataṁ appaṁ vā bhiyyoti.

[441] Atha kho māro pāpimā yena bhagavā tenupasaṅkami
upasaṅkamitvā bhagavantaṁ gāthāya ajjhabhāsi
dīghamāyu manussānaṁ na naṁ hiḷe suporiso
careyya khīramattova natthi maccussa āgamoti.

[442] Appamāyu manussānaṁ hiḷeyya naṁ suporiso
careyyādittasīsova natthi maccussa nāgamoti.
Atha kho māro pāpimā .pe. Tatthevantaradhāyīti.
Dasamaṁ dutiyāayusuttaṁ

[443] Ekaṁ samayaṁ bhagavā rājagahe .pe. Tatra kho bhagavā
etadavoca appamidaṁ bhikkhave manussānaṁ āyu gamanīyo samparāyo
kattabbaṁ kusalaṁ caritabbaṁ brahmacariyaṁ natthi jātassa amaraṇaṁ yo
bhikkhave ciraṁ jīvati so vassasataṁ appaṁ vā bhiyyoti.

[444] Atha kho māro pāpimā yena bhagavā tenupasaṅkami
Upasaṅkamitvā bhagavantaṁ gāthāya ajjhabhāsi
nāccayanti ahorattā jīvitaṁ nūparujjhati
āyuṁ anucariyati 1 maccānaṁ nemiva rathakubbaranti.

[445] Accayanti ahorattā jīvitaṁ uparujjhati
āyu khīyati maccānaṁ kunnadīnaṁva odakanti.
Atha kho māro pāpimā jānāti maṁ bhagavā jānāti maṁ sugatoti
dukkhī dummano tatthevantaradhāyīti.
Paṭhamo vaggo.
Tassuddānaṁ
tapokammañca nāgo ca subhaṁ pāsena te duve
sappo suppati nandanaṁ āyunā apare duveti.
---------
1 Sī. pariyetītipi anupariyetītipi pāṭho. Yu. anupariyāti. Ma. āyu anupariyāyati.
Dutiyavaggo dutiyo
-------------
paṭhamaṁ pāsāṇasuttaṁ

[446] Ekaṁ samayaṁ bhagavā rājagahe viharati gijjhakūṭe pabbate.
Tena kho pana samayena bhagavā rattandhakāratimisāyaṁ ajjhokāse
nisinno hoti. Devo ca ekamekaṁ phusāyati.