[367] Atha kho rājā pasenadikosalo anupubbena nāḷikodanaparamatāya
saṇṭhāsi. Atha kho rājā pasenadikosalo aparena samayena
susallikhitagatto pāṇinā gattāni anumajjanto tāyaṁ velāyaṁ
imaṁ udānaṁ udānesi ubhayena vata maṁ so bhagavā atthena anukampi
diṭṭhadhammikena ceva atthena 1 samparāyikena cāti.
Catutthaṁ paṭhamasaṅgāmavatthusuttaṁ

[368] Sāvatthiyaṁ viharati ... Atha kho rājā māgadho ajātasattu
vedehiputto caturaṅginiṁ senaṁ sannayhitvā 2 rājānaṁ pasenadikosalaṁ
abbhuyyāsi yena kāsi 3 . Assosi kho rājā pasenadikosalo rājā
kira māgadho ajātasattu vedehiputto caturaṅginiṁ senaṁ sannayhitvā
mamaṁ abbhuyyāto yena kāsīti. Atha kho rājā pasenadikosalo
caturaṅginiṁ senaṁ sannayhitvā rājānaṁ māgadhaṁ ajātasattuṁ vedehiputtaṁ
paccuyyāsi 4 yena kāsi. Atha kho rājā ca māgadho ajātasattu
vedehiputto rājā ca pasenadikosalo saṅgāmesuṁ. Tasmiṁ 5 kho
pana saṅgāme rājā māgadho ajātasattu vedehiputto rājānaṁ
pasenadikosalaṁ parājesi. Parājito ca rājā pasenadikosalo
sakameva 6 rājadhāniṁ sāvatthiṁ paccuyyāsi.
1 Yu. atthenāti natthi. 2 Sī. sannayahitvā sannayahitvā. 3 Po. Yu. kāsī.
4 Yu. sabbattha pācāyāsi. 5 Yu. tena. 6 Ma. saṅgāmā.

[369] Atha kho sambahulā bhikkhū pubbaṇhasamayaṁ nivāsetvā
pattacīvaramādāya sāvatthiṁ piṇḍāya pavisiṁsu sāvatthiyaṁ piṇḍāya
caritvā pacchābhattaṁ piṇḍapātapaṭikkantā yena bhagavā tenupasaṅkamiṁsu
upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ
nisinnā kho te bhikkhū bhagavantaṁ etadavocuṁ idha bhante rājā
māgadho ajātasattu vedehiputto caturaṅginiṁ senaṁ sannayhitvā rājānaṁ
pasenadikosalaṁ abbhuyyāsi yena kāsi assosi kho bhante rājā
pasenadikosalo rājā kira māgadho ajātasattu vedehiputto caturaṅginiṁ
senaṁ sannayhitvā mamaṁ abbhuyyāto yena kāsīti atha kho bhante
rājā pasenadikosalo caturaṅginiṁ senaṁ sannayhitvā rājānaṁ māgadhaṁ
ajātasattuṁ vedehiputtaṁ paccuyyāsi yena kāsi atha kho bhante
rājā ca māgadho ajātasattu vedehiputto rājā ca pasenadikosalo
saṅgāmesuṁ tasmiṁ kho pana bhante saṅgāme [1]- ajātasattu
vedehiputto rājānaṁ pasenadikosalaṁ parājesi parājito ca bhante
rājā pasenadikosalo sakameva rājadhāniṁ sāvatthiṁ paccuyyāsīti.

[370] Rājā bhikkhave māgadho ajātasattu vedehiputto pāpamitto
pāpasahāyo pāpasampavaṅko rājā ca kho 2 bhikkhave pasenadikosalo
kalyāṇamitto kalyāṇasahāyo kalyāṇasampavaṅko ajjevaṁ 3
1 Ma. Yu. etthantare rājā māgadhoti dissati. 2 Sī. Yu. khokāro na dissati.
3 Sī. Yu. ajjatañca.
Bhikkhave rājā pasenadikosalo imaṁ rattiṁ dukkhaṁ sessati parājitoti.

[371] Idamavoca .pe.
Jayaṁ veraṁ pasavati dukkhaṁ seti parājito
upasanto sukhaṁ seti hitvā jayaparājayanti.
Pañcamaṁ dutiyasaṅgāmavatthusuttaṁ

[372] Atha kho rājā māgadho ajātasattu vedehiputto
caturaṅginiṁ senaṁ sannayhitvā rājānaṁ pasenadikosalaṁ abbhuyyāsi yena
kāsi. Assosi kho rājā pasenadikosalo rājā kira māgadho
ajātasattu vedehiputto caturaṅginiṁ senaṁ sannayhitvā mamaṁ abbhuyyāto
yena kāsīti. Atha kho rājā pasenadikosalo caturaṅginiṁ senaṁ
sannayhitvā rājānaṁ māgadhaṁ ajātasattuṁ vedehiputtaṁ paccuyyāsi
yena kāsi. Atha kho rājā ca māgadho ajātasattu vedehiputto
rājā ca pasenadikosalo saṅgāmesuṁ. Tasmiṁ kho pana saṅgāme
rājā pasenadikosalo rājānaṁ māgadhaṁ ajātasattuṁ vedehiputtaṁ parājesi
jīvaggāhañca naṁ aggahesi.

[373] Atha kho rañño pasenadikosalassa etadahosi kiñcāpi
kho myāyaṁ rājā māgadho ajātasattu vedehiputto adubbhantassa
dubbhati atha ca pana me bhāgineyyo hoti yannūnāhaṁ rañño
māgadhassa ajātasattuno vedehiputtassa sabbaṁ hatthikāyaṁ pariyādiyitvā
sabbaṁ assakāyaṁ pariyādiyitvā sabbaṁ rathakāyaṁ pariyādiyitvā
Sabbaṁ pattikāyaṁ pariyādiyitvā jīvantameva naṁ ossajjeyyanti.
Atha kho rājā pasenadikosalo rañño māgadhassa ajātasattuno
vedehiputtassa sabbaṁ hatthikāyaṁ pariyādiyitvā sabbaṁ assakāyaṁ
pariyādiyitvā sabbaṁ rathakāyaṁ pariyādiyitvā sabbaṁ pattikāyaṁ
pariyādiyitvā jīvantameva naṁ ossajji.

[374] Atha kho sambahulā bhikkhū pubbaṇhasamayaṁ nivāsetvā
pattacīvaramādāya sāvatthiṁ piṇḍāya pavisiṁsu sāvatthiyaṁ piṇḍāya
caritvā pacchābhattaṁ piṇḍapātapaṭikkantā yena bhagavā tenupasaṅkamiṁsu
upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ
nisinnā kho te bhikkhū bhagavantaṁ etadavocuṁ idha bhante rājā
māgadho ajātasattu vedehiputto caturaṅginiṁ senaṁ sannayhitvā rājānaṁ
pasenadikosalaṁ abbhuyyāsi yena kāsi assosi kho bhante rājā
pasenadikosalo rājā kira māgadho ajātasattu vedehiputto
caturaṅginiṁ senaṁ sannayhitvā mamaṁ abbhuyyāto yena kāsīti atha
kho bhante rājā pasenadikosalo caturaṅginiṁ senaṁ sannayhitvā
rājānaṁ māgadhaṁ ajātasattuṁ vedehiputtaṁ paccuyyāsi yena kāsi
atha kho bhante rājā ca māgadho ajātasattu vedehiputto rājā
ca pasenadikosalo saṅgāmesuṁ tasmiṁ kho pana bhante saṅgāme
rājā pasenadikosalo rājānaṁ māgadhaṁ ajātasattuṁ vedehiputtaṁ
parājesi jīvaggāhañca naṁ aggahesi atha kho bhante rañño
Pasenadikosalassa etadahosi kiñcāpi kho myāyaṁ rājā māgadho
ajātasattu vedehiputto adubbhantassa dubbhati atha ca pana me
bhāgineyyo hoti yannūnāhaṁ rañño māgadhassa ajātasattuno
vedehiputtassa sabbaṁ hatthikāyaṁ pariyādiyitvā sabbaṁ assakāyaṁ sabbaṁ
rathakāyaṁ sabbaṁ pattikāyaṁ pariyādiyitvā jīvantameva naṁ ossajjeyyanti.
Atha kho bhante rājā pasenadikosalo rañño māgadhassa
ajātasattuno vedehiputtassa sabbaṁ hatthikāyaṁ pariyādiyitvā sabbaṁ
assakāyaṁ pariyādiyitvā sabbaṁ rathakāyaṁ pariyādiyitvā sabbaṁ pattikāyaṁ
pariyādiyitvā jīvantameva naṁ ossajjīti.

[375] Atha kho bhagavā etamatthaṁ viditvā tāyaṁ velāyaṁ imā
gāthāyo abhāsi
vilumpateva puriso yāvassa upakappati
yadā caññe vilumpanti so vilutto vilumpati 1
ṭhānañhi maññatī bālo yāva pāpaṁ na paccati
yadā ca paccati pāpaṁ atha [bālo] dukkhaṁ nigacchati
labhati hantā hantāraṁ jetāraṁ labhate jayaṁ
akkosako ca akkosaṁ rosetārañca rosako 2
atha kammavivaṭṭena so vilutto vilumpatīti.
1 Ma. viluppati. 2 Sī. rosato paṭirosakotipi rosato ca parosakotipi pāṭho.
Chaṭṭhaṁ dhītusuttaṁ

[376] Sāvatthīnidānaṁ. Atha kho rājā pasenadikosalo yena
bhagavā tenupasaṅkami upasaṅkamitvā bhagavantaṁ abhivādetvā ekamantaṁ
nisīdi. Atha kho aññataro puriso yena rājā pasenadikosalo
tenupasaṅkami upasaṅkamitvā rañño pasenadikosalassa upakaṇṇake
ārocesi mallikā deva devī dhītaraṁ vijātāti. Evaṁ vutte
rājā pasenadikosalo anattamano ahosi.