[317] Atha kho ākoṭako devaputto nānātitthiye ārabbha
bhagavato santike imaṁ gāthaṁ abhāsi
pakudhako kātiyāno nigantho
ye cāpime makkhalipūraṇāse
gaṇassa satthāro samaññapattā
nahi nūna te sappurisehi dūreti.

[318] Atha kho veṭambarī devaputto ākoṭakaṁ devaputtaṁ
gāthāya ajjhabhāsi
saha racitena 1 chavo 2 sigālo
na koṭṭhuko 3 sīhasamo kadāci
naggo musāvādi gaṇassa satthā
saṅkassarācāro na sataṁ sarikkhoti.

[319] Atha kho māro pāpimā veṭambariṁ devaputtaṁ anvāvisitvā
bhagavato santike imaṁ gāthaṁ abhāsi
tapojigucchāya āyuttā pālayaṁ pavivekiyaṁ
rūpe ca ye niviṭṭhāse devalokābhinandino
te ce 4 sammānusāsanti paralokāya mātiyāti.
1 Sī. Yu. sagāravenāpi. Ma. sahācaritena. 2 Sī. javo. 3 Sī. kotthuko.
Yu. kutthako. A. kuṭṭhako. 4 Ma. Yu. ve..

[320] Atha kho bhagavā māro ayaṁ pāpimā iti viditvā
māraṁ pāpimantaṁ gāthāya paccabhāsi
yekeci rūpā idha vā huraṁ vā
ye cantalikkhasmi pabhāsavaṇṇā
sabbeva te te namucippasatthā
āmisaṁva macchānaṁ vadhāya khittāti.

[321] Atha kho māṇavagāmiyo devaputto bhagavantaṁ ārabbha
bhagavato santike imā gāthāyo abhāsi
vipulo rājagahiyānaṁ giri seṭṭho pavuccati
seto himavataṁ seṭṭho ādicco aghagāminaṁ
samuddodadhinaṁ seṭṭho nakkhattānañca 1 candimā
sadevakassa lokassa buddho aggo pavuccatīti.
Nānātitthiyavaggo tatiyo.
Tassuddānaṁ
sivo khemo ca serī ca ghaṭi jantu ca rohito
nando nandivisālo ca susimo nānātitthiyena te dasāti.
Devaputtasaṁyuttaṁ niṭṭhitaṁ.
---------
1 Ma. Yu. ... va.
Kosalasaṁyuttaṁ
paṭhamavaggo paṭhamo
------
paṭhamaṁ daharasuttaṁ

[322] Evamme sutaṁ ekaṁ samayaṁ bhagavā sāvatthiyaṁ viharati
jetavane anāthapiṇḍikassa ārāme. Atha kho rājā pasenadikosalo
yena bhagavā tenupasaṅkami upasaṅkamitvā bhagavatā saddhiṁ sammodi
sammodanīyaṁ kathaṁ sārāṇīyaṁ vītisāretvā ekamantaṁ nisīdi.

[323] Ekamantaṁ nisinno kho rājā pasenadikosalo bhagavantaṁ
etadavoca bhavaṁpi no gotamo anuttaraṁ sammāsambodhiṁ abhisambuddhoti
paṭijānātīti 1 . Yaṁ hi taṁ mahārāja sammā vadamāno vadeyya
anuttaraṁ sammāsambodhiṁ abhisambuddhoti mamantaṁ 2 sammā vadamāno
vadeyya ahaṁ hi mahārāja anuttaraṁ sammāsambodhiṁ abhisambuddhoti.

[324] Yepi te bho gotama samaṇabrāhmaṇā saṅghino gaṇino
gaṇācariyā ñātā yasassino titthakarā sādhusammatā bahujanassa
seyyathīdaṁ pūraṇo kassapo makkhali gosālo nigantho nāṭaputto
sañjayo velaṭṭhaputto pakudho 3 kaccāyano ajito kesakambalo 4 tepi
1 Sī. iti paṭijānātīti pāṭhadvayaṁ na paññāyati. 2 Ma. mameva taṁ.
3 Sī. Yu. kakudho. 4 Sī. kesakambalī.
Mayā anuttaraṁ sammāsambodhiṁ abhisambuddhoti paṭijānāthāti puṭṭhā
samānā na anuttaraṁ sammāsambodhiṁ abhisambuddhoti paṭijānanti
kiṁ pana bhavaṁ gotamo daharo ceva jātiyā navo ca pabbajjāyāti.

[325] Cattāro khome mahārāja daharāti na uññātabbā
daharāti na paribhotabbā katame cattāro khattiyo kho mahārāja
daharoti na uññātabbo daharoti na paribhotabbo urago kho
mahārāja daharoti na uññātabbo daharoti na paribhotabbo aggi
kho mahārāja daharoti na uññātabbo daharoti na paribhotabbo
bhikkhu kho mahārāja daharoti na uññātabbo daharoti na
paribhotabbo ime kho mahārāja cattāro daharāti na uññātabbā
daharāti na paribhotabbāti.

[326] Idamavoca bhagavā idaṁ vatvāna sugato athāparaṁ
etadavoca satthā
khattiyaṁ jātisampannaṁ abhijātaṁ yasassinaṁ
daharoti nāvajāneyya na naṁ paribhave naro
ṭhānamhi so manussindo rajjaṁ laddhāna khattiyo
so kuddho rājadaṇḍena tasmiṁ pakkamate bhusaṁ
tasmā taṁ parivajjeyya rakkhaṁ jīvitamattano
gāme vā yadi vāraññe yattha passe bhujaṅgamaṁ
daharoti nāvajāneyya na naṁ paribhave naro
Uccāvacehi vaṇṇehi urago carati tejasī
so āsajja ḍaṁse bālaṁ naraṁ nāriñca ekadā
tasmā taṁ parivajjeyya rakkhaṁ jīvitamattano
pahūtabhakkhaṁ jālinaṁ pāvakaṁ kaṇhavattaniṁ
daharoti nāvajāneyya na naṁ paribhave naro
laddhā hi so upādānaṁ mahā hutvāna pāvako
so āsajja ḍahe bālaṁ naraṁ nāriñca ekadā
tasmā taṁ parivajjeyya rakkhaṁ jīvitamattano
vanaṁ yadaggi ḍahati pāvako kaṇhavattanī
jāyanti tattha pārohā ahorattānamaccaye
yañca kho sīlasampanno bhikkhu ḍahati tejasā
na tassa puttā pasavo dāyādā vindare dhanaṁ
anapaccā adāyādā tālavatthu bhavanti te
tasmā hi paṇḍito poso sampassaṁ bhayamattano 1
bhujaṅgamaṁ pāvakañca khattiyañca yasassinaṁ
bhikkhuñca sīlasampannaṁ sammadeva samācareti.