[297] Bhūtapubbāhaṁ bhante rohitasso nāma isi ahosiṁ
bhojaputto iddhimā vehāsaṅgamo. Tassa mayhaṁ bhante evarūpo
javo ahosi seyyathāpi nāma daḷhadhammo dhanuggaho sikkhito
katahattho katayoggo katupāsano lahukena asanena appakasireneva
tiriyaṁ tālacchāyaṁ atipāteyya. Tassa mayhaṁ bhante evarūpo padavītihāro
ahosi seyyathāpi 1 puratthimā samuddā pacchimo samuddo.
Tassa mayhaṁ bhante evarūpaṁ icchāgataṁ uppajji ahaṁ gamanena
lokassa antaṁ pāpuṇissāmīti. So khvāhaṁ bhante evarūpena
javena samannāgato evarūpena ca padavītihārena aññatreva asitakhāyita 2
aññatra uccārapassāvakammā aññatra niddākilamathapaṭivinodanā
vassasatāyuko vassasatajīvī vassasataṁ gantvā
appatvāva 3 lokassa antaṁ antarāva kālakato. Acchariyaṁ bhante
abbhūtaṁ bhante yāva subhāsitañcidaṁ bhante bhagavatā yattha kho āvuso
na jāyati na jiyyati na miyyati na cavati na upapajjati nāhantaṁ
gamanena lokassa antaṁ ñāteyyaṁ daṭṭheyyaṁ patteyyanti vadāmīti.
1 Po. Ma. seyyathāpi nāma. 2 Po. Ma. Yu. asitapītakhāyitasāyitā. 3 Yu. ca.

[298] Yattha 1 kho āvuso na jāyati na jiyyati na miyyati na
cavati na upapajjati nāhantaṁ gamanena lokassa antaṁ ñāteyyaṁ
daṭṭheyyaṁ patteyyanti vadāmi na ca panāhaṁ 2 āvuso appatvā
lokassa antaṁ dukkhassa antakiriyaṁ vadāmi apicāhaṁ 3 āvuso
imasmiṁyeva byāmamatte kaḷevare sasaññamhi samanake lokañca
paññapemi 4 lokasamudayañca lokanirodhañca lokanirodhagāminiñca
paṭipadanti.
Gamanena na pattabbo lokassanto kudācanaṁ
na ca appatvā lokantaṁ dukkhā atthi pamocanaṁ
tasmā have lokavidū sumedho
lokantagū vusitabrahmacariyo
lokassa antaṁ samitāvi ñatvā
nāsiṁsati lokamimaṁ parañcāti.
Sattamaṁ nandasuttaṁ

[299] Ekamantaṁ ṭhito kho nando devaputto bhagavato santike
imaṁ gāthaṁ abhāsi
accenti kālā tarayanti rattiyo
vayoguṇā anupubbaṁ jahanti
1 Po. Ma. Yu. yattha kho ... patteyyanti vadāmīti na dissati. 2 Ma. Yu. na kho
panāhaṁ. 3 Ma. Yu. api khvāhaṁ. 4 paññāpemīti vā pāṭho.
Etaṁ bhayaṁ maraṇe pekkhamāno
puññāni kayirātha sukhāvahānīti.

[300] Accenti kālā tarayanti rattiyo
vayoguṇā anupubbaṁ jahanti
etaṁ bhayaṁ maraṇe pekkhamāno
lokāmisaṁ pajahe santipekkhoti.
Aṭṭhamaṁ nandivisālasuttaṁ

[301] Ekamantaṁ ṭhito kho nandivisālo devaputto bhagavantaṁ
gāthāya ajjhabhāsi
catucakkaṁ navadvāraṁ puṇṇaṁ lobhena saṁyutaṁ
paṅkajātaṁ mahāvīra kathaṁ yātrā bhavissatīti.

[302] Chetvā naddhiṁ varattañca icchālobhañca pāpakaṁ
samūlaṁ taṇhaṁ abbuyha evaṁ yātrā bhavissatīti.
Navamaṁ susimasuttaṁ

[303] Sāvatthīnidānaṁ. Atha kho āyasmā ānando yena
bhagavā tenupasaṅkami upasaṅkamitvā bhagavantaṁ abhivādetvā
ekamantaṁ nisīdi. Ekamantaṁ nisinnaṁ kho āyasmantaṁ ānandaṁ bhagavā
etadavoca tuyhaṁpi no ānanda sārīputto ruccatīti. Kassa hi
nāma bhante abālassa aduṭṭhassa amūḷhassa avipallatthacittassa
āyasmā sārīputto na rucceyya paṇḍito bhante āyasmā
Sārīputto mahāpañño bhante āyasmā sārīputto puthupañño
bhante āyasmā sārīputto hāsapañño bhante āyasmā sārīputto
javanapañño bhante āyasmā sārīputto tikkhapañño bhante āyasmā
sārīputto nibbedhikapañño bhante āyasmā sārīputto appiccho
bhante āyasmā sārīputto santuṭṭho bhante āyasmā sārīputto
pavivitto bhante āyasmā sārīputto asaṁsaṭṭho bhante āyasmā
sārīputto āraddhaviriyo bhante āyasmā sārīputto vattā
bhante āyasmā sārīputto vacanakkhamo bhante āyasmā sārīputto
codako bhante āyasmā sārīputto pāpagarahī bhante āyasmā
sārīputto kassa hi nāma bhante abālassa aduṭṭhassa amūḷhassa
avipallatthacittassa āyasmā sārīputto na rucceyyāti.

[304] Evametaṁ ānanda evametaṁ ānanda kassa hi nāma
ānanda abālassa aduṭṭhassa amūḷhassa avipallatthacittassa
sārīputto na rucceyya paṇḍito ānanda sārīputto mahāpañño
ānanda sārīputto puthupañño ānanda sārīputto hāsapañño
ānanda sārīputto javanapañño ānanda sārīputto tikkhapañño
ānanda sārīputto nibbedhikapañño ānanda sārīputto appiccho
ānanda sārīputto santuṭṭho ānanda sārīputto pavivitto ānanda
sārīputto asaṁsaṭṭho ānanda sārīputto āraddhaviriyo ānanda
sārīputto vattā ānanda sārīputto vacanakkhamo ānanda
Sārīputto codako ānanda sārīputto pāpagarahī ānanda
sārīputto kassa hi nāma ānanda abālassa aduṭṭhassa amūḷhassa
avipallatthacittassa sārīputto na rucceyyāti.

[305] Atha kho susimo devaputto āyasmato sārīputtassa
vaṇṇe bhaññamāne mahatiyā devaputtaparisāya parivuto yena
bhagavā tenupasaṅkami upasaṅkamitvā bhagavantaṁ abhivādetvā ekamantaṁ
aṭṭhāsi. Ekamantaṁ ṭhito kho susimo devaputto bhagavantaṁ
etadavoca evametaṁ bhagavā evametaṁ sugata kassa hi nāma
bhante abālassa aduṭṭhassa amūḷhassa avipallatthacittassa āyasmā
sārīputto na rucceyya paṇḍito bhante āyasmā sārīputto
.pe. Pāpagarahī bhante āyasmā sārīputto kassa hi nāma
bhante abālassa aduṭṭhassa amūḷhassa avipallatthacittassa āyasmā
sārīputto na rucceyya ahampi hi bhante yañca 1 devaputtaparisaṁ
upasaṅkamiṁ etadeva bahulaṁ saddaṁ suṇāmi paṇḍito āyasmā
sārīputto mahāpañño āyasmā puthupañño āyasmā hāsapañño
āyasmā javanapañño āyasmā tikkhapañño āyasmā nibbedhikapañño
āyasmā appiccho āyasmā santuṭṭho āyasmā pavivitto
āyasmā asaṁsaṭṭho āyasmā āraddhaviriyo āyasmā vattā
āyasmā vacanakkhamo āyasmā codako āyasmā pāpagarahī āyasmā
1 Sī. Ma. Yu. yaññadeva.
Sārīputto 1 kassa hi nāma bhante abālassa aduṭṭhassa amūḷhassa
avipallatthacittassa āyasmā sārīputto na rucceyyāti.

[306] Atha kho susimassa devaputtassa devaputtaparisā āyasmato
sārīputtassa vaṇṇe bhaññamāne attamanā pamuditā pītisomanassajātā
uccāvacā vaṇṇanibhā upadaṁseti.