[277] Evaṁ vutte āyasmā ānando bhagavantaṁ etadavoca
so hi nūna bhante anāthapiṇḍiko devaputto bhavissati anāthapiṇḍiko
gahapati āyasmante sārīputte abhippasanno ahosīti.
Sādhu sādhu ānanda yāvatakaṁ kho ānanda takkāya pattabbaṁ
anuppattaṁ [1]- tayā anāthapiṇḍiko hi so ānanda devaputtoti.
Anāthapiṇḍikavaggo dutiyo.
Tassuddānaṁ
candimaso ca veṇḍu ca dīghalaṭṭhi ca nandano
candano vāsudatto ca subrahmā kakudhena ca
uttaro navamo vutto dasamo anāthapiṇḍikoti.
---------
1 Ma. etthantare tanti atthi.
Nānātitthiyavaggo tatiyo
------
paṭhamaṁ sivasuttaṁ

[278] Evamme sutaṁ ekaṁ samayaṁ bhagavā sāvatthiyaṁ viharati
jetavane anāthapiṇḍikassa ārāme. Atha kho sivo devaputto
abhikkantāya rattiyā abhikkantavaṇṇo kevalakappaṁ jetavanaṁ
obhāsetvā yena bhagavā tenupasaṅkami upasaṅkamitvā bhagavantaṁ
abhivādetvā ekamantaṁ aṭṭhāsi.

[279] Ekamantaṁ ṭhito kho sivo devaputto bhagavato santike
imā gāthāyo abhāsi
sabbhireva samāsetha sabbhi kubbetha santhavaṁ
sataṁ saddhammamaññāya seyyo hoti na pāpiyo
sabbhireva samāsetha sabbhi kubbetha santhavaṁ
sataṁ saddhammamaññāya paññaṁ labhati 1 nāññato
sabbhireva samāsetha sabbhi kubbetha santhavaṁ
sataṁ saddhammamaññāya sokamajjhe na socati
sabbhireva samāsetha sabbhi kubbetha santhavaṁ
sataṁ saddhammamaññāya ñātimajjhe virocati
sabbhireva samāsetha sabbhi kubbetha santhavaṁ
1 Ma. Yu. paññā labbhati.
Sataṁ saddhammamaññāya sattā gacchanti sugatiṁ
sabbhireva samāsetha sabbhi kubbetha santhavaṁ
sataṁ saddhammamaññāya sattā tiṭṭhanti sātatanti.

[280] Atha kho bhagavā sivaṁ devaputtaṁ gāthāya ajjhabhāsi
sabbhireva samāsetha sabbhi kubbetha santhavaṁ
sataṁ saddhammamaññāya sabbadukkhā pamuccatīti.
Dutiyaṁ khemasuttaṁ

[281] Ekamantaṁ ṭhito kho khemo devaputto bhagavato santike
imā gāthāyo abhāsi
caranti bālā dummedhā amitteneva attanā
karonti 1 pāpakaṁ kammaṁ yaṁ hoti kaṭukapphalaṁ
na taṁ kammaṁ kataṁ sādhu yaṁ katvā anutappati
yassa assumukho rodaṁ vipākaṁ paṭisevati
tañca kammaṁ kataṁ sādhu yaṁ katvā nānutappati
yassa patito 2 sumano vipākaṁ paṭisevati
paṭikacceva 3 taṁ kayirā yaṁ jaññā hitamattano
na sākaṭikacintāya mantādhīro parakkamo 4
yathā sākaṭiko pasatthaṁ 5 samaṁ hitvā mahāpathaṁ
visamaṁ maggamāruyha akkhacchinnova jhāyati
1 Ma. Yu. karontā. 2 Ma. Yu. pītito. 3 Sī. paṭigacceva. 4 Ma. Yu.
parakkame. 5 Po. satthaṁ. Ma. maṭṭhaṁ. Yu. panthaṁ.
Evaṁ dhammā apakkamma adhammamanuvattiya
mando maccumukhaṁ patto akkhacchinnova jhāyatīti.
Tatiyaṁ serīsuttaṁ

[282] Ekamantaṁ ṭhito kho serī devaputto bhagavantaṁ gāthāya
ajjhabhāsi
annamevābhinandanti ubhayo 1 devamānusā
atha kho nāma so yakkho yaṁ annaṁ nābhinandatīti.

[283] Ye naṁ dadanti saddhāya vippasannena cetasā
tameva annaṁ bhajati asmiṁ loke paramhi ca
tasmā vineyya maccheraṁ dajjā dānaṁ malābhibhū
puññāni paralokasmiṁ patiṭṭhā honti pāṇinanti.

[284] Acchariyaṁ bhante abbhūtaṁ bhante yāva subhāsitañcidaṁ 2
bhante bhagavatā
ye naṁ dadanti saddhāya vippasannena cetasā
tameva annaṁ bhajati asmiṁ loke paramhi ca
tasmā vineyya maccheraṁ dajjā dānaṁ malābhibhū
puññāni paralokasmiṁ patiṭṭhā honti pāṇinanti.

[285] Bhūtapubbāhaṁ bhante serī nāma rājā ahosiṁ dāyako
dānapati dānassa vaṇṇavādī. Tassa mayhaṁ bhante catūsu dvāresu
dānaṁ dīyittha samaṇabrāhmaṇakapaṇaddhikavaṇibbakayācakānaṁ. Atha
1 Po. Ma. ubhaye. 2 Ma. subhāsitamidaṁ. Yu. subhāsitaṁ idaṁ.
Kho maṁ bhante itthāgāraṁ upasaṅkamitvā etadavoca devassa kho
dānaṁ dīyati amhākaṁ dānaṁ na dīyati sādhu mayampi devaṁ nissāya
dānāni dadeyyāma puññāni kareyyāmāti. Tassa mayhaṁ bhante
etadahosi ahaṁ khosmi dāyako dānapati dānassa vaṇṇavādī
dānaṁ dassāmāti vadante 1 kinti vadeyyanti. So khvāhaṁ bhante
paṭhamadvāraṁ itthāgārassa adāsiṁ tattha itthāgārassa dānaṁ dīyittha
mama dānaṁ paṭikkami. Atha kho maṁ bhante khattiyā anuyuttā 2
upasaṅkamitvā maṁ etadavocuṁ devassa kho dānaṁ dīyati itthāgārassa
dānaṁ dīyati amhākaṁ dānaṁ na dīyati sādhu mayampi devaṁ
nissāya dānāni dadeyyāma puññāni kareyyāmāti. Tassa mayhaṁ
bhante etadahosi ahaṁ khosmi dāyako dānapati dānassa vaṇṇavādī
dānaṁ dassāmāti vadante kinti vadeyyanti. So khvāhaṁ bhante
dutiyadvāraṁ khattiyānaṁ anuyuttānaṁ 3 adāsiṁ tattha khattiyānaṁ anuyuttānaṁ
dānaṁ dīyittha mama dānaṁ paṭikkami. Atha kho maṁ bhante
balakāyo upasaṅkamitvā etadavoca devassa kho dānaṁ dīyati
itthāgārassa dānaṁ dīyati khattiyānaṁ anuyuttānaṁ dānaṁ dīyati
amhākaṁ dānaṁ na dīyati sādhu mayampi devaṁ nissāya dānāni
dadeyyāma puññāni kareyyāmāti. Tassa mayhaṁ bhante etadahosi
ahaṁ khosmi dāyako dānapati dānassa vaṇṇavādī dānaṁ dassāmāti
1 Yu. vadantānaṁ. 2 Po. Ma. anuyantā. 3 Po. Ma. anuyantānaṁ.
Vadante kinti vadeyyanti. So khvāhaṁ bhante tatiyadvāraṁ balakāyassa
adāsiṁ tattha balakāyassa dānaṁ dīyittha mama dānaṁ paṭikkami.
Atha kho maṁ bhante brāhmaṇagahapatikā upasaṅkamitvā etadavocuṁ
devassa kho dānaṁ dīyati itthāgārassa dānaṁ dīyati khattiyānaṁ
anuyuttānaṁ dānaṁ dīyati balakāyassa dānaṁ dīyati amhākaṁ dānaṁ
na dīyati sādhu mayampi devaṁ nissāya dānāni dadeyyāma puññāni
kareyyāmāti. Tassa mayhaṁ bhante etadahosi ahaṁ khosmi
dāyako dānapati dānassa vaṇṇavādī dānaṁ dassāmāti vadante
kinti vadeyyanti. So khvāhaṁ bhante catutthadvāraṁ brāhmaṇagahapatikānaṁ
adāsiṁ tattha brāhmaṇagahapatikānaṁ dānaṁ dīyittha mama
dānaṁ paṭikkami. Atha kho maṁ bhante purisā upasaṅkamitvā etadavocuṁ
na khodāni devassa koci dānaṁ dīyatīti. Evaṁ vuttāhaṁ 1 bhante te
purise etadavocaṁ tenahi bhaṇe yo bāhiresu janapadesu āyo
sañjāyati tato upaḍḍhaṁ antepuraṁ pavesetha upaḍḍhaṁ tattheva dānaṁ
detha samaṇabrāhmaṇakapaṇaddhikavaṇibbakayācakānanti. So khvāhaṁ
bhante evaṁ dīgharattaṁ katānaṁ puññānaṁ evaṁ dīgharattaṁ katānaṁ kusalānaṁ 2
pariyantaṁ nādhigacchāmi ettakaṁ puññanti vā ettako puññavipākoti
vā ettakaṁ samagge 3 ṭhātabbanti vāti.

[286] Acchariyaṁ bhante abbhūtaṁ bhante yāva subhāsitañcidaṁ
bhante bhagavatā
1 Po. Yu. vuttohaṁ. 2 Po. Ma. etthantare dhammānanti atthi. 3 Po. magge
Ma. Yu. sagge.
Ye naṁ dadanti saddhāya vippasannena cetasā
tameva annaṁ bhajati asmiṁ loke paramhi ca
tasmā vineyya maccheraṁ dajjā dānaṁ malābhibhū
puññāni paralokasmiṁ patiṭṭhā honti pāṇinanti.
Catutthaṁ ghaṭikārasuttaṁ