[267] Ekamantaṁ ṭhito kho kakudho devaputto bhagavantaṁ etadavoca
nandasi samaṇāti. Kiṁ laddhā āvusoti. Tena hi samaṇa socasīti.
Kiṁ jīyittha āvusoti. Tena hi samaṇa neva nandasi neva socasīti.
Evamāvusoti.

[268] Kacci tvaṁ anigho 1 bhikkhu kacci nandi na vijjati
kacci tamekamāsīnaṁ aratī 2 nābhikīratīti.

[269] Anigho ve ahaṁ yakkha atho nandi 3 na vijjati
atho mamekamāsīnaṁ aratī nābhikīratīti.

[270] Kathaṁ tvaṁ anigho bhikkhu kathaṁ nandi na vijjati
kathaṁ tamekamāsīnaṁ aratī nābhikīratīti.

[271] Aghajātassa ve nandi nandijātassa ve aghaṁ
anandi anigho bhikkhu evaṁ jānāhi āvusoti.

[272] Cirassaṁ vata passāmi brāhmaṇaṁ parinibbutaṁ
anandiṁ anighaṁ bhikkhuṁ tiṇṇaṁ loke visattikanti.
1 Ma. anagho. 2 Po. Ma. Yu. arati. 3 Ma. Yu. nandī.
Navamaṁ uttarasuttaṁ

[273] Rājagahanidānaṁ. Ekamantaṁ ṭhito kho uttaro devaputto
bhagavato santike imaṁ gāthaṁ abhāsi
upanīyati jīvitamappamāyuṁ
jarūpanītassa na santi tāṇā
etaṁ bhayaṁ maraṇe pekkhamāno
puññāni kayirātha sukhāvahānīti.

[274] Upanīyati jīvitamappamāyuṁ
jarūpanītassa na santi tāṇā
etaṁ bhayaṁ maraṇe pekkhamāno
lokāmisaṁ pajahe santipekkhoti.
Dasamaṁ anāthapiṇḍikasuttaṁ

[275] Ekamantaṁ ṭhito kho anāthapiṇḍiko devaputto bhagavato
santike imā gāthāyo abhāsi
idaṁ hitaṁ jetavanaṁ isisaṅghanisevitaṁ
āvutthaṁ dhammarājena pītisañjananaṁ mama
kammaṁ vijjā ca dhammo ca sīlaṁ jīvitamuttamaṁ
etena maccā sujjhanti na gottena dhanena vā
tasmā hi paṇḍito poso sampassaṁ atthamattano 1
1 attamattanotipi pāṭho.
Yoniso vicine dhammaṁ evaṁ tattha visujjhati
sārīputtova paññāya sīlena upasamena ca
yopi pāragato bhikkhu etāvaparamo siyāti.
Idamavoca anāthapiṇḍiko devaputto idaṁ vatvā bhagavantaṁ
abhivādetvā padakkhiṇaṁ katvā tatthevantaradhāyīti.

[276] Atha kho bhagavā tassā rattiyā accayena bhikkhū āmantesi
idaṁ 1 bhikkhave rattiṁ aññataro devaputto abhikkantāya rattiyā
abhikkantavaṇṇo kevalakappaṁ jetavanaṁ obhāsetvā yenāhaṁ tenupasaṅkami
upasaṅkamitvā maṁ abhivādetvā ekamantaṁ aṭṭhāsi ekamantaṁ ṭhito
kho so devaputto mama santike imā gāthāyo abhāsi
idaṁ hitaṁ jetavanaṁ isisaṅghanisevitaṁ
āvutthaṁ dhammarājena pītisañjananaṁ mama
kammaṁ vijjā ca dhammo ca sīlaṁ jīvitamuttamaṁ
etena maccā sujjhanti na gottena dhanena vā
tasmā hi paṇḍito poso sampassaṁ atthamattano
yoniso vicine dhammaṁ evaṁ tattha visujjhati
sārīputtova paññāya sīlena upasamena ca
yopi pāragato bhikkhu etāvaparamo siyāti.
Idamavoca bhikkhave so devaputto idaṁ vatvā maṁ abhivādetvā
padakkhiṇaṁ katvā tatthevantaradhāyīti.
1 Po. Ma. Yu. imaṁ.