[247] Atha kho bhagavā suriyaṁ devaputtaṁ ārabbha rāhuṁ asurindaṁ
gāthāya ajjhabhāsi
tathāgataṁ arahantaṁ suriyo saraṇaṁ gato
rāhu suriyaṁ pamuñcassu buddhā lokānukampakā
yo andhakāre tamasī pabhaṅkaro
verocano maṇḍali uggatejo
1 Yu. buddhagāthābhihītomhi.
Mā rāhu gilī caramantalikkhe
pajaṁ mama rāhu pamuñca suriyanti.

[248] Atha kho rāhu asurindo suriyaṁ devaputtaṁ muñcitvā
taramānarūpo yena vepacitti asurindo tenupasaṅkami upasaṅkamitvā
saṁviggo lomahaṭṭhajāto ekamantaṁ aṭṭhāsi.

[249] Ekamantaṁ ṭhitaṁ kho rāhuṁ asurindaṁ vepacitti asurindo
gāthāya ajjhabhāsi
kinnu santaramānova rāhu suriyaṁ pamuñcasi
saṁviggarūpo āgamma kinnu bhītova tiṭṭhasīti.

[250] Sattadhā me phale muddhā jīvanto na sukhaṁ labhe
buddhagāthābhigītomhi no ce muñceyya suriyanti.
Paṭhamo vaggo.
Tassuddānaṁ
dve kassapā ca māgho ca māgadho dāmali kāmado
pañcālacaṇḍo ca tāyano candimasuriyena te dasāti.
---------
Anāthapiṇḍikavaggo dutiyo
----
paṭhamaṁ candimasasuttaṁ

[251] Sāvatthiyaṁ ārāme ... Atha kho candimaso devaputto
abhikkantāya rattiyā abhikkantavaṇṇo kevalakappaṁ jetavanaṁ
obhāsetvā yena bhagavā tenupasaṅkami upasaṅkamitvā bhagavantaṁ
abhivādetvā ekamantaṁ aṭṭhāsi.

[252] Ekamantaṁ ṭhito kho candimaso devaputto bhagavato
santike imaṁ gāthaṁ abhāsi
te hi sotthiṁ gamissanti kacchevāmakase magā
jhānāni upasampajja ekodinipakā satāti.

[253] Te hi pāraṁ gamissanti chetvā jālañca 1 ambujo
jhānāni upasampajja appamattā raṇañjahāti.
Dutiyaṁ veṇḍusuttaṁ

[254] Ekamantaṁ ṭhito kho veṇḍu devaputto bhagavato santike
imaṁ gāthaṁ abhāsi
sukhitā vata te manujā sugataṁ payirupāsiya
yuñja 2 gotamasāsane appamattānusikkhareti.
1 Po. Ma. Yu. jālaṁva. 2 Sī. yajja. Ma. yuñjaṁ.

[255] Ye me vutte satthipade [veṇḍūti bhagavā] anusikkhanti jhāyino
kāle te appamajjantā na maccuvasagā 1 siyunti.
Tatiyaṁ dīghalaṭṭhisuttaṁ

[256] Evamme sutaṁ ekaṁ samayaṁ bhagavā rājagahe viharati
veḷuvane kalandakanivāpe. Atha kho dīghalaṭṭhi devaputto abhikkantāya
rattiyā abhikkantavaṇṇo kevalakappaṁ veḷuvanaṁ obhāsetvā yena
bhagavā tenupasaṅkami upasaṅkamitvā bhagavantaṁ abhivādetvā
ekamantaṁ aṭṭhāsi.