[237] Sambādhepi ca tiṭṭhanti 2 [pañcālacaṇḍāti bhagavā]
dhammaṁ nibbānapattiyā
ye satiṁ paccalatthaṁsu
sammā te susamāhitāti.
Aṭṭhamaṁ tāyanasuttaṁ

[238] Atha kho tāyano devaputto purāṇatitthakaro abhikkantāya
rattiyā abhikkantavaṇṇo kevalakappaṁ jetavanaṁ obhāsetvā yena
bhagavā tenupasaṅkami upasaṅkamitvā bhagavantaṁ abhivādetvā ekamantaṁ
aṭṭhāsi.

[239] Ekamantaṁ ṭhito kho tāyano devaputto bhagavato santike
imā gāthāyo abhāsi
chinda sotaṁ parakkamma kāme panūda brāhmaṇa
nappahāya muni kāme nekattamupapajjati
kayirā ce kayirāthenaṁ daḷhamenaṁ parakkame
sithilo hi paribbājo bhiyyo ākirate rajaṁ
1 Sī. jhānamabuddhābuddho. 2 Sī. Yu. vāpi vindanti.
Akataṁ dukkaṭaṁ seyyo pacchā tappati dukkaṭaṁ
katañca sukataṁ seyyo yaṁ katvā nānutappati
kuso yathā duggahito hatthamevānukantati
sāmaññaṁ dupparāmaṭṭhaṁ nirayāyūpakaḍḍhati
yaṅkiñci sithilaṁ kammaṁ saṅkiliṭṭhañca yaṁ vataṁ
saṅkassaraṁ brahmacariyaṁ na taṁ hoti mahapphalanti.
Idamavoca tāyano devaputto idaṁ vatvā bhagavantaṁ abhivādetvā
padakkhiṇaṁ katvā tatthevantaradhāyīti.

[240] Atha kho bhagavā tassā rattiyā accayena bhikkhū āmantesi
imaṁ bhikkhave rattiṁ tāyano nāma devaputto purāṇatitthakaro
abhikkantāya rattiyā abhikkantavaṇṇo kevalakappaṁ jetavanaṁ obhāsetvā
yenāhaṁ tenupasaṅkami upasaṅkamitvā maṁ abhivādetvā ekamantaṁ
aṭṭhāsi ekamantaṁ ṭhito kho tāyano devaputto mama santike
imā gāthāyo abhāsi
chinda sotaṁ parakkamma kāme panūda brāhmaṇa
nappahāya muni kāme nekattamupapajjati
kayirā ce kayirāthenaṁ daḷhamenaṁ parakkame
sithilo hi paribbājo bhiyyo ākirate rajaṁ
akataṁ dukkaṭaṁ seyyo pacchā tappati dukkaṭaṁ
katañca sukataṁ seyyo yaṁ katvā nānutappati
Kuso yathā duggahito hatthamevānukantati
sāmaññaṁ dupparāmaṭṭhaṁ nirayāyūpakaḍḍhati
yaṅkiñci sithilaṁ kammaṁ saṅkiliṭṭhañca yaṁ vataṁ
saṅkassaraṁ brahmacariyaṁ na taṁ hoti mahapphalanti.
Idamavoca bhikkhave tāyano devaputto idaṁ vatvā maṁ abhivādetvā
padakkhiṇaṁ katvā tatthevantaradhāyi uggaṇhātha bhikkhave tāyanagāthā
pariyāpuṇātha bhikkhave tāyanagāthā dhāretha bhikkhave tāyanagāthā
atthasañhitā bhikkhave tāyanagāthā ādibrahmacariyakāti.
Navamaṁ candimasuttaṁ

[241] Sāvatthiyaṁ viharati ... Tena kho pana samayena candimā
devaputto rāhunā asurindena gahito hoti. Atha kho candimā
devaputto bhagavantaṁ anussaramāno tāyaṁ velāyaṁ imaṁ gāthaṁ abhāsi
namo te buddhavīratthu vippamuttosi sabbadhi
sambādhapaṭipannosmi tassa me saraṇaṁ bhavāti.

[242] Atha kho bhagavā candimaṁ devaputtaṁ ārabbha rāhuṁ asurindaṁ
gāthāya ajjhabhāsi
tathāgataṁ arahantaṁ candimā saraṇaṁ gato
rāhu candaṁ pamuñcassu buddhā lokānukampakāti.

[243] Atha kho rāhu asurindo candimaṁ devaputtaṁ muñcitvā
taramānarūpo yena vepacitti asurindo tenupasaṅkami upasaṅkamitvā
Saṁviggo lomahaṭṭhajāto ekamantaṁ aṭṭhāsi.

[244] Ekamantaṁ ṭhitaṁ kho rāhuṁ asurindaṁ vepacitti asurindo
gāthāya ajjhabhāsi
kinnu santaramānova rāhu candaṁ pamuñcasi
saṁviggarūpo āgamma kinnu bhītova tiṭṭhasīti.

[245] Sattadhā me phale muddhā jīvanto na sukhaṁ labhe
buddhagāthābhigītomhi 1 no ce muñceyya candimanti.
Dasamaṁ suriyasuttaṁ

[246] Tena kho pana samayena suriyo devaputto rāhunā
asurindena gahito hoti. Atha kho suriyo devaputto bhagavantaṁ
anussaramāno tāyaṁ velāyaṁ imaṁ gāthaṁ abhāsi
namo te buddhavīratthu vippamuttosi sabbadhi
sambādhapaṭipannosmi tassa me saraṇaṁ bhavāti.