[217] Kiṁsu lokasmi pajjoto kiṁsu lokasmi jāgaro
kiṁsu kamme sajīvānaṁ kiṁsu cassa iriyāpatho
kiṁsu alasaṁ analasañca mātā puttaṁva posati
kiṁsu bhūtā upajīvanti ye pāṇā paṭhaviṁ sitāti.

[218] Paññā lokasmi pajjoto sati lokasmi jāgaro
gāvo kamme sajīvānaṁ sītassa iriyāpatho
vuṭṭhi alasaṁ analasañca 1 mātā puttaṁva posati
vuṭṭhiṁ bhūtā upajīvanti ye pāṇā paṭhaviṁ sitāti.
Ekādasamaṁ araṇasuttaṁ

[219] Kesūdha araṇā loke kesaṁ vusitaṁ na nassati
kedha icchaṁ 2 parijānanti kesaṁ bhojisiyaṁ sadā
kiṁsu mātā pitā bhātā vandanti naṁ patiṭṭhitaṁ
kiṁsu idha jātihīnaṁ abhivādenti khattiyāti.

[220] Samaṇīdha araṇā loke samaṇānaṁ vusitaṁ na nassati
samaṇā icchaṁ parijānanti samaṇānaṁ bhojisiyaṁ sadā
1 Sī. vittamālasyānālasyaṁ. 2 icchāti vā pāṭho.
Samaṇaṁ mātā pitā bhātā vandanti naṁ patiṭṭhitaṁ
samaṇīdha jātihīnaṁ abhivādenti khattiyāti.
Ghatvāvaggo aṭṭhamo.
Tassuddānaṁ
ghatvā rathañca vittañca vuṭṭhi bhītā najīrati
issaraṁ kāmapātheyyaṁ pajjoto araṇena cāti.
Devatāsaṁyuttaṁ samattaṁ.
---------
Devaputtasaṁyuttaṁ
paṭhamo vaggo
------
paṭhamaṁ paṭhamakassapasuttaṁ

[221] Evamme sutaṁ ekaṁ samayaṁ bhagavā sāvatthiyaṁ viharati
jetavane anāthapiṇḍikassa ārāme. Atha kho kassapo devaputto
abhikkantāya rattiyā abhikkantavaṇṇo kevalakappaṁ jetavanaṁ
obhāsetvā yena bhagavā tenupasaṅkami upasaṅkamitvā bhagavantaṁ
abhivādetvā ekamantaṁ aṭṭhāsi. Ekamantaṁ ṭhito kho kassapo
devaputto bhagavantaṁ etadavoca bhikkhuṁ bhagavā pakāsesi no ca
bhikkhuno anusāsanti 1 . Tena hi kassapa taññevettha paṭibhātūti.

[222] Subhāsitassa sikkhetha samaṇupāsanassa ca
ekāsanassa ca raho cittavūpasamassa cāti
idamavoca kassapo devaputto samanuñño satthā ahosi. Atha
kho kassapo devaputto samanuñño me satthāti bhagavantaṁ
abhivādetvā padakkhiṇaṁ katvā tatthevantaradhāyīti.
Dutiyaṁ dutiyakassapasuttaṁ

[223] Sāvatthiyaṁ ārāme ... Ekamantaṁ ṭhito kho kassapo
devaputto bhagavato santike imaṁ gāthaṁ abhāsi
1 Sī. anusāsanintipi anusāsinintipi pāṭho.
Bhikkhu siyā jhāyi vimuttacitto
ākaṅkhe ve 1 hadayassānupattiṁ
lokassa ñatvā udayabyañca
sucetaso anissito 2 tadānisaṁ soti.
Tatiyaṁ māghasuttaṁ

[224] Sāvatthiyaṁ ārāme ... Atha kho māgho devaputto
abhikkantāya rattiyā abhikkantavaṇṇo kevalakappaṁ jetavanaṁ obhāsetvā
yena bhagavā tenupasaṅkami upasaṅkamitvā bhagavantaṁ abhivādetvā
ekamantaṁ aṭṭhāsi.

[225] Ekamantaṁ ṭhito kho māgho devaputto bhagavantaṁ
gāthāya ajjhabhāsi
kiṁsu ghatvā sukhaṁ seti kiṁsu ghatvā na socati
kissassa ekadhammassa vadhaṁ rocesi gotamāti.

[226] Kodhaṁ ghatvā sukhaṁ seti kodhaṁ ghatvā na socati
kodhassa visamūlassa madhuraggassa vatrabhū
vadhaṁ ariyā pasaṁsanti tañhi ghatvā na socatīti.
Catutthaṁ māgadhasuttaṁ