[197] Chasu loko samuppanno chasu kubbati santhavaṁ
channameva upādāya chasu loko vihaññatīti.
Andhavaggo sattamo.
Tassuddānaṁ
nāmaṁ cittañca taṇhā ca saññojanañca bandhanā
abbhāhatuḍḍito pihito icchā lokena te dasāti.
--------
1 Ma. Yu. kissassu.
Ghatvāvaggo 1 aṭṭhamo
------
paṭhamaṁ ghatvāsuttaṁ

[198] Ekamantaṁ ṭhitā kho sā devatā bhagavantaṁ gāthāya ajjhabhāsi
kiṁsu ghatvā 2 sukhaṁ seti kiṁsu ghatvā na socati
kissassa ekadhammassa vadhaṁ rocesi gotamāti.

[199] Kodhaṁ ghatvā sukhaṁ seti kodhaṁ ghatvā na socati
kodhassa visamūlassa madhuraggassa devate
vadhaṁ ariyā pasaṁsanti tañhi ghatvā na socatīti.
Dutiyaṁ rathasuttaṁ

[200] Kiṁsu rathassa paññāṇaṁ kiṁsu paññāṇamaggino
kiṁsu raṭṭhassa paññāṇaṁ kiṁsu paññāṇamitthiyāti.

[201] Dhajo rathassa paññāṇaṁ dhūmo paññāṇamaggino
rājā raṭṭhassa paññāṇaṁ bhattā paññāṇamitthiyāti.
Tatiyaṁ vittasuttaṁ

[202] Kiṁsūdha vittaṁ purisassa seṭṭhaṁ
kiṁsu suciṇṇo 3 sukhamāvahāti
1 Ma. Yu. chetvāvaggo. 2 Sī. jhatvā. Yu. chetvā. 3 suciṇṇantipi
pāṭhena bhavitabbaṁ.
Kiṁsu have sādhutaraṁ rasānaṁ
kathaṁjīvī 1 jīvitamāhu seṭṭhanti.

[203] Saddhīdha vittaṁ purisassa seṭṭhaṁ
dhammo suciṇṇo sukhamāvahāti
saccaṁ have sādhutaraṁ rasānaṁ
paññājīvī jīvitamāhu seṭṭhanti.
Catutthaṁ vuṭṭhisuttaṁ

[204] Kiṁsu uppatataṁ seṭṭhaṁ kiṁsu nipatataṁ varaṁ
kiṁsu pavajamānānaṁ kiṁsu pavadataṁ varanti.

[205] Bījaṁ uppatataṁ seṭṭhaṁ vuṭṭhi nipatataṁ varā
gāvo pavajamānānaṁ putto pavadataṁ varoti.

[206] Vijjā uppatataṁ seṭṭhā avijjā nipatataṁ varā
saṅgho pavajamānānaṁ buddho pavadataṁ varoti.
Pañcamaṁ bhītasuttaṁ