[187] Nandisambandhano loko vitakkassa vicāraṇaṁ
taṇhāya vippahānena sabbaṁ chindati bandhananti.
Chaṭṭhaṁ abbhāhatasuttaṁ

[188] Kenassubbhāhato loko kenassu parivārito
kena sallena otiṇṇo kissa dhūpāyito 1 sadāti.

[189] Maccunābbhāhato loko jarāya parivārito
taṇhāsallena otiṇṇo icchādhūpāyito sadāti.
Sattamaṁ uḍḍitasuttaṁ

[190] Kenassu uḍḍito loko kenassu parivārito
kenassu pihito loko kismiṁ loko patiṭṭhitoti.

[191] Taṇhāya uḍḍito loko jarāya parivārito
maccunā pihito loko dukkhe loko patiṭṭhitoti.
1 si. kissā dhūmāyito.
Aṭṭhamaṁ pihitasuttaṁ

[192] Kenassu pihito loko kismiṁ loko patiṭṭhito
kenassu uḍḍito loko kenassu parivāritoti.

[193] Maccunā pihito loko dukkhe loko patiṭṭhito
taṇhāya uḍḍito loko jarāya parivāritoti.
Navamaṁ icchāsuttaṁ

[194] Kenassu bajjhati loko kissa vinayāya muccati
kissassa 1 vippahānena sabbaṁ chindati bandhananti.

[195] Icchāya bajjhati loko icchāvinayāya muccati
icchāya vippahānena sabbaṁ chindati bandhananti.
Dasamaṁ lokasuttaṁ

[196] Kismiṁ loko samuppanno kismiṁ kubbati santhavaṁ
kissa loko upādāya kismiṁ loko vihaññatīti.