[167] Taṇhā janeti purisaṁ cittamassa vidhāvati
satto saṁsāramāpādi dukkhamassa mahabbhayanti.
Chaṭṭhaṁ dutiyajanasuttaṁ

[168] Kiṁsu janeti purisaṁ kiṁsu tassa vidhāvati
kiṁsu saṁsāramāpādi kismā na parimuccatīti.

[169] Taṇhā janeti purisaṁ cittamassa vidhāvati
satto saṁsāramāpādi dukkhā na parimuccatīti.
Sattamaṁ tatiyajanasuttaṁ

[170] Kiṁsu janeti purisaṁ kiṁsu tassa vidhāvati
kiṁsu saṁsāramāpādi kiṁsu tassa parāyananti.

[171] Taṇhā janeti purisaṁ cittamassa vidhāvati
satto saṁsāramāpādi kammaṁ tassa parāyananti.
Aṭṭhamaṁ uppathasuttaṁ

[172] Kiṁsu uppatho akkhāti 1 kiṁsu rattindivakkhayo
kiṁ malaṁ brahmacariyassa kiṁ sinānamanodakanti.

[173] Rāgo uppatho akkhāti vayo rattindivakkhayo
itthī malaṁ brahmacariyassa etthāyaṁ sajjate pajā
tapo ca brahmacariyañca taṁ sinānamanodakanti.
Navamaṁ dutiyasuttaṁ

[174] Kiṁsu dutiyaṁ 2 purisassa hoti kiṁsu cenaṁ pasāsati
kissa cābhirato macco sabbadukkhā pamuccatīti.

[175] Saddhā dutiyā purisassa hoti paññā cenaṁ pasāsati
nibbānābhirato macco sabbadukkhā pamuccatīti.
Dasamaṁ kavisuttaṁ

[176] Kiṁsu nidānaṁ gāthānaṁ kiṁsu tāsaṁ viyañjanaṁ
kiṁsu sannissitā gāthā kiṁsu gāthānamāsayoti.