[177] Chando nidānaṁ gāthānaṁ akkharā tāsaṁ viyañjanaṁ
nāmasannisitā gāthā kavi gāthānamāsayoti.
Jarāvaggo chaṭṭho.
1 Sī. Ma. akkhāto. 2 Po. Ma. dutiyā.
Tassuddānaṁ
jarā ajarasā mittaṁ vatthu tīṇi janāni ca
uppatho ca dutiyo ca kavinā pūrito vaggoti.
---------
Andhavaggo sattamo
---------
paṭhamaṁ nāmasuttaṁ

[178] Kiṁsu sabbaṁ andhabhavi 1 kismā bhiyyo 2 na vijjati
kissassa 3 ekadhammassa sabbeva vasamanvagūti.

[179] Nāmaṁ sabbaṁ andhabhavi nāmā bhiyyo na vijjati
nāmassa ekadhammassa sabbeva vasamanvagūti.
Dutiyaṁ cittasuttaṁ

[180] Kenassu nīyati loko kenassu parikissati 4
kissassa ekadhammassa sabbeva vasamanvagūti.

[181] Cittena nīyati loko cittena parikissati
cittassa ekadhammassa sabbeva vasamanvagūti.
Tatiyaṁ taṇhāsuttaṁ

[182] Kenassu nīyati loko kenassu parikissati
kissassa ekadhammassa sabbeva vasamanvagūti.

[183] Taṇhāya nīyati loko taṇhāya parikissati
taṇhāya ekadhammassa sabbeva vasamanvagūti.
1 Sī. aṭṭhabhavi. Yu. addhabhavi. A. andabhavītipi andhabhavītipi pāṭho.
2 bhīyotipipāṭho. 3 sabbattha kissassu. 4 Po. Ma. parikassati.
Catutthaṁ saññojanasuttaṁ

[184] Kiṁsu saññojano loko kiṁsu tassa vicāraṇaṁ
kissassa vippahānena nibbānaṁ iti vuccatīti.

[185] Nandisaññojano loko vitakkassa vicāraṇaṁ
taṇhāya vippahānena nibbānaṁ iti vuccatīti.
Pañcamaṁ bandhanasuttaṁ

[186] Kiṁsu sambandhano loko kiṁsu tassa vicāraṇaṁ
kissassa vippahānena sabbaṁ chindati bandhananti.