[157] Evametaṁ tadā āsi yathā bhāsasi bhaggava
kumbhakāro pure āsi vebhaḷiṅge ghaṭīkaro
mātāpettibharo āsi kassapassa upāsako
virato methunā dhammā brahmacārī nirāmiso
ahuvā me sagāmeyyo ahuvā me pure sakhāti.
Evametaṁ purāṇānaṁ sahāyānamahu saṅgamo
ubhinnaṁ bhāvitattānaṁ sarīrantimadhārinanti.
Ādittavaggo pañcamo.
Tassuddānaṁ
ādittaṁ kindadaṁ annaṁ ekamūlaṁ anomiyaṁ
accharā vanaropajetaṁ maccherena ghaṭīkaroti.
---------------
1 vehaḷiṅgeti vā pāṭho. Ma. vekaḷiṅge.
Jarāvaggo chaṭṭho
------
paṭhamaṁ jarāsuttaṁ

[158] Kiṁsu yāva jarā sādhu kiṁsu sādhu patiṭṭhitaṁ
kiṁsu narānaṁ ratanaṁ kiṁsu corehi dūharanti.

[159] Sīlaṁ yāva jarā sādhu saddhā sādhu patiṭṭhitā
paññā narānaṁ ratanaṁ puññaṁ corehi dūharanti.
Dutiyaṁ ajarasāsuttaṁ

[160] Kiṁsu ajarasā sādhu kiṁsu sādhu adhiṭṭhitaṁ
kiṁsu narānaṁ ratanaṁ kiṁsu corehi hāriyanti.

[161] Sīlaṁ ajarasā sādhu saddhā sādhu adhiṭṭhitā
paññā narānaṁ ratanaṁ puññaṁ corehi hāriyanti.
Tatiyaṁ mittasuttaṁ

[162] Kiṁsu pasavato 1 mittaṁ kiṁsu mittaṁ sake ghare
kiṁ mittaṁ atthajātassa kiṁ mittaṁ samparāyikanti.

[163] Sattho pasavato 2 mittaṁ mātā mittaṁ sake ghare
1 Sī. Ma. pavasato. Yu. pathavato. 2 Sī. pañcasato.
Sahāyo atthajātassa hoti mittaṁ punappunaṁ
sayaṁ katāni puññāni taṁ mittaṁ samparāyikanti.
Catutthaṁ vatthusuttaṁ

[164] Kiṁsu vatthu manussānaṁ kiṁsūdha paramā sakhā
kiṁsu bhūtā upajīvanti ye pāṇā paṭhaviṁ sitāti.

[165] Puttā vatthu manussānaṁ bhariyā paramā sakhā
vuṭṭhiṁ bhūtā upajīvanti ye pāṇā paṭhaviṁ sitāti.
Pañcamaṁ paṭhamajanasuttaṁ

[166] Kiṁsu janeti purisaṁ kiṁsu tassa vidhāvati
kiṁsu saṁsāramāpādi kiṁsu tassa mahabbhayanti.