[383] Asīti me āvuso vassāni pabbajitassa nābhijānāmi
gahapaticīvaraṁ sāditā. Yampāyasmā bakkulo asītiyā vassehi
nābhijānāmi gahapaticīvaraṁ sāditā idampi mayaṁ āyasmato bakkulassa
acchariyaṁ abbhūtadhammaṁ dhārema. Asīti me āvuso vassāni pabbajitassa
nābhijānāmi satthena cīvaraṁ chinditā ... Nābhijānāmi sūciyā cīvaraṁ
sibbitā ... Nābhijānāmi rajanāya cīvaraṁ rajitā ... Nābhijānāmi kaṭhine
cīvaraṁ sibbitā ... Nābhijānāmi sabrahmacārīnaṁ 1 cīvarakammaṁ vicāritā ...
Nābhijānāmi nimantanaṁ sāditā ... Nābhijānāmi evarūpaṁ cittaṁ uppannapubbaṁ
1 Yu. sabrahmacārī cīvarakamme byāpāritā.
Aho vata maṁ koci nimanteyyāti .pe. Nābhijānāmi
antaraghare nisīditā ... Nābhijānāmi antaraghare bhuñjitā ... Nābhijānāmi
mātugāmassa anubyañjanaso nimittaṁ gahetā ... Nābhijānāmi mātugāmassa
dhammaṁ desitā antamaso catuppadampi gāthaṁ ... Nābhijānāmi
bhikkhunūpassayaṁ upasaṅkamitā ... Nābhijānāmi bhikkhuniyā dhammaṁ desitā ...
Nābhijānāmi sikkhamānāya dhammaṁ desitā ... Nābhijānāmi sāmaṇerāya
dhammaṁ desitā ... Nābhijānāmi pabbājetā ... Nābhijānāmi
upasampādetā ... Nābhijānāmi nissayaṁ detā ... Nābhijānāmi sāmaṇeraṁ
upaṭṭhāpetā ... Nābhijānāmi jantāghare nahāyitā ... Nābhijānāmi
cuṇṇena nahāyitā ... Nābhijānāmi sabrahmacārigattaparikammaṁ 1
sāditā ... Nābhijānāmi ābādhaṁ uppannapubbaṁ antamaso gaddūhanamattampi ...
Nābhijānāmi bhesajjaṁ pariharitā 2 antamaso haritakīkhaṇḍampi ...
Nābhijānāmi apassenakaṁ apasayitā 3 ... Nābhijānāmi
seyyaṁ kappetā. Yampāyasmā bakkulo asītiyā vassehi
nābhijānāmi seyyaṁ kappetā idampi mayaṁ āyasmato bakkulassa
acchariyaṁ abbhūtadhammaṁ dhārema.

[384] Asīti me āvuso vassāni pabbajitassa nābhijānāmi
gāmantasenāsane vassaṁ upagantā. Yampāyasmā bakkulo asītiyā
vassehi nābhijānāti gāmantasenāsane vassaṁ upagantā idampi mayaṁ
āyasmato bakkulassa acchariyaṁ abbhūtadhammaṁ dhārema. Sattāhameva
1 Yu. kamme byāpajjitā. Ma. vicāritā. 2 Ma. upaharitā. 3 Yu. apassetā.
Kho ahaṁ āvuso sāraṇo 1 raṭṭhapiṇḍaṁ bhuñjiṁ atha aṭṭhamiyaṁ aññā
udapādi. Yampāyasmā bakkulo sattāhameva sāraṇo raṭṭhapiṇḍaṁ
bhuñji atha aṭṭhamiyaṁ aññā udapādi idampi mayaṁ āyasmato
bakkulassa acchariyaṁ abbhūtadhammaṁ dhārema.

[385] Labheyyāhaṁ āvuso bakkula imasmiṁ dhammavinaye pabbajjaṁ
labheyyaṁ upasampadanti. Alattha kho acelo kassapo imasmiṁ
dhammavinaye pabbajjaṁ alattha upasampadaṁ. Acirūpasampanno kho
panāyasmā kassapo eko vūpakaṭṭho appamatto ātāpī pahitatto
viharanto na cirasseva yassatthāya kulaputtā sammadeva agārasmā
anagāriyaṁ pabbajanti tadanuttaraṁ brahmacariyapariyosānaṁ diṭṭheva dhamme
sayaṁ abhiññā sacchikatvā upasampajja vihāsi khīṇā jāti vusitaṁ
brahmacariyaṁ kataṁ karaṇīyaṁ nāparaṁ itthattāyāti abbhaññāsi.
Aññataro kho panāyasmā kassapo arahataṁ ahosi.

[386] Atha kho āyasmā bakkulo aparena samayena apāpuraṇaṁ
ādāya vihārena vihāraṁ upasaṅkamitvā evamāha abhikkamathāyasmanto
abhikkamathāyasmanto ajja me parinibbānaṁ bhavissatīti. Yampāyasmā
bakkulo apāpuraṇaṁ ādāya vihārena vihāraṁ upasaṅkamitvā
evamāha abhikkamathāyasmanto abhikkamathāyasmanto ajja me
parinibbānaṁ bhavissatīti idampi mayaṁ āyasmato bakkulassa acchariyaṁ
abbhūtadhammaṁ dhāremāti.
1 Po. Ma. saraṇo. Yu. sāṇo. ito paraṁ īdisameva.

[387] Atha kho āyasmā bakkulo majjhe bhikkhusaṅghassa
nisinnako parinibbāyi. Yampāyasmā bakkulo majjhe bhikkhusaṅghassa
nisinnako parinibbāyi idampi mayaṁ āyasmato bakkulassa acchariyaṁ
abbhūtadhammaṁ dhāremāti.
Bakkulattheracchariyabbhūtasuttaṁ niṭṭhitaṁ catutthaṁ.
------------
Dantabhūmisuttaṁ

[388] Evamme sutaṁ ekaṁ samayaṁ bhagavā rājagahe viharati veḷuvane
kalandakanivāpe. Tena kho pana samayena aciravato samaṇuddeso
araññe 1 kuṭikāyaṁ viharati. Atha kho jayaseno rājakumāro jaṅghāvihāraṁ
anucaṅkamamāno anuvicaramāno yena aciravato samaṇuddeso
tenupasaṅkami upasaṅkamitvā aciravatena samaṇuddesena saddhiṁ sammodi
sammodanīyaṁ kathaṁ sārāṇīyaṁ vītisāretvā ekamantaṁ nisīdi.

[389] Ekamantaṁ nisinno kho jayaseno rājakumāro aciravataṁ
samaṇuddesaṁ etadavoca sutaṁ metaṁ bho aggivessana idha bhikkhu
appamatto ātāpī pahitatto viharanto phuseyya cittassa
ekaggatanti. Evametaṁ rājakumāra evametaṁ rājakumāra idha bhikkhu
appamatto ātāpī pahitatto viharanto phuseyya cittassa
ekaggatanti. Sādhu me bhavaṁ aggivessano yathāsutaṁ yathāpariyattaṁ
dhammaṁ desetūti.

[390] Na kho te ahaṁ rājakumāra sakkomi yathāsutaṁ yathāpariyattaṁ
dhammaṁ dassetuṁ 2 ahañcarahi te rājakumāra yathāsutaṁ yathāpariyattaṁ
dhammaṁ deseyyaṁ tavañca me bhāsitassa atthaṁ na ājāneyyāsi
so mamassa kilamatho sā mamassa vihesāti. Desetu me bhavaṁ
aggivessano yathāsutaṁ yathāpariyattaṁ dhammaṁ appevanāmahaṁ bhoto
1 Po. Ma. Yu. araññakuṭikāyaṁ. 2 Po. Ma. Yu. desetuṁ.
Aggivessanassa bhāsitassa atthaṁ ājāneyyanti. Deseyyaṁ kho
te ahaṁ rājakumāra yathāsutaṁ yathāpariyattaṁ dhammaṁ sace me tvaṁ
bhāsitassa atthaṁ ājāneyyāsi iccetaṁ kusalaṁ no ce me tvaṁ
bhāsitassa atthaṁ ājāneyyāsi yathāsake tiṭṭheyyāsi na maṁ tattha
uttariṁ paṭipuccheyyāsīti. Desetu me bhavaṁ aggivessano yathāsutaṁ
yathāpariyattaṁ dhammaṁ sace ahaṁ bhoto aggivessanassa bhāsitassa
atthaṁ ājāneyyāmi iccetaṁ kusalaṁ no ce ahaṁ bhoto
aggivessanassa bhāsitassa atthaṁ ājānissāmi yathāsake tiṭṭhissāmi
nāhaṁ tattha bhavantaṁ aggivessanaṁ uttariṁ paṭipucchissāmīti.

[391] Atha kho aciravato samaṇuddeso jayasenassa rājakumārassa
yathāsutaṁ yathāpariyattaṁ dhammaṁ desesi. Evaṁ vutte jayaseno rājakumāro
aciravataṁ samaṇuddesaṁ etadavoca aṭṭhānametaṁ bho aggivessana
anavakāso yaṁ bhikkhu appamatto ātāpī pahitatto viharanto
phuseyya cittassa ekaggatanti. Atha kho jayaseno rājakumāro
aciravatassa samaṇuddesassa aṭṭhānattañca anavakāsattañca pavedetvā
uṭṭhāyāsanā pakkāmi. Atha kho aciravato samaṇuddeso acirapakkante
jayasene rājakumāre yena bhagavā tenupasaṅkami upasaṅkamitvā bhagavantaṁ
abhivādetvā ekamantaṁ nisīdi. Ekamantaṁ nisinno kho aciravato
samaṇuddeso yāvatako ahosi jayasenena rājakumārena saddhiṁ
kathāsallāpo taṁ sabbaṁ bhagavato ārocesi.

[392] Evaṁ vutte bhagavā aciravataṁ samaṇuddesaṁ etadavoca
taṁ kutettha aggivessana labbhā yaṁ taṁ nekkhammena ñātabbaṁ
nekkhammena daṭṭhabbaṁ nekkhammena pattabbaṁ nekkhammena sacchikātabbaṁ
taṁ vata jayaseno rājakumāro kāmamajjhe vasanto kāme
paribhuñjanto kāmavitakkehi khajjamāno kāmapariḷāhena pariḍayhamāno
kāmapariyesanāya ussukko ñassati vā dakkhati vā sacchi vā
karissatīti netaṁ ṭhānaṁ vijjati.