[373] Sammukhā metaṁ bhante bhagavato sutaṁ sammukhā paṭiggahitaṁ
1 Yu. abhinindriyaṁ.
Yadā ānanda bodhisatto mātu kucchimhā nikkhamati devā paṭhamaṁ
paṭiggaṇhanti pacchā manussāti. Yampi bhante .pe. Idampahaṁ
bhante bhagavato acchariyaṁ abbhūtadhammaṁ dhāremi.

[374] Sammukhā metaṁ bhante bhagavato sutaṁ sammukhā paṭiggahitaṁ
yadā ānanda bodhisatto mātu kucchimhā nikkhamati appattova
bodhisatto paṭhaviṁ hoti cattāro naṁ devaputtā paṭiggahetvā
mātu puratova ṭhapenti attamanā devī hotu 1 mahesakkho te
putto uppannoti. Yampi bhante .pe. Idampahaṁ bhante
bhagavato acchariyaṁ abbhūtadhammaṁ dhāremi.

[375] Sammukhā metaṁ bhante bhagavato sutaṁ sammukhā paṭiggahitaṁ
yadā ānanda bodhisatto mātu kucchimhā nikkhamati atha
visuddhova 2 nikkhamati amakkhito uddena amakkhito semhena amakkhito
ruhirena amakkhito pubbena amakkhito kenaci asucinā suddho
visuddho 2 . Seyyathāpi ānanda maṇiratanaṁ kāsikavatthe nikkhittaṁ
neva maṇiratanaṁ kāsikavatthaṁ makkheti nāpi kāsikavatthaṁ maṇiratanaṁ
makkheti taṁ kissa hetu ubhinnaṁ suddhattā evameva kho
ānanda yadā bodhisatto mātu kucchimhā nikkhamati visuddho
nikkhamati amakkhito uddena amakkhito semhena .pe. Amakkhito
kenaci asucinā suddho visuddhoti. Yampi bhante .pe. Idampahaṁ
bhante bhagavato acchariyaṁ abbhūtadhammaṁ dhāremi.
1 Ma. Yu. hohi. 2 Ma. Yu. visadova.

[376] Sammukhā metaṁ bhante bhagavato sutaṁ sammukhā paṭiggahitaṁ
yadā ānanda bodhisatto mātu kucchimhā nikkhamati dve udakassa
dhārā antalikkhā pātubhavanti ekā sītassa ekā uṇhassa yena
bodhisattassa udakakiccaṁ karoti 1 mātu cāti. Yampi bhante .pe.
Idampahaṁ bhante bhagavato acchariyaṁ abbhūtadhammaṁ dhāremi.

[377] Sammukhā metaṁ bhante bhagavato sutaṁ sammukhā paṭiggahitaṁ
sampatijāto ānanda bodhisatto samehi pādehi paṭhaviyaṁ 2 patiṭṭhahitvā
uttarābhimukho sattapadavītihārena gacchati setamhi chatte anuhīramāne 3
sabbā ca disā viloketi āsabhiñca vācaṁ bhāsati aggohamasmi
lokassa jeṭṭhohamasmi lokassa seṭṭhohamasmi lokassa ayamantimā
jāti natthidāni punabbhavoti. Yampi bhante .pe. Idampahaṁ
bhante bhagavato acchariyaṁ abbhūtadhammaṁ dhāremi.

[378] Sammukhā metaṁ bhante bhagavato sutaṁ sammukhā paṭiggahitaṁ
yadā ānanda bodhisatto mātu kucchimhā nikkhamati atha sadevake
loke samārake sabrahmake sassamaṇabrāhmaṇiyā pajāya
sadevamanussāya appamāṇo oḷāro obhāso loke pātubhavati
atikkammeva devānaṁ devānubhāvaṁ yāpi tā lokantarikā aghā asaṁvutā
andhakārā andhakāratimisā yatthapime candimasuriyā evaṁmahiddhikā
evaṁmahānubhāvā ābhāya nānubhonti tatthapi appamāṇo oḷāro
obhāso loke pātubhavati atikkammeva devānaṁ devānubhāvaṁ yepi
1 Ma. Yu. karonti. 2 Yu. paṭhaviyantisaddo natthi. 3 Po. anuhiriyamāne
Ma. anudhāriyamāne. Yu. anubhīramāne.
Tattha sattā upapannā tepi tenobhāsena aññamaññaṁ sañjānanti
aññepi kira bho santi sattā idhūpapannāti ayaṁ kho dasasahassī
lokadhātu saṅkampati sampakampati sampavedhati appamāṇo ca oḷāro
obhāso loke pātubhavati atikkammeva devānaṁ devānubhāvanti.
Yampi bhante .pe. Idampahaṁ bhante bhagavato acchariyaṁ abbhūtadhammaṁ
dhāremīti.

[379] Tasmātiha tvaṁ ānanda idampi tathāgatassa acchariyaṁ
abbhūtadhammaṁ dhārehīti. Idhānanda tathāgatassa viditā vedanā
uppajjanti viditā upaṭṭhahanti viditā abbhatthaṁ gacchanti viditā
saññā ... Viditā vitakkā uppajjanti viditā upaṭṭhahanti viditā
abbhatthaṁ gacchanti. Idampi kho tvaṁ ānanda tathāgatassa acchariyaṁ
abbhūtadhammaṁ dhārehīti. Yampi bhante bhagavato viditā vedanā
uppajjanti viditā upaṭṭhahanti viditā abbhatthaṁ gacchanti. Viditā
saññā ... Viditā vitakkā uppajjanti viditā upaṭṭhahanti viditā
abbhatthaṁ gacchanti. Idampahaṁ bhante bhagavato acchariyaṁ abbhūtadhammaṁ
dhāremīti.
Idamavoca āyasmā ānando. Samanuñño satthā ahosi.
Attamanā te bhikkhū āyasmato ānandassa bhāsitaṁ abhinandunti.
Acchariyabbhūtadhammasuttaṁ niṭṭhitaṁ tatiyaṁ.
-----------
Bakkulattheracchariyabbhūtasuttaṁ 1

[380] Evamme sutaṁ ekaṁ samayaṁ āyasmā bakkulo 2 rājagahe
viharati veḷuvane kalandakanivāpe. Atha kho acelo kassapo
āyasmato bakkulassa purāṇagihisahāyo yenāyasmā bakkulo
tenupasaṅkami upasaṅkamitvā āyasmatā bakkulena saddhiṁ sammodi
sammodanīyaṁ kathaṁ sārāṇīyaṁ vītisāretvā ekamantaṁ nisīdi.
Ekamantaṁ nisinno kho acelo kassapo āyasmantaṁ bakkulaṁ etadavoca
kīvaciraṁ pabbajitosi āvuso bakkulāti. Asīti me āvuso vassāni
pabbajitassāti. Imehi pana te āvuso bakkula asītiyā vassehi
katikkhattuṁ methuno dhammo paṭisevitoti.

[381] Na kho maṁ āvuso kassapa evaṁ pucchitabbaṁ imehi pana
te āvuso bakkula asītiyā vassehi katikkhattuṁ methuno dhammo
paṭisevitoti evañca kho maṁ āvuso kassapa pucchitabbaṁ imehi pana
te āvuso bakkula asītiyā vassehi katikkhattuṁ kāmasaññā
uppannapubbāti. [3]- Asīti me āvuso 4 vassāni pabbajitassa
nābhijānāmi kāmasaññaṁ uppannapubbanti. Yampāyasmā bakkulo
asītiyā vassehi nābhijānāti kāmasaññaṁ uppannapubbaṁ idampi mayaṁ
āyasmato bakkulassa acchariyaṁ abbhūtadhammaṁ dhārema. Asīti me
1 Yu. bakkulasuttanti dissati. 2 Po. bakulo Ma. bākulo. 3 Yu. etthantare
imehi pana te āvuso bakkula asītiyā vassehi katikkhattuṁ kāmasaññā
uppannapubbātīti dissati. 4 kassapa.
Āvuso vassāni pabbajitassa nābhijānāmi byāpādasaññaṁ ...
Vihiṁsāsaññaṁ uppannapubbaṁ yampāyasmā bakkulo asītiyā vassehi
nābhijānāti vihiṁsāsaññaṁ uppannapubbaṁ idampi mayaṁ āyasmato
bakkulassa acchariyaṁ abbhūtadhammaṁ dhārema.

[382] Asīti me āvuso vassāni pabbajitassa nābhijānāmi
kāmavitakkaṁ uppannapubbaṁ. Yampāyasmā bakkulo asītiyā vassehi
nābhijānāti kāmavitakkaṁ uppannapubbaṁ idampi mayaṁ āyasmato
bakkulassa acchariyaṁ abbhūtadhammaṁ dhārema. Asīti me āvuso
vassāni pabbajitassa nābhijānāmi byāpādavitakkaṁ ... Vihiṁsāvitakkaṁ
uppannapubbaṁ. Yampāyasmā bakkulo asītiyā vassehi nābhijānāti
vihiṁsāvitakkaṁ uppannapubbaṁ idampi mayaṁ āyasmato bakkulassa
acchariyaṁ abbhūtadhammaṁ dhārema.