[353] Kathañcānanda antevāsūpaddavo hoti. Tasseva kho
panānanda satthu sāvako tassa satthu vivekamanubrūhayamāno vivittaṁ
senāsanaṁ bhajati araññaṁ rukkhamūlaṁ pabbataṁ kandaraṁ giriguhaṁ susānaṁ
vanapatthaṁ abbhokāsaṁ palālapuñjaṁ. Tassa tathāvūpakaṭṭhassa viharato
anvāvaṭṭanti brāhmaṇagahapatikā negamā ceva jānapadā ca. So
1 Ma. Yu. hetu. 2 brahmacariyūpaddavo. 3 Ma. anvāvaṭṭantesu.
4 Yu. mucchati. 5 Yu. upadduto.
Anvāvaṭṭesu brāhmaṇagahapatikesu negamesu ceva jānapadesu ca
mucchaṁ nikāmayati gedhaṁ āpajjati āvaṭṭati bāhullāya. Ayaṁ
vuccatānanda upaddavo antevāsī antevāsūpaddavena. Avadhiṁsu naṁ
pāpakā akusalā dhammā saṅkilesikā ponobbhavikā sadarā
dukkhavipākā āyatiṁ jātijarāmaraṇīyā. Evaṁ kho ānanda
antevāsūpaddavo hoti.

[354] Kathañcānanda brahmacārūpaddavo hoti. Idhānanda
tathāgato loke uppajjati arahaṁ sammāsambuddho vijjācaraṇasampanno
sugato lokavidū anuttaro purisadammasārathi satthā
devamanussānaṁ buddho bhagavā. So vivittaṁ senāsanaṁ bhajati araññaṁ
rukkhamūlaṁ pabbataṁ kandaraṁ giriguhaṁ susānaṁ vanapatthaṁ abbhokāsaṁ
palālapuñjaṁ. Tassa tathāvūpakaṭṭhassa viharato anvāvaṭṭanti
brāhmaṇagahapatikā negamā ceva jānapadā ca. So anvāvaṭṭesu
brāhmaṇagahapatikesu negamesu ceva jānapadesu ca na mucchaṁ nikāmayati na
gedhaṁ āpajjati na āvaṭṭati bāhullāya. Tasseva kho panānanda satthu
sāvako tassa satthu vivekamanubrūhayamāno 1 vivittaṁ senāsanaṁ bhajati
araññaṁ rukkhamūlaṁ pabbataṁ kandaraṁ giriguhaṁ susānaṁ vanapatthaṁ abbhokāsaṁ
palālapuñjaṁ. Tassa tathāvūpakaṭṭhassa viharato anvāvaṭṭanti
brāhmaṇagahapatikā negamā ceva jānapadā ca. So anvāvaṭṭesu
brāhmaṇagahapatikesu negamesu ceva jānapadesu ca mucchaṁ nikāmayati
1 Yu. vivekamanuyutto brūhayamāno.
Gedhaṁ āpajjati āvaṭṭati bāhullāya. Ayaṁ vuccati ānanda upaddavo
brahmacārī brahmacārūpaddavena. Avadhiṁsu naṁ pāpakā akusalā dhammā
saṅkilesikā ponobbhavikā sadarā dukkhavipākā āyatiṁ jātijarāmaraṇīyā.
Evaṁ kho ānanda brahmacārūpaddavo hoti. Tatrānanda
yo ceva ācariyūpaddavo yo ca antevāsūpaddavo ayaṁ tehi
brahmacārūpaddavo dukkhavipākataro ceva kaṭukavipākataro ca apica
vinipātāya saṁvattati. Tasmātiha maṁ ānanda mittavatāya samudācaratha
mā sapattavatāya taṁ vo bhavissati dīgharattaṁ hitāya sukhāya.

[355] Kathañcānanda satthāraṁ sāvakā sapattavatāya samudācaranti
no mittavatāya. Idhānanda satthā sāvakānaṁ dhammaṁ deseti
anukampako hitesī anukampaṁ upādāya idaṁ vo hitāya idaṁ
vo sukhāyāti. Tassa sāvakā na sussusanti 1 na sotaṁ odahanti
na aññā cittaṁ 2 upaṭṭhapenti vokkamma ca satthu sāsanaṁ 3
vattanti. Evaṁ kho ānanda satthāraṁ sāvakā sapattavatāya
samudācaranti no mittavatāya.

[356] Kathañcānanda satthāraṁ sāvakā mittavatāya samudācaranti
no sapattavatāya. Idhānanda satthā sāvakānaṁ dhammaṁ deseti
anukampako hitesī anukampaṁ upādāya idaṁ vo hitāya idaṁ vo
sukhāyāti. Tassa sāvakā sussusanti sotaṁ odahanti aññā
1 Po. Ma. Yu. sussūsanti. 2 Yu. aññaṁ cittanti dissati. na iti na dissati.
3 Ma. Yu. sāsanāti dissati.
Cittaṁ 1 upaṭṭhapenti na ca vokkamma satthu sāsanaṁ vattanti.
Evaṁ kho ānanda satthāraṁ sāvakā mittavatāya samudācaranti no
sapattavatāya. Tasmātiha maṁ ānanda mittavatāya samudācaratha mā
sapattavatāya taṁ vo bhavissati dīgharattaṁ hitāya sukhāyāti. Na
te 2 ahaṁ ānanda tathā parakkamissāmi yathā kumbhakāro āmake
āmakamatte. Niggayhaniggayhāhaṁ ānanda vakkhāmi pavayhapavayhāhaṁ
ānanda vakkhāmi yo sāro so ṭhassatīti.
Idamavoca bhagavā attamano āyasmā ānando bhagavato
bhāsitaṁ abhinandīti.
Mahāsuññatasuttaṁ niṭṭhitaṁ dutiyaṁ.
---------
1 Yu. na aññaṁ cittanti dissati. 2 Ma. Yu. vo.
Acchariyabbhūtadhammasuttaṁ

[357] Evamme sutaṁ ekaṁ samayaṁ bhagavā sāvatthiyaṁ viharati
jetavane anāthapiṇḍikassa ārāme. Atha kho sambahulānaṁ bhikkhūnaṁ
pacchābhattaṁ piṇḍapātapaṭikkantānaṁ upaṭṭhānasālāyaṁ sannisinnānaṁ
sannipatitānaṁ ayamantarākathā udapādi acchariyaṁ āvuso abbhūtaṁ
āvuso tathāgatassa mahiddhikatā mahānubhāvakatā yatra hi nāma
tathāgato atīte buddhe parinibbute chinnapapañce chinnavaṭṭume
pariyādinnavaṭṭe sabbadukkhavītivatte jānissati evaṁjaccā te
bhagavanto ahesuṁ itipi evaṁnāmā te bhagavanto ahesuṁ itipi
evaṁgottā te bhagavanto ahesuṁ itipi evaṁsīlā te bhagavanto
ahesuṁ itipi evaṁdhammā te bhagavanto ahesuṁ itipi evaṁpaññā
te bhagavanto ahesuṁ itipi evaṁvihārī te bhagavanto ahesuṁ itipi
evaṁvimuttā te bhagavanto ahesuṁ itipīti. Evaṁ vutte āyasmā
ānando te bhikkhū etadavoca acchariyā ceva āvuso tathāgatā
acchariyadhammasamannāgatā ca abbhūtā ceva āvuso tathāgatā
abbhūtadhammasamannāgatā cāti. Ayañca hidaṁ tesaṁ bhikkhūnaṁ ayaṁ 1
antarākathā vippakatā hoti.

[358] Atha bhagavā sāyaṇhasamayaṁ paṭisallānā vuṭṭhito
yenupaṭṭhānasālā tenupasaṅkami upasaṅkamitvā paññatte āsane
1 ayaṁsaddo sabbattha natthi.
Nisīdi. Nisajja kho bhagavā bhikkhū āmantesi kāya nuttha bhikkhave
etarahi kathāya sannisinnā kā ca pana vo antarākathā vippakatāti.
Idha bhante amhākaṁ pacchābhattaṁ piṇḍapātapaṭikkantānaṁ upaṭṭhānasālāyaṁ
sannisinnānaṁ sannipatitānaṁ ayamantarākathā udapādi acchariyaṁ
āvuso abbhūtaṁ āvuso tathāgatassa mahiddhikatā mahānubhāvakatā
yatra hi nāma tathāgato atīte buddhe parinibbute chinnapapañce
chinnavaṭṭume pariyādinnavaṭṭe sabbadukkhavītivatte jānissati 1 evaṁjaccā
te bhagavanto ahesuṁ itipi evaṁnāmā ... Evaṁgottā ...
Evaṁsīlā ... Evaṁdhammā ... Evaṁpaññā ... Evaṁvihārī ... Evaṁvimuttā
te bhagavanto ahesuṁ itipīti evaṁ vutte bhante āyasmā ānando
amhe etadavoca acchariyā ceva āvuso tathāgatā acchariyadhammasamannāgatā
ca abbhūtā ceva āvuso tathāgatā abbhūtadhammasamannāgatā
cāti ayaṁ kho no bhante antarākathā vippakatā
atha bhagavā anuppattoti.

[359] Atha kho bhagavā āyasmantaṁ ānandaṁ āmantesi
tasmātiha taṁ ānanda bhiyyoso mattāya paṭibhantu tathāgatassa
acchariyā abbhūtadhammāti.

[360] Sammukhā metaṁ bhante bhagavato sutaṁ sammukhā paṭiggahitaṁ
sato sampajāno ānanda bodhisatto tusitaṁ kāyaṁ upapajjīti.
Yampi bhante sato sampajāno bodhisatto tusitaṁ kāyaṁ upapajji
1 Po. anussarissati.
Idaṁpahaṁ bhante bhagavato acchariyaṁ abbhūtadhammaṁ dhāremi.

[361] Sammukhā metaṁ bhante bhagavato sutaṁ sammukhā paṭiggahitaṁ
sato sampajāno ānanda bodhisatto tusite kāye aṭṭhāsīti.
Yampi bhante sato sampajāno bodhisatto tusite kāye aṭṭhāsi
idaṁpahaṁ bhante bhagavato acchariyaṁ abbhūtadhammaṁ dhāremi.

[362] Sammukhā metaṁ bhante bhagavato sutaṁ sammukhā paṭiggahitaṁ
yāvatāyukaṁ ānanda bodhisatto tusite kāye aṭṭhāsīti. Yampi
bhante yāvatāyukaṁ bodhisatto tusite kāye aṭṭhāsi idaṁpahaṁ
bhante bhagavato acchariyaṁ abbhūtadhammaṁ dhāremi.