[223] Kathaṁrūpaṁ sārīputta kāyasamācāraṁ sevato akusalā dhammā
parihāyanti kusalā dhammā abhivaḍḍhanti. Idha sārīputta ekacco
Pāṇātipātaṁ pahāya pāṇātipātā paṭivirato hoti nihitadaṇḍo
nihitasattho lajjī dayāpanno sabbapāṇabhūtahitānukampī viharati
adinnādānaṁ pahāya adinnādānā paṭivirato hoti yantaṁ parassa
paravittūpakaraṇaṁ gāmagataṁ vā araññagataṁ vā taṁ adinnaṁ theyyasaṅkhātaṁ
na ādātā hoti kāmesu micchācāraṁ pahāya kāmesu micchācārā
paṭivirato hoti yā tā māturakkhitā piturakkhitā mātāpiturakkhitā
bhāturakkhitā bhaginirakkhitā ñātirakkhitā sassāmikā saparidaṇḍā
antamaso mālāguṇaparikkhittāpi tathārūpāsu na cārittaṁ āpajjitā
hoti. Evarūpaṁ sārīputta kāyasamācāraṁ sevato akusalā dhammā
parihāyanti kusalā dhammā abhivaḍḍhanti. Kāyasamācāraṁpahaṁ bhikkhave
duvidhena vadāmi sevitabbampi asevitabbampi tañca aññamaññaṁ
kāyasamācāranti iti yantaṁ vuttaṁ mayā idametaṁ paṭicca vuttaṁ.

[224] Vacīsamācāraṁpahaṁ bhikkhave ... Manosamācāraṁpahaṁ bhikkhave
... Cittuppādaṁpahaṁ bhikkhave ... Saññāpaṭilābhaṁpahaṁ bhikkhave ...
Diṭṭhipaṭilābhaṁpahaṁ bhikkhave ... Attabhāvapaṭilābhaṁpahaṁ bhikkhave duvidhena
vadāmi sevitabbampi asevitabbampi tañca aññamaññaṁ
attabhāvapaṭilābhanti iti kho panetaṁ vuttaṁ mayā kiñcetaṁ paṭicca
vuttaṁ. Yathārūpaṁ sārīputta attabhāvapaṭilābhaṁ sevato akusalā
dhammā abhivaḍḍhanti kusalā dhammā parihāyanti evarūpo
attabhāvapaṭilābho na sevitabbo. Yathārūpañca kho sārīputta
Attabhāvapaṭilābhaṁ sevato akusalā dhammā parihāyanti kusalā
dhammā abhivaḍḍhanti evarūpo attabhāvapaṭilābho sevitabbo.

[225] Kathaṁrūpaṁ sārīputta attabhāvapaṭilābhaṁ sevato akusalā
dhammā abhivaḍḍhanti kusalā dhammā parihāyanti. Sabyāpajjhaṁ
sārīputta attabhāvapaṭilābhaṁ abhinibbattassa yato apariniṭṭhitabhāvāya
akusalā dhammā abhivaḍḍhanti kusalā dhammā parihāyanti.

[226] Kathaṁrūpaṁ sārīputta attabhāvapaṭilābhaṁ sevato akusalā
dhammā parihāyanti kusalā dhammā abhivaḍḍhanti. Abyāpajjhaṁ
sārīputta attabhāvapaṭilābhaṁ abhinibbattassa yato pariniṭṭhitabhāvāya
akusalā dhammā parihāyanti kusalā dhammā abhivaḍḍhanti. Attabhāvapaṭilābhaṁpahaṁ
bhikkhave duvidhena vadāmi sevitabbampi asevitabbampi
tañca aññamaññaṁ attabhāvapaṭilābhanti iti yantaṁ vuttaṁ mayā
idametaṁ paṭicca vuttaṁ. Imassa kho sārīputta mayā saṅkhittena
bhāsitassa [1]- vitthārena atthaṁ avibhattassa evaṁ vitthārena attho
daṭṭhabbo.

[227] Cakkhuviññeyyaṁ rūpaṁpahaṁ sārīputta duvidhena vadāmi
sevitabbampi asevitabbampi sotaviññeyyaṁ saddaṁpahaṁ sārīputta
duvidhena vadāmi sevitabbampi asevitabbampi ghānaviññeyyaṁ gandhaṁpahaṁ
sārīputta duvidhena vadāmi sevitabbampi asevitabbampi jivhāviññeyyaṁ
rasaṁpahaṁ sārīputta duvidhena vadāmi sevitabbampi asevitabbampi
1 Po. Ma. Yu. etthantare evaṁsaddo atthi.
Kāyaviññeyyaṁ phoṭṭhabbaṁpahaṁ sārīputta duvidhena vadāmi sevitabbampi
asevitabbampi manoviññeyyaṁ dhammaṁpahaṁ sārīputta duvidhena vadāmi
sevitabbampi asevitabbampi.

[228] Evaṁ vutte āyasmā sārīputto bhagavantaṁ etadavoca
imassa kho bhante bhagavatā saṅkhittena bhāsitassa vitthārena atthaṁ
avibhattassa evaṁ vitthārena atthaṁ ājānāmi cakkhuviññeyyaṁ rūpaṁpahaṁ
sārīputta duvidhena vadāmi sevitabbampi asevitabbampīti iti kho
panetaṁ vuttaṁ bhagavatā kiñcetaṁ paṭicca vuttaṁ. Yathārūpaṁ bhante
cakkhuviññeyyaṁ rūpaṁ sevato akusalā dhammā abhivaḍḍhanti kusalā
dhammā parihāyanti evarūpaṁ cakkhuviññeyyaṁ rūpaṁ na sevitabbaṁ.
Yathārūpañca kho bhante cakkhuviññeyyaṁ rūpaṁ sevato akusalā dhammā
parihāyanti kusalā dhammā abhivaḍḍhanti evarūpaṁ cakkhuviññeyyaṁ
rūpaṁ sevitabbaṁ. Cakkhuviññeyyaṁ rūpaṁpahaṁ sārīputta duvidhena vadāmi
sevitabbampi asevitabbampīti iti yantaṁ vuttaṁ bhagavatā idametaṁ
paṭicca vuttaṁ .pe. Evarūpo sotaviññeyyo saddo na sevitabbo
.pe. Evarūpo sotaviññeyyo saddo sevitabbo .pe. Evarūpo
ghānaviññeyyo gandho na sevitabbo .pe. Evarūpo
ghānaviññeyyo gandho sevitabbo .pe. Evarūpo jivhāviññeyyo
raso na sevitabbo .pe. Evarūpo jivhāviññeyyo sevitabbo
.pe. Evarūpo kāyaviññeyyo phoṭṭhabbo na sevitabbo .pe.
Evarūpo kāyaviññeyyo phoṭṭhabbo sevitabbo .pe. Manoviññeyyaṁ
dhammaṁpahaṁ sārīputta duvidhena vadāmi sevitabbampi asevitabbampi
iti kho panetaṁ vuttaṁ bhagavatā kiñcetaṁ paṭicca vuttaṁ.
Yathārūpaṁ bhante manoviññeyyaṁ dhammaṁ sevato akusalā dhammā
abhivaḍḍhanti kusalā dhammā parihāyanti evarūpo manoviññeyyo
dhammo na sevitabbo. Yathārūpañca kho bhante manoviññeyyaṁ dhammaṁ
sevato akusalā dhammā parihāyanti kusalā dhammā abhivaḍḍhanti
evarūpo manoviññeyyo dhammo sevitabbo. Manoviññeyyaṁ
dhammaṁpahaṁ sārīputta duvidhena vadāmi sevitabbampi asevitabbampīti iti
yantaṁ vuttaṁ bhagavatā idametaṁ paṭicca vuttaṁ. Imassa kho
bhante bhagavatā saṅkhittena bhāsitassa vitthārena atthaṁ avibhattassa
evaṁ vitthārena atthaṁ ājānāmīti.

[229] Sādhu sādhu sārīputta sādhu kho tvaṁ sārīputta imassa
mayā saṅkhittena bhāsitassa vitthārena atthaṁ avibhattassa evaṁ
vitthārena atthaṁ ājānāsi. Cakkhuviññeyyaṁ rūpaṁpahaṁ sārīputta
duvidhena vadāmi sevitabbampi asevitabbampīti iti kho panetaṁ vuttaṁ
mayā kiñcetaṁ paṭicca vuttaṁ. Yathārūpaṁ sārīputta cakkhuviññeyyaṁ
rūpaṁ sevato akusalā dhammā abhivaḍḍhanti kusalā dhammā parihāyanti
evaṁ cakkhuviññeyyaṁ rūpaṁ na sevitabbaṁ. Yathārūpañca kho sārīputta
cakkhuviññeyyaṁ rūpaṁ sevato akusalā dhammā parihāyanti kusalā
Dhammā abhivaḍḍhanti evarūpaṁ cakkhuviññeyyaṁ rūpaṁ sevitabbaṁ. Cakkhuviññeyyaṁ
rūpaṁpahaṁ sārīputta duvidhena vadāmi sevitabbampi asevitabbampīti
iti yantaṁ vuttaṁ mayā idametaṁ paṭicca vuttaṁ .pe.
Evarūpo sotaviññeyyo saddo na sevitabbo .pe. Evarūpo
sotaviññeyyo saddo sevitabbo .pe. Evarūpo ghānaviññeyyo
gandho na sevitabbo .pe. Evarūpo ghānaviññeyyo gandho
sevitabbo .pe. Evarūpo jivhāviññeyyo raso na sevitabbo
.pe. Evarūpo jivhāviññeyyo raso sevitabbo .pe. Evarūpo
kāyaviññeyyo phoṭṭhabbo na sevitabbo .pe. Evarūpo
kāyaviññeyyo phoṭṭhabbo sevitabbo .pe. Manoviññeyyaṁ dhammaṁpahaṁ
sārīputta duvidhena vadāmi sevitabbampi asevitabbampīti iti kho panetaṁ
vuttaṁ mayā kiñcetaṁ paṭicca vuttaṁ. Yathārūpaṁ sārīputta
manoviññeyyaṁ dhammaṁ sevato akusalā dhammā abhivaḍḍhanti kusalā
dhammā parihāyanti evarūpo manoviññeyyo dhammo na sevitabbo.
Yathārūpañca kho sārīputta manoviññeyyaṁ dhammaṁ sevato akusalā dhammā
parihāyanti kusalā dhammā abhivaḍḍhanti evarūpo manoviññeyyo
dhammo sevitabbo. Manoviññeyyaṁ dhammaṁpahaṁ sārīputta duvidhena
vadāmi sevitabbampi asevitabbampīti iti yantaṁ vuttaṁ mayā idametaṁ
paṭicca vuttaṁ. Imassa kho sārīputta mayā saṅkhittena bhāsitassa
evaṁ vitthārena attho daṭṭhabbo.

[230] Cīvaraṁpahaṁ sārīputta duvidhena vadāmi sevitabbampi
asevitabbampi piṇḍapātaṁpahaṁ sārīputta duvidhena vadāmi sevitabbampi
asevitabbampi senāsanaṁpahaṁ sārīputta duvidhena vadāmi sevitabbampi
asevitabbampi gāmaṁpahaṁ sārīputta duvidhena vadāmi sevitabbampi
asevitabbampi nigamaṁpahaṁ sārīputta duvidhena vadāmi sevitabbampi
asevitabbampi nagaraṁpahaṁ sārīputta duvidhena vadāmi sevitabbampi
asevitabbampi janapadaṁpahaṁ sārīputta duvidhena vadāmi sevitabbampi
asevitabbampi puggalaṁpahaṁ sārīputta duvidhena vadāmi sevitabbampi
asevitabbampīti.

[231] Evaṁ vutte āyasmā sārīputto bhagavantaṁ etadavoca
imassa kho ahaṁ bhante bhagavatā saṅkhittena bhāsitassa vitthārena
atthaṁ avibhattassa evaṁ vitthārena atthaṁ ājānāmi cīvaraṁpahaṁ
sārīputta duvidhena vadāmi sevitabbampi asevitabbampīti iti kho
panetaṁ vuttaṁ bhagavatā kiñcetaṁ paṭicca vuttaṁ. Yathārūpaṁ bhante
cīvaraṁ sevato akusalā dhammā abhivaḍḍhanti kusalā dhammā parihāyanti
evarūpaṁ cīvaraṁ na sevitabbaṁ. Yathārūpañca kho bhante cīvaraṁ sevato
akusalā dhammā parihāyanti kusalā dhammā abhivaḍḍhanti evarūpaṁ
cīvaraṁ sevitabbaṁ. Cīvaraṁpahaṁ sārīputta duvidhena vadāmi sevitabbampi
asevitabbampīti iti yantaṁ vuttaṁ bhagavatā idametaṁ paṭicca vuttaṁ
.pe. Evarūpo piṇḍapāto na sevitabbo .pe. Evarūpo
Piṇḍapāto sevitabbo .pe. Evarūpaṁ senāsanaṁ na sevitabbaṁ .pe.
Evarūpaṁ senāsanaṁ sevitabbaṁ .pe. Evarūpo gāmo na sevitabbo
.pe. Evarūpo gāmo sevitabbo .pe. Evarūpo nigamo na
sevitabbo .pe. Evarūpo nigamo sevitabbo .pe. Evarūpaṁ
nagaraṁ na sevitabbaṁ .pe. Evarūpaṁ nagaraṁ sevitabbaṁ .pe.
Evarūpo janapado na sevitabbo .pe. Evarūpo janapado
sevitabbo .pe. Puggalaṁpahaṁ sārīputta duvidhena vadāmi sevitabbampi
asevitabbampīti iti kho panetaṁ vuttaṁ bhagavatā kiñcetaṁ paṭicca
vuttaṁ. Yathārūpaṁ bhante puggalaṁ sevato akusalā dhammā abhivaḍḍhanti
kusalā dhammā parihāyanti evarūpo puggalo na sevitabbo.
Yathārūpañca kho bhante puggalaṁ sevato akusalā dhammā parihāyanti
kusalā dhammā abhivaḍḍhanti evarūpo puggalo sevitabbo.
Puggalaṁpahaṁ sārīputta duvidhena vadāmi sevitabbampi asevitabbampīti
iti yantaṁ vuttaṁ bhagavatā idametaṁ paṭicca vuttanti. Imassa
kho ahaṁ bhante 1 saṅkhittena bhāsitassa vitthārena atthaṁ avibhattassa
evaṁ vitthārena atthaṁ ājānāmīti.

[232] Sādhu sādhu sārīputta sādhu kho tvaṁ sārīputta imassa
mayā saṅkhittena bhāsitassa vitthārena atthaṁ avibhattassa evaṁ
vitthārena atthaṁ ājānāsi. Cīvaraṁpahaṁ sārīputta duvidhena vadāmi
sevitabbampi asevitabbampīti iti kho panetaṁ vuttaṁ mayā kiñcetaṁ
1 Ma. Yu. bhagavatā.
Paṭicca vuttaṁ. Yathārūpaṁ sārīputta cīvaraṁ sevato akusalā dhammā
abhivaḍḍhanti kusalā dhammā parihāyanti evarūpaṁ cīvaraṁ na
sevitabbaṁ. Yathārūpañca kho sārīputta cīvaraṁ sevato akusalā dhammā
parihāyanti kusalā dhammā abhivaḍḍhanti evarūpaṁ cīvaraṁ sevitabbaṁ.
Cīvaraṁpahaṁ sārīputta duvidhena vadāmi sevitabbampi asevitabbampīti
iti yantaṁ vuttaṁ mayā idametaṁ paṭicca vuttaṁ .pe. Evarūpo
piṇḍapāto na sevitabbo .pe. Evarūpo piṇḍapāto
sevitabbo .pe. Evarūpaṁ senāsanaṁ na sevitabbaṁ .pe. Evarūpaṁ
senāsanaṁ sevitabbaṁ .pe. Evarūpo gāmo na sevitabbo .pe.
Evarūpo gāmo sevitabbo .pe. Evarūpo nigamo na sevitabbo
.pe. Evarūpo nigamo sevitabbo .pe. Evarūpo janapado na
sevitabbo .pe. Evarūpo janapado sevitabbo .pe. Puggalaṁpahaṁ
sārīputta duvidhena vadāmi sevitabbampi asevitabbampīti iti kho
panetaṁ vuttaṁ mayā kiñcetaṁ paṭicca vuttaṁ. Yathārūpaṁ sārīputta
puggalaṁ sevato akusalā dhammā abhivaḍḍhanti kusalā dhammā
parihāyanti evarūpo puggalo na sevitabbo. Yathārūpañca kho
sārīputta puggalaṁ sevato akusalā dhammā parihāyanti kusalā
dhammā abhivaḍḍhanti evarūpo puggalo sevitabbo. Puggalaṁpahaṁ
sārīputta duvidhena vadāmi sevitabbampi asevitabbampīti iti yantaṁ
vuttaṁ mayā idametaṁ paṭicca vuttaṁ. Imassa kho sārīputta
Mayā saṅkhittena bhāsitassa evaṁ vitthārena attho daṭṭhabbo.