[82] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā
bhikkhū bhagavatā paṭikkhittaṁ suddhakāḷakānaṁ eḷakalomānaṁ santhataṁ
kārāpetunti [1]- thokaṁyeva odātaṁ ante ādiyitvā tatheva
suddhakāḷakānaṁ eḷakalomānaṁ santhataṁ kārāpenti. Ye te bhikkhū
appicchā .pe. Te ujjhāyanti khīyanti vipācenti kathaṁ hi
nāma chabbaggiyā bhikkhū thokaṁyeva odātaṁ ante ādiyitvā
tatheva suddhakāḷakānaṁ eḷakalomānaṁ santhataṁ kārāpessantīti.
Athakho te bhikkhū bhagavato etamatthaṁ ārocesuṁ. Saccaṁ kira tumhe
bhikkhave thokaṁyeva odātaṁ ante ādiyitvā tatheva suddhakāḷakānaṁ
eḷakalomānaṁ santhataṁ kārāpethāti. Saccaṁ bhagavāti. Vigarahi
buddho bhagavā kathaṁ hi nāma tumhe moghapurisā thokaṁyeva odātaṁ
ante ādiyitvā tatheva suddhakāḷakānaṁ eḷakalomānaṁ santhataṁ
kārāpessatha netaṁ moghapurisā appasannānaṁ vā pasādāya pasannānaṁ
vā bhiyyobhāvāya .pe. Evañca pana bhikkhave imaṁ sikkhāpadaṁ
uddiseyyātha navaṁ pana bhikkhunā santhataṁ kārayamānena dve bhāgā
suddhakāḷakānaṁ eḷakalomānaṁ ādātababā tatiyaṁ odātānaṁ catutthaṁ
1 Ma. Yu. te.
Gocariyānaṁ. Anādā ce bhikkhu dve bhāge suddhakāḷakānaṁ
eḷakalomānaṁ tatiyaṁ odātānaṁ catutthaṁ gocariyānaṁ navaṁ santhataṁ
kārāpeyya nissaggiyaṁ pācittiyanti.

[83] Navaṁ nāma karaṇaṁ upādāya vuccati. Santhataṁ nāma
santharitvā kataṁ hoti avāyimaṁ. Kārayamānenāti karonto vā
kārāpento vā. Dve bhāgā suddhakāḷakānaṁ eḷakalomānaṁ
ādātabbāti dhārayitvā dve tulā suddhakāḷakānaṁ eḷakalomānaṁ 1
ādātabbā. Tatiyaṁ odātānanti tulaṁ odātānaṁ. Catutthaṁ
gocariyānanti tulaṁ gocariyānaṁ. Anādā ce bhikkhu dve bhāge
suddhakāḷakānaṁ eḷakalomānaṁ tatiyaṁ odātānaṁ catutthaṁ gocariyānanti
anādiyitvā [2]- tulaṁ odātānaṁ tulaṁ gocariyānaṁ navaṁ santhataṁ karoti
vā kārāpeti vā payoge dukkaṭaṁ paṭilābhena nissaggiyaṁ hoti
nissajjitabbaṁ saṅghassa vā gaṇassa vā puggalassa vā. Evañca
pana bhikkhave nissajjitabbaṁ .pe. Idaṁ me bhante santhataṁ
anādiyitvā [2]- tulaṁ odātānaṁ tulaṁ gocariyānaṁ kārāpitaṁ nissaggiyaṁ
imāhaṁ saṅghassa nissajjāmīti .pe. Dadeyyāti .pe.
Dadeyyunti .pe. Āyasmato dammīti.

[84] Attanā vippakataṁ attanā pariyosāpeti nissaggiyaṁ
pācittiyaṁ. Attanā vippakataṁ parehi pariyosāpeti nissaggiyaṁ
pācittiyaṁ. Parehi vippakataṁ attanā pariyosāpeti nissaggiyaṁ
1 Ma. Yu. idaṁ pāṭhadvayaṁ natthi. 2 Ma. dve tule suddhakāḷakānaṁ eḷakalomānaṁ.
Pācittiyaṁ. Parehi vippakataṁ parehi pariyosāpeti nissaggiyaṁ
pācittiyaṁ. Aññassatthāya karoti vā kārāpeti vā āpatti
dukkaṭassa. Aññena kataṁ paṭilabhitvā paribhuñjati āpatti
dukkaṭassa.

[85] Anāpatti tulaṁ odātānaṁ tulaṁ gocariyānaṁ ādiyitvā
karoti bahutaraṁ odātānaṁ bahutaraṁ gocariyānaṁ ādiyitvā karoti
suddhaṁ odātānaṁ suddhaṁ gocariyānaṁ ādiyitvā karoti vitānaṁ vā
bhummattharaṇaṁ vā sāṇipākāraṁ vā bhisiṁ vā bimbohanaṁ vā karoti
ummattakassa ādikammikassāti.
Tatiyasikkhāpadaṁ niṭṭhitaṁ.
-------
Catutthasikkhāpadaṁ

[86] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhikkhū anuvassaṁ
santhataṁ kārāpenti. Te yācanabahulā viññattibahulā viharanti
eḷakalomāni detha eḷakalomehi atthoti. Manussā ujjhāyanti
khīyanti vipācenti kathaṁ hi nāma samaṇā sakyaputtiyā anuvassaṁ
santhataṁ kārāpessanti yācanabahulā viññattibahulā viharissanti
eḷakalomāni detha eḷakalomehi atthoti amhākaṁ pana sakiṁ
katāni santhatāni pañcapi chapi vassāni honti yesaṁ no dārakā
ūhadantipi 1 ummihantipi undurehipi 2 khajjanti ime pana samaṇā
sakyaputtiyā anuvassaṁ santhataṁ kārāpessanti yācanabahulā viññattibahulā
viharissanti eḷakalomāni detha eḷakalomehi atthoti.
Assosuṁ kho bhikkhū tesaṁ manussānaṁ ujjhāyantānaṁ khīyantānaṁ
vipācentānaṁ. Ye te bhikkhū appicchā .pe. Te ujjhāyanti
khīyanti vipācenti kathaṁ hi nāma bhikkhū anuvassaṁ santhataṁ
kārāpessanti yācanabahulā viññattibahulā viharissanti eḷakalomāni
detha eḷakalomehi atthoti. Athakho te bhikkhū bhagavato etamatthaṁ
ārocesuṁ. Saccaṁ kira bhikkhave bhikkhū anuvassaṁ santhataṁ kārāpenti
yācanabahulā viññattibahulā viharanti eḷakalomāni detha
1 Ma. uhadantipi. 2 Ma. undūrehipi.
Eḷakalomehi atthoti. Saccaṁ bhagavāti. Vigarahi buddho bhagavā kathaṁ
hi nāma te bhikkhave moghapurisā anuvassaṁ santhataṁ kārāpessanti
yācanabahulā viññattibahulā viharissanti eḷakalomāni detha
eḷakalomehi atthoti netaṁ bhikkhave appasannānaṁ vā pasādāya
pasannānaṁ vā bhiyyobhāvāya .pe. Evañca pana bhikkhave imaṁ
sikkhāpadaṁ uddiseyyātha navaṁ pana bhikkhunā santhataṁ kārāpetvā
chabbassāni dhāretabbaṁ. Orena ce channaṁ vassānaṁ taṁ santhataṁ
vissajjetvā vā avissajjetvā vā aññaṁ navaṁ santhataṁ kārāpeyya
nissaggiyaṁ pācittiyanti. Evañcidaṁ bhagavatā bhikkhūnaṁ sikkhāpadaṁ
paññattaṁ hoti.

[87] Tena kho pana samayena aññataro bhikkhu kosambiyaṁ
gilāno hoti. Ñātakā tassa bhikkhuno santike dūtaṁ pāhesuṁ
āgacchatu bhaddanto 1 mayaṁ upaṭṭhahissāmāti. Bhikkhūpi evamāhaṁsu
gacchāvuso ñātakā taṁ upaṭṭhahissantīti. So evamāha bhagavatā
āvuso sikkhāpadaṁ paññattaṁ navaṁ pana bhikkhunā santhataṁ kārāpetvā
chabbassāni dhāretabbanti ahañcamhi gilāno na sakkomi santhataṁ
ādāya pakkamituṁ mayhañca vinā santhatā na phāsu hoti nāhaṁ
gamissāmīti. Bhagavato etamatthaṁ ārocesuṁ. Athakho bhagavā
etasmiṁ nidāne etasmiṁ pakaraṇe dhammiṁ kathaṁ katvā bhikkhū āmantesi
anujānāmi bhikkhave gilānassa bhikkhuno santhatasammatiṁ dātuṁ evañca
1 Ma. bhadanto. evamuparipi.
Pana bhikkhave dātabbā tena gilānena bhikkhunā saṅghaṁ upasaṅkamitvā
ekaṁsaṁ uttarāsaṅgaṁ karitvā vuḍḍhānaṁ bhikkhūnaṁ pāde vanditvā
ukkuṭikaṁ nisīditvā añjaliṁ paggahetvā evamassa vacanīyo ahaṁ
bhante gilāno na sakkomi santhataṁ ādāya pakkamituṁ sohaṁ
bhante saṅghaṁ santhatasammatiṁ yācāmīti. Dutiyampi yācitabbā
tatiyampi yācitabbā. Byattena bhikkhunā paṭibalena saṅgho
ñāpetabbo suṇātu me bhante saṅgho ayaṁ itthannāmo bhikkhu
gilāno na sakkoti santhataṁ ādāya pakkamituṁ. So saṅghaṁ
santhatasammatiṁ yācati. Yadi saṅghassa pattakallaṁ saṅgho itthannāmassa
bhikkhuno santhatasammatiṁ dadeyya. Esā ñatti. Suṇātu me
bhante saṅgho ayaṁ itthannāmo bhikkhu gilāno na sakkoti
santhataṁ ādāya pakkamituṁ. So saṅghaṁ santhatasammatiṁ yācati.
Saṅgho itthannāmassa bhikkhuno santhatasammatiṁ deti. Yassāyasmato
khamati itthannāmassa bhikkhuno santhatasammatiyā dānaṁ so tuṇhassa
yassa nakkhamati so bhāseyya. Dinnā saṅghena itthannāmassa
bhikkhuno santhatasammati. Khamati saṅghassa tasmā tuṇhī.
Evametaṁ dhārayāmīti. Evañca pana bhikkhave imaṁ sikkhāpadaṁ
uddiseyyātha navaṁ pana bhikkhunā santhataṁ kārāpetvā chabbassāni
dhāretabbaṁ. Orena ce channaṁ vassānaṁ taṁ santhataṁ vissajjetvā
vā avissajjetvā vā aññaṁ navaṁ santhataṁ kārāpeyya aññatra
Bhikkhusammatiyā nissaggiyaṁ pācittiyanti.

[88] Navaṁ nāma karaṇaṁ upādāya vuccati. Santhataṁ nāma
santharitvā kataṁ hoti avāyimaṁ. Kārāpetvāti karitvā vā
kārāpetvā vā. Chabbassāni dhāretabbanti chabbassaparamatā
dhāretabbaṁ. Orena ce channaṁ vassānanti ūnakachabbassāni.
Taṁ santhataṁ vissajjetvā vāti aññesaṁ datvā. Avissajjetvā
vāti na kassaci datvā. Aññatra bhikkhusammatiyāti ṭhapetvā
bhikkhusammatiṁ. Aññaṁ navaṁ santhataṁ karoti vā kārāpeti vā
payoge dukkaṭaṁ paṭilābhena nissaggiyaṁ hoti nissajjitabbaṁ saṅghassa
vā gaṇassa vā puggalassa vā. Evañca pana bhikkhave nissajjitabbaṁ
.pe. Idaṁ me bhante santhataṁ ūnakachabbassāni kārāpitaṁ
aññatra bhikkhusammatiyā nissaggiyaṁ imāhaṁ saṅghassa nissajjāmīti .pe.
Dadeyyāti .pe. Dadeyyunti .pe. Āyasmato dammīti.

[89] Attanā vippakataṁ attanā pariyosāpeti nissaggiyaṁ
pācittiyaṁ. Attanā vippakataṁ parehi pariyosāpeti nissaggiyaṁ
pācittiyaṁ. Parehi vippakataṁ attanā pariyosāpeti nissaggiyaṁ
pācittiyaṁ. Parehi vippakataṁ parehi pariyosāpeti nissaggiyaṁ
pācittiyaṁ.

[90] Anāpatti chabbassāni karoti atirekachabbassāni karoti
aññassatthāya karoti vā kārāpeti vā aññena kataṁ paṭilabhitvā
Paribhuñjati vitānaṁ vā bhummattharaṇaṁ vā sāṇipākāraṁ vā bhisiṁ
vā bimbohanaṁ vā karoti bhikkhusammatiyā ummattakassa
ādikammikassāti.
Catutthasikkhāpadaṁ niṭṭhitaṁ.
-------
Pañcamasikkhāpadaṁ

[91] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Athakho bhagavā bhikkhū āmantesi
icchāmahaṁ bhikkhave temāsaṁ paṭisalliyituṁ namhi kenaci upasaṅkamitabbo
aññatra ekena piṇḍapātanīhārakenāti. Evaṁ bhanteti kho te
bhikkhū bhagavato paṭissuṇitvā nāssudha koci bhagavantaṁ upasaṅkamati
aññatra ekena piṇḍapātanīhārakena. Tena kho pana samayena
sāvatthiyaṁ saṅghena katikā katā hoti icchatāvuso bhagavā temāsaṁ
paṭisalliyituṁ na bhagavā kenaci upasaṅkamitabbo aññatra ekena
piṇḍapātanīhārakena yo bhagavantaṁ upasaṅkamati [1]- pācittiyaṁ
desāpetabboti.