[62] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena aññataro
puriso pajāpatiṁ etadavoca ayyaṁ upanandaṁ cīvarena acchādessāmīti.
Assosi kho aññataro piṇḍacāriko bhikkhu tassa purisassa imaṁ
vācaṁ bhāsamānassa. Athakho so bhikkhu yenāyasmā upanando
sakyaputto tenupasaṅkami upasaṅkamitvā āyasmantaṁ upanandaṁ sakyaputtaṁ
etadavoca mahāpuññosi tvaṁ āvuso upananda amukasmiṁ
okāse aññataro puriso pajāpatiṁ etadavoca ayyaṁ upanandaṁ
cīvarena acchādessāmīti. Atthāvuso maṁ so upaṭṭhākoti. Athakho
āyasmā upanando sakyaputto yena so puriso tenupasaṅkami
upasaṅkamitvā taṁ purisaṁ etadavoca saccaṁ kira maṁ tvaṁ āvuso
cīvarena acchādetukāmosīti. Api mayya 1 evaṁ hoti ayyaṁ upanandaṁ
cīvarena acchādessāmīti. Sace kho maṁ tvaṁ āvuso cīvarena
acchādetukāmosi evarūpena cīvarena acchādehi kyāhaṁ 2 tena
acchannopi karissāmi yāhaṁ 3 na paribhuñjissāmīti. Athakho so
puriso ujjhāyati khīyati vipāceti mahicchā ime samaṇā
sakyaputtiyā asantuṭṭhā nayime sukarā cīvarena acchādetuṁ kathaṁ
1 Ma. Yu. meyya. me ayyaiti dvīsupi vikappesu padacchedo.
3 yaṁ ahanti padacchedo.
Hi nāma ayyo upanando mayā pubbe appavārito [1]- upasaṅkamitvā
cīvare vikappaṁ āpajjissatīti. Assosuṁ kho bhikkhū tassa purisassa
ujjhāyantassa khīyantassa vipācentassa. Ye te bhikkhū appicchā
santuṭṭhā .pe. Te ujjhāyanti khīyanti vipācenti kathaṁ hi
nāma āyasmā upanando sakyaputto pubbe appavārito gahapatikaṁ
upasaṅkamitvā cīvare vikappaṁ āpajjissatīti. Athakho te bhikkhū
bhagavato etamatthaṁ ārocesuṁ. Saccaṁ kira tvaṁ upananda pubbe
appavārito gahapatikaṁ upasaṅkamitvā cīvare vikappaṁ āpajjasīti. Saccaṁ
bhagavāti. Ñātako te upananda aññātakoti. Aññātako
bhagavāti. Aññātako moghapurisa aññātakassa na jānāti paṭirūpaṁ
vā appaṭirūpaṁ vā santaṁ vā asantaṁ vā tattha nāma tvaṁ
moghapurisa pubbe appavārito aññātakaṁ gahapatikaṁ upasaṅkamitvā
cīvare vikappaṁ āpajjissasi netaṁ moghapurisa appasannānaṁ vā
pasādāya pasannānaṁ vā bhiyyobhāvāya .pe. Evañca pana bhikkhave
imaṁ sikkhāpadaṁ uddiseyyātha bhikkhuṁ paneva uddissa aññātakassa
gahapatissa vā gahapatāniyā vā cīvaracetāpanaṁ 2 upakkhaṭaṁ hoti
1 Ma. maṁ. 2 Ma. cīvaracetāpannaṁ. cīvaraṁ cetāpenti parivattenti etena
cīvaramūlenāti cīvaracetāpannaṁ. yadādinā suttena nāgamoti ganthiyaṁ vuttaṁ. tasmā
yebhuyyena cīvaracetāpannanti paṭhanti. taṁ pamāṇaṁ na hoti dvebhāvassa kāraṇābhāvato.
Iminā cīvaracetāpanena cīvaraṁ cetāpetvā itthannāmaṁ bhikkhuṁ cīvarena
acchādessāmīti. Tatra ce so bhikkhu pubbe appavārito
upasaṅkamitvā cīvare vikappaṁ āpajjeyya sādhu vata maṁ āyasmā
iminā cīvaracetāpanena evarūpaṁ vā evarūpaṁ vā cīvaraṁ cetāpetvā
acchādehīti kalyāṇakamyataṁ upādāya nissaggiyaṁ pācittiyanti.

[63] Bhikkhuṁ paneva uddissāti bhikkhussatthāya bhikkhuṁ ārammaṇaṁ
karitvā bhikkhuṁ acchādetukāmo. Aññātako nāma mātito vā
pitito vā yāva sattamā pitāmahayugā asambaddho. Gahapati
nāma yo koci agāraṁ ajjhāvasati. Gahapatānī nāma yā
kāci agāraṁ ajjhāvasati. Cīvaracetāpanaṁ nāma hiraññaṁ vā
suvaṇṇaṁ vā maṇi vā muttā vā masāragallaṁ 1 vā phaliko vā
paṭako vā suttaṁ vā kappāso vā. Iminā cīvaracetāpanenāti
paccupaṭṭhitena. Cetāpetvāti parivaṭṭetvā 2 . Acchādessāmīti
dassāmi. Tatra ce so bhikkhūti yaṁ bhikkhuṁ uddissa cīvaracetāpanaṁ
upakkhaṭaṁ hoti so bhikkhu. Pubbe appavāritoti pubbe avutto
hoti kīdisena te bhante cīvarena attho kīdisaṁ te cīvaraṁ
cetāpessāmīti 3 . Upasaṅkamitvāti gharaṁ gantvā yattha katthaci
1 Ma. Yu. muttā vā maṇi vā pavāḷo vā. 2 Ma. Yu. Rā. parivattetvā.
evamuparipi. 3 Ma. Yu. cetāpemīti.
Upasaṅkamitvā. Cīvare vikappaṁ āpajjeyyāti āyataṁ vā hotu
vitthataṁ vā appitaṁ vā saṇhaṁ vā. Iminā cīvaracetāpanenāti
paccupaṭṭhitena. Evarūpaṁ vā evarūpaṁ vāti āyataṁ vā vitthataṁ
vā appitaṁ vā saṇhaṁ vā. Cetāpetvāti parivaṭṭetvā.
Acchādehīti dajjehi. Kalyāṇakamyataṁ upādāyāti sādhutthiko 1
mahagghatthiko. Tassa vacanena āyataṁ vā vitthataṁ vā appitaṁ
vā saṇahaṁ vā cetāpeti payoge dukkaṭaṁ paṭilābhena nissaggiyaṁ
hoti nissajjitabbaṁ saṅghassa vā gaṇassa vā puggalassa vā.
Evañca pana bhikkhave nissajjitabbaṁ .pe. Idaṁ me bhante cīvaraṁ
pubbe appavārito aññātakaṁ gahapatikaṁ upasaṅkamitvā cīvare
vikappaṁ āpannaṁ nissaggiyaṁ imāhaṁ saṅghassa nissajjāmīti .pe.
Dadeyyāti .pe. Dadeyyunti .pe. Āyasmato dammīti.

[64] Aññātake aññātakasaññī pubbe appavārito gahapatikaṁ
upasaṅkamitvā cīvare vikappaṁ āpajjati nissaggiyaṁ pācittiyaṁ.
Aññātake vematiko pubbe appavārito gahapatikaṁ upasaṅkamitvā
cīvare vikappaṁ āpajjati nissaggiyaṁ pācittiyaṁ. Aññātake
ñātakasaññī pubbe appavārito gahapatikaṁ upasaṅkamitvā cīvare
vikappaṁ āpajjati nissaggiyaṁ pācittiyaṁ. Ñātake aññātakasaññī
āpatti dukkaṭassa. Ñātake vematiko āpatti dukkaṭassa.
Ñātake ñātakasaññī anāpatti.
1 Ma. Yu. sādhatthiko.

[65] Anāpatti ñātakānaṁ pavāritānaṁ aññassatthāya
attano dhanena mahagghaṁ cetāpetukāmassa appagghaṁ cetāpeti
ummattakassa ādikammikassāti.
Aṭṭhamasikkhāpadaṁ niṭṭhitaṁ.
-------
Navamasikkhāpadaṁ

[66] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena aññataro
puriso aññataraṁ purisaṁ etadavoca ayyaṁ upanandaṁ cīvarena
acchādessāmīti. Sopi evamāha ahampi ayyaṁ upanandaṁ cīvarena
acchādessāmīti. Assosi kho aññataro piṇḍacāriko bhikkhu
tesaṁ purisānaṁ imaṁ kathāsallāpaṁ. Athakho so bhikkhu yenāyasmā
upanando sakyaputto tenupasaṅkami upasaṅkamitvā āyasmantaṁ
upanandaṁ sakyaputtaṁ etadavoca mahāpuññosi tvaṁ āvuso upananda
amukasmiṁ okāse aññataro puriso aññataraṁ purisaṁ etadavoca
ayyaṁ upanandaṁ cīvarena acchādessāmīti sopi evamāha ahampi
ayyaṁ upanandaṁ cīvarena acchādessāmīti. Atthāvuso maṁ te
upaṭṭhākāti. Athakho āyasmā upanando sakyaputto yena
te purisā tenupasaṅkami upasaṅkamitvā te purise etadavoca
saccaṁ kira maṁ tumhe āvuso cīvarehi acchādetukāmatthāti. Api
nayya 1 evaṁ hoti ayyaṁ upanandaṁ cīvarehi acchādessāmāti. Sace
kho maṁ tumhe āvuso cīvarehi acchādetukāmattha evarūpena cīvarena
acchādetha kyāhaṁ tehi acchannopi karissāmi yānāhaṁ na
1 no ayya iti padacchedo.
Paribhuñjissāmīti. Athakho te purisā ujjhāyanti khīyanti vipācenti
mahicchā ime samaṇā sakyaputtiyā asantuṭṭhā nayime sukarā
cīvarehi acchādetuṁ kathaṁ hi nāma ayyo upanando amhehi
pubbe appavārito upasaṅkamitvā cīvare vikappaṁ āpajjissatīti.
Assosuṁ kho bhikkhū tesaṁ purisānaṁ ujjhāyantānaṁ khīyantānaṁ
vipācentānaṁ. Ye te bhikkhū appicchā .pe. Te ujjhāyanti
khīyanti vipācenti kathaṁ hi nāma āyasmā upanando sakyaputto
pubbe appavārito gahapatike upasaṅkamitvā cīvare vikappaṁ
āpajjissatīti. Athakho te bhikkhū bhagavato etamatthaṁ ārocesuṁ. Saccaṁ
kira tvaṁ upananda pubbe appavārito gahapatike upasaṅkamitvā
cīvare vikappaṁ āpajjasīti. Saccaṁ bhagavāti. Ñātakā te upananda
aññātakāti. Aññātakā bhagavāti. Aññātako moghapurisa
aññātakānaṁ na jānāti paṭirūpaṁ vā appaṭirūpaṁ vā santaṁ vā asantaṁ vā
tattha nāma tvaṁ moghapurisa pubbe appavārito aññātake gahapatike
upasaṅkamitvā cīvare vikappaṁ āpajjissasi netaṁ moghapurisa
appasannānaṁ vā pasādāya pasannānaṁ vā bhiyyobhāvāya .pe. Evañca
pana bhikkhave imaṁ sikkhāpadaṁ uddiseyyātha bhikkhuṁ paneva uddissa
ubhinnaṁ aññātakānaṁ gahapatīnaṁ vā gahapatānīnaṁ vā paccekacīvaracetāpanā
upakkhaṭā honti imehi mayaṁ paccekacīvaracetāpanehi
paccekacīvarāni cetāpetvā itthannāmaṁ bhikkhuṁ cīvarehi
Acchādessāmāti. Tatra ce so bhikkhu pubbe appavārito
upasaṅkamitvā cīvare vikappaṁ āpajjeyya sādhu vata maṁ āyasmanto
imehi paccekacīvaracetāpanehi evarūpaṁ vā evarūpaṁ vā cīvaraṁ
cetāpetvā acchādetha ubho va santā ekenāti kalyāṇakamyataṁ
upādāya nissaggiyaṁ pācittiyanti.

[67] Bhikkhuṁ paneva uddissāti bhikkhussatthāya bhikkhuṁ ārammaṇaṁ
karitvā bhikkhuṁ acchādetukāmā. Ubhinnanti dvinnaṁ. Aññātakā
nāma mātito vā pitito vā yāva sattamā pitāmahayugā asambaddhā.
Gahapatī nāma 1 ye keci agāraṁ ajjhāvasanti. Gahapatānī nāma 2
yā kāci agāraṁ ajjhāvasanti. Cīvaracetāpanā nāma hiraññā
vā suvaṇṇā vā maṇī vā muttā vā masāragallā 3 vā phalikā
vā paṭakā vā suttā vā kappāsā vā. Imehi cīvaracetāpanehīti
paccupaṭṭhitehi. Cetāpetvāti parivaṭṭetvā. Acchādessāmāti
dassāma. Tatra ce so bhikkhūti yaṁ bhikkhuṁ uddissa
cīvaracetāpanā upakkhaṭā honti so bhikkhu. Pubbe appavāritoti
pubbe avutto hoti kīdisena te bhante cīvarena attho kīdisaṁ
1 Yu. gahapatikā. 2 Ma. Yu. gahapatāniyo nāma. 3 Ma. Yu. muttā vā
maṇī vā pavāḷā vā.
Te cīvaraṁ cetāpessāmāti 1 . Upasaṅkamitvāti gharaṁ gantvā yattha
katthaci upasaṅkamitvā. Cīvare vikappaṁ āpajjeyyāti āyataṁ
vā hotu vitthataṁ vā appitaṁ vā saṇhaṁ vā. Imehi cīvaracetāpanehīti
paccupaṭṭhitehi. Evarūpaṁ vā evarūpaṁ vāti āyataṁ vā
vitthataṁ vā appitaṁ vā saṇhaṁ vā. Cetāpetvāti parivaṭṭetvā.
Acchādethāti dajjetha. Ubho va santā ekenāti dvepi ekena.
Kalyāṇakamyataṁ upādāyāti sādhutthiko mahagghatthiko. Tassa
vacanena āyataṁ vā vitthataṁ vā appitaṁ vā saṇhaṁ vā cetāpenti
payoge dukkaṭaṁ paṭilābhena nissaggiyaṁ hoti nissajjitabbaṁ saṅghassa
vā gaṇassa vā puggalassa vā. Evañca pana bhikkhave
nissajjitabbaṁ .pe. Idaṁ me bhante cīvaraṁ pubbe appavārito aññātake
gahapatike upasaṅkamitvā cīvare vikappaṁ āpannaṁ nissaggiyaṁ imāhaṁ
saṅghassa nissajjāmīti .pe. Dadeyyāti .pe. Dadeyyunti .pe.
Āyasmato dammīti.

[68] Aññātake aññātakasaññī pubbe appavārito gahapatike
upasaṅkamitvā cīvare vikappaṁ āpajjati nissaggiyaṁ pācittiyaṁ.
Aññātake vematiko pubbe appavārito gahapatike upasaṅkamitvā
cīvare vikappaṁ āpajjati nissaggiyaṁ pācittiyaṁ. Aññātake
ñātakasaññī pubbe appavārito gahapatike upasaṅkamitvā cīvare
1 Ma. Yu. cetāpemāti.
Vikappaṁ āpajjati nissaggiyaṁ pācittiyaṁ. Ñātake aññātakasaññī
āpatti dukkaṭassa. Ñātake vematiko āpatti
dukkaṭassa. Ñātake ñātakasaññī anāpatti.

[69] Anāpatti ñātakānaṁ pavāritānaṁ aññassatthāya
attano dhanena mahagghaṁ cetāpetukāmānaṁ appagghaṁ cetāpeti
ummattakassa ādikammikassāti.
Navamasikkhāpadaṁ niṭṭhitaṁ.
-------
Dasamasikkhāpadaṁ

[70] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena āyasmato
upanandassa sakyaputtassa upaṭṭhāko mahāmatto āyasmato
upanandassa sakyaputtassa dūtena cīvaracetāpanaṁ pāhesi iminā
cīvaracetāpanena cīvaraṁ cetāpetvā ayyaṁ upanandaṁ cīvarena acchādehīti.
Athakho so dūto yenāyasmā upanando sakyaputto tenupasaṅkami
upasaṅkamitvā āyasmantaṁ upanandaṁ sakyaputtaṁ etadavoca idaṁ kho
bhante āyasmantaṁ uddissa cīvaracetāpanaṁ ābhataṁ paṭiggaṇhātu
āyasmā cīvaracetāpananti. Evaṁ vutte āyasmā upanando
sakyaputto taṁ dūtaṁ etadavoca na kho mayaṁ āvuso cīvaracetāpanaṁ
paṭiggaṇhāma cīvarañca kho mayaṁ paṭiggaṇhāma kālena kappiyanti.
Evaṁ vutte so dūto āyasmantaṁ upanandaṁ sakyaputtaṁ etadavoca
atthi panāyasmato koci veyyāvaccakaroti. Tena kho pana samayena
aññataro upāsako ārāmaṁ agamāsi kenacideva karaṇīyena.
Athakho āyasmā upanando sakyaputto taṁ dūtaṁ etadavoca eso
kho āvuso upāsako bhikkhūnaṁ veyyāvaccakaroti. Athakho so
dūto taṁ upāsakaṁ saññāpetvā yenāyasmā upanando sakyaputto
Tenupasaṅkami upasaṅkamitvā āyasmantaṁ upanandaṁ sakyaputtaṁ etadavoca
yaṁ kho bhante āyasmā veyyāvaccakaraṁ niddisi saññatto so
mayā upasaṅkamatu āyasmā kālena cīvarena taṁ acchādessatīti [1]-.
Tena kho pana samayena 2 āyasmā upanando sakyaputto taṁ upāsakaṁ na
kiñci avacāsi. Dutiyampi kho so mahāmatto āyasmato
upanandassa sakyaputtassa santike dūtaṁ pāhesi paribhuñjatu ayyo
taṁ cīvaraṁ icchāma mayaṁ ayyena taṁ cīvaraṁ paribhuttanti. Dutiyampi
kho āyasmā upanando sakyaputto taṁ upāsakaṁ na kiñci avacāsi.
Tatiyampi kho so mahāmatto āyasmato upanandassa sakyaputtassa
santike dūtaṁ pāhesi paribhuñjatu ayyo taṁ cīvaraṁ icchāma mayaṁ
ayyena taṁ cīvaraṁ paribhuttanti. Tena kho pana samayena nigamassa 3
samayo hoti. Nigamena 4 ca katikā katā hoti yo pacchā
āgacchati paññāsambaddhoti 5 . Athakho āyasmā upanando
sakyaputto yena so upāsako tenupasaṅkami upasaṅkamitvā
taṁ upāsakaṁ etadavoca attho me āvuso cīvarenāti. Ajjuṇho
1 Ma. Yu. tena kho pana samayena so mahāmatto āyasmato upanandassa sakyaputtassa
santike dūtaṁ pāhesi paribhuñjatu ayyo taṁ cīvaraṁ icchāma mayaṁ ayyena taṁ cīvaraṁ
paribhuttanti. 2 Ma. Yu. athakho. 3 Ma. Yu. negamassa. 4 Ma. Yu. negamena.
5 Ma. Yu. paññāsaṁ baddhoti. evamuparipi.
Bhante āgamehi ajja nigamassa samayo nigamena ca katikā
katā hoti yo pacchā āgacchati paññāsambaddhoti. Ajjeva
me āvuso cīvaraṁ dehīti ovaṭṭikāya parāmasi. Athakho so
upāsako āyasmatā upanandena sakyaputtena nippīḷiyamāno
āyasmato upanandassa sakyaputtassa cīvaraṁ cetāpetvā pacchā
agamāsi. Manussā taṁ upāsakaṁ etadavocuṁ kissa tvaṁ ayya 1
pacchā āgato paññāsaṁ jinosīti. Athakho so upāsako
tesaṁ manussānaṁ etamatthaṁ ārocesi. Manussā ujjhāyanti khīyanti
vipācenti mahicchā ime samaṇā sakyaputtiyā asantuṭṭhā nayimesaṁ
sukaraṁ veyyāvaccaṁpi kātuṁ kathaṁ hi nāma upanando sakyaputto
upāsakena ajjuṇho bhante āgamehīti vuccamāno nāgamessatīti 2 .
Assosuṁ kho bhikkhū tesaṁ manussānaṁ ujjhāyantānaṁ khīyantānaṁ
vipācentānaṁ. Ye te bhikkhū appicchā .pe. Te ujjhāyanti
khīyanti vipācenti kathaṁ hi nāma āyasmā upanando sakyaputto
upāsakena ajjuṇho bhante āgamehīti vuccamāno nāgamessatīti 3 .
Athakho te bhikkhū bhagavato etamatthaṁ ārocesuṁ. Saccaṁ kira
tvaṁ upananda upāsakena ajjuṇho bhante āgamehīti vuccamāno
1 Ma. Yu. ayyo. 2 Yu. kathaṁ hi nāma upāsakena ... vuccamānā nāgamissantīti.
3 Yu. nāgamissatīti.
Nāgamesīti. Saccaṁ bhagavāti. Vigarahi buddho bhagavā kathaṁ hi
nāma tvaṁ moghapurisa upāsakena ajjuṇho bhante āgamehīti
vuccamāno nāgamessasi netaṁ moghapurisa appasannānaṁ vā pasādāya
pasannānaṁ vā bhiyyobhāvāya .pe. Evañca pana bhikkhave imaṁ
sikkhāpadaṁ uddiseyyātha bhikkhuṁ paneva uddissa rājā vā
rājabhoggo vā brāhmaṇo vā gahapatiko vā dūtena cīvaracetāpanaṁ
pahiṇeyya iminā cīvaracetāpanena cīvaraṁ cetāpetvā itthannāmaṁ
bhikkhuṁ cīvarena acchādehīti. So ce dūto taṁ bhikkhuṁ upasaṅkamitvā
evaṁ vadeyya idaṁ kho bhante āyasmantaṁ uddissa cīvaracetāpanaṁ
ābhataṁ paṭiggaṇhātu āyasmā cīvaracetāpananti. Tena bhikkhunā
so dūto evamassa vacanīyo na kho mayaṁ āvuso cīvaracetāpanaṁ
paṭiggaṇhāma cīvarañca kho mayaṁ paṭiggaṇhāma kālena kappiyanti.
So ce dūto taṁ bhikkhuṁ evaṁ vadeyya atthi panāyasmato koci
veyyāvaccakaroti. Cīvaratthikena bhikkhave bhikkhunā veyyāvaccakaro
niddisitabbo ārāmiko vā upāsako vā eso kho āvuso
bhikkhūnaṁ veyyāvaccakaroti. So ce dūto taṁ veyyāvaccakaraṁ
saññāpetvā taṁ bhikkhuṁ upasaṅkamitvā evaṁ vadeyya yaṁ kho bhante
āyasmā veyyāvaccakaraṁ niddisi saññatto so mayā upasaṅkamatu
āyasmā kālena cīvarena taṁ acchādessatīti. Cīvaratthikena
bhikkhave bhikkhunā veyyāvaccakaro upasaṅkamitvā dvittikkhattuṁ
Codetabbo sāretabbo attho me āvuso cīvarenāti. Dvittikkhattuṁ
codayamāno sārayamāno 1 taṁ cīvaraṁ abhinipphādeyya iccetaṁ kusalaṁ
no ce abhinipphādeyya catukkhattuṁ pañcakkhattuṁ chakkhattuparamaṁ 2
tuṇhībhūtena uddissa ṭhātabbaṁ catukkhattuṁ pañcakkhattuṁ chakkhattuparamaṁ
tuṇhībhūto uddissa tiṭṭhamāno taṁ cīvaraṁ abhinipphādeyya iccetaṁ
kusalaṁ no ce abhinipphādeyya tato ce uttariṁ vāyamamāno
taṁ cīvaraṁ abhinipphādeyya nissaggiyaṁ pācittiyaṁ no ce abhinipphādeyya
yatassa cīvaracetāpanaṁ ābhataṁ tattha sāmaṁ vā gantabbaṁ
dūto vā pāhetabbo yaṁ kho tumhe āyasmanto bhikkhuṁ uddissa
cīvaracetāpanaṁ pahiṇittha na taṁ tassa bhikkhuno kiñci atthaṁ anubhoti
yuñjantāyasmanto sakaṁ mā vo sakaṁ vinassāti 3 . Ayaṁ tattha
sāmīcīti.

[71] Bhikkhuṁ paneva uddissāti bhikkhussatthāya bhikkhuṁ ārammaṇaṁ
1 codiyamāno sāriyamānoti paṭhanti. taṁ na yujjati. na hi ime pāṭhā
kammavācakā. te ce kammavācakā siyuṁ veyyāvaccakaroti padaṁ abhinipphādeyyāti
pade kattā siyā. evaṁ sante pāliyā ukkamo bhaveyya. tato paraṁ hi bhikkhusaddo
abhinipphādeyyāti padesu kattā. kaṅkhāvitaraṇiyampi kattubhāvena vaṇṇitā.
vicāretvā gahetabbaṁ. 2 chakkhattuṁparamantipi paṭhanti. 3 vinassītipi paṭhanti.
Karitvā bhikkhuṁ acchādetukāmo. Rājā nāma yo koci rajjaṁ
kāreti. Rājabhoggo nāma yo koci rañño bhattavetanāraho 1 .
Brāhmaṇo nāma jātiyā brāhmaṇo. Gahapatiko nāma ṭhapetvā
rājānaṁ rājabhoggaṁ brāhmaṇaṁ avaseso gahapatiko nāma.
Cīvaracetāpanaṁ nāma hiraññaṁ vā suvaṇṇaṁ vā maṇi vā muttā vā
masāragallaṁ vā phaliko vā 2 . Iminā cīvaracetāpanenāti paccupaṭṭhitena.
Cetāpetvāti parivaṭṭetvā. Acchādehīti dajjehi.
So ce dūto taṁ bhikkhuṁ upasaṅkamitvā evaṁ vadeyya idaṁ kho
bhante āyasmantaṁ uddissa cīvaracetāpanaṁ ābhataṁ paṭiggaṇhātu
āyasmā cīvaracetāpananti. Tena bhikkhunā so dūto evamassa
vacanīyo na kho mayaṁ āvuso cīvaracetāpanaṁ paṭiggaṇhāma cīvarañca
kho mayaṁ paṭiggaṇhāma kālena kappiyanti. So ce dūto taṁ
bhikkhuṁ evaṁ vadeyya atthi panāyasmato koci veyyāvaccakaroti.
Cīvaratthikena bhikkhave bhikkhunā veyyāvaccakaro niddisitabbo ārāmiko
vā upāsako vā eso kho āvuso bhikkhūnaṁ veyyāvaccakaroti.
Na vattabbo tassa dehīti vā so vā nikkhipissati so
vā parivaṭṭissati 3 so vā cetāpessatīti. So ce dūto taṁ
1 sabbattha bhattavetanāhāroti dissati. 2 Ma. Yu. masāragallaṁ vā phaliko vāti
ime pāṭhā natthi. 3 Ma. Yu. sabbattha parivattissatīti dissati.
Veyyāvaccakaraṁ saññāpetvā taṁ bhikkhuṁ upasaṅkamitvā evaṁ vadeyya
yaṁ kho bhante āyasmā veyyāvaccakaraṁ niddisi saññatto so
mayā upasaṅkamatu āyasmā kālena cīvarena taṁ acchādessatīti.
Cīvaratthikena bhikkhave bhikkhunā veyyāvaccakaro upasaṅkamitvā dvittikkhattuṁ
codetabbo sāretabbo attho me āvuso cīvarenāti.
Na vattabbo dehi me cīvaraṁ āhara me cīvaraṁ parivaṭṭehi 1
me cīvaraṁ cetāpehi me cīvaranti. Dutiyampi vattabbo tatiyampi
vattabbo. Sace abhinipphādeti iccetaṁ kusalaṁ no ce
abhinipphādeti tattha gantvā tuṇhībhūtena uddissa ṭhātabbaṁ na
āsane nisīditabbaṁ na āmisaṁ paṭiggahetabbaṁ na dhammo bhāsitabbo.
Kiṁkāraṇā āgatosīti pucchamāno 2 jānāhi āvusoti vattabbo.
Sace āsane vā nisīdati āmisaṁ vā paṭiggaṇhāti dhammaṁ vā
bhāsati ṭhānaṁ bhañjati. Dutiyampi ṭhātabbaṁ tatiyampi ṭhātabbaṁ
catukkhattuṁ codetvā catukkhattuṁ ṭhātabbaṁ pañcakkhattuṁ codetvā
dvikkhattuṁ ṭhātabbaṁ chakkhattuṁ codetvā na ṭhātabbaṁ. Tato ce
uttariṁ vāyamamāno taṁ cīvaraṁ abhinipphādeti payoge dukkaṭaṁ
paṭilābhena nissaggiyaṁ hoti nissajjitabbaṁ saṅghassa vā gaṇassa vā
puggalassa vā. Evañca pana bhikkhave nissajjitabbaṁ .pe. Idaṁ
1 sabbattha parivattehīti dissati. 2 sabbattha pucchiyamānoti dissati.
Me bhante cīvaraṁ atirekatikkhattuṁ codanāya atirekachakkhattuṁ ṭhānena
abhinipphāditaṁ nissaggiyaṁ imāhaṁ saṅghassa nissajjāmīti .pe.
Dadeyyāti .pe. Dadeyyunti .pe. Āyasmato dammīti. No
ce abhinipphādeyya yatassa cīvaracetāpanaṁ ābhataṁ tattha sāmaṁ
vā gantabbaṁ dūto vā pāhetabbo yaṁ kho tumhe āyasmanto
bhikkhuṁ uddissa cīvaracetāpanaṁ pahiṇittha na taṁ tassa bhikkhuno
kiñci atthaṁ anubhoti yuñjantāyasmanto sakaṁ mā vo sakaṁ
vinassāti. Ayaṁ tattha sāmīcīti ayaṁ tattha anudhammatā.