[52] Anāpatti ñātikāya pārivaṭṭakaṁ parittena vā vipulaṁ
vipulena vā parittaṁ bhikkhu vissāsaṁ gaṇhāti tāvakālikaṁ
1 Yu. vikappanupagapacchimaṁ. 2-3-4 Ma. Yu. ayaṁ pāṭho natthi.
Gaṇhāti cīvaraṁ ṭhapetvā aññaṁ parikkhāraṁ gaṇhāti sikkhamānāya
sāmaṇeriyā ummattakassa ādikammikassāti.
Pañcamasikkhāpadaṁ niṭṭhitaṁ.
-------
Chaṭṭhasikkhāpadaṁ

[53] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena āyasmā
upanando sakyaputto paṭṭho 1 hoti dhammiṁ kathaṁ kātuṁ. Athakho
aññataro seṭṭhiputto yenāyasmā upanando sakyaputto tenupasaṅkami
upasaṅkamitvā āyasmantaṁ upanandaṁ sakyaputtaṁ abhivādetvā
ekamantaṁ nisīdi. Ekamantaṁ nisinnaṁ kho taṁ seṭṭhiputtaṁ āyasmā
upanando sakyaputto dhammiyā kathāya sandassesi samādapesi
samuttejesi sampahaṁsesi. Athakho so seṭṭhiputto āyasmatā
upanandena sakyaputtena dhammiyā kathāya sandassito samādapito
samuttejito sampahaṁsito āyasmantaṁ upanandaṁ sakyaputtaṁ etadavoca
vadeyyātha bhante yena attho paṭibalā mayaṁ ayyassa dātuṁ
yadidaṁ cīvarapiṇḍapātasenāsanagilānapaccayabhesajjaparikkhāranti 2 . Sace
me tvaṁ āvuso dātukāmosi ito ekaṁ sāṭakaṁ dehīti. Amhākaṁ
kho bhante kulaputtānaṁ kismiṁ viya ekasāṭakaṁ gantuṁ āgametha 3
bhante yāva gharaṁ gacchāmi gharaṁ gato ito vā ekaṁ sāṭakaṁ
1 Ma. paṭṭo. 2 Yu. cīvara ... parikkhārānanti. 3 Ma. Yu. āgamehi.
Pahiṇissāmi ito vā sundarataranti. Dutiyampi kho āyasmā
upanando sakyaputto taṁ seṭṭhiputtaṁ etadavoca sace me tvaṁ
āvuso dātukāmosi ito ekaṁ sāṭakaṁ dehīti. Amhākaṁ kho
bhante kulaputtānaṁ kismiṁ viya ekasāṭakaṁ gantuṁ āgametha bhante
yāva gharaṁ gacchāmi gharaṁ gato ito vā ekaṁ sāṭakaṁ pahiṇissāmi
ito vā sundarataranti. Tatiyampi kho āyasmā upanando sakyaputto
taṁ seṭṭhiputtaṁ etadavoca sace me tvaṁ āvuso dātukāmosi
ito ekaṁ sāṭakaṁ dehīti. Amhākaṁ kho bhante kulaputtānaṁ kismiṁ
viya ekasāṭakaṁ gantuṁ āgametha bhante yāva gharaṁ gacchāmi gharaṁ
gato ito vā ekaṁ sāṭakaṁ pahiṇissāmi ito vā sundarataranti.
Kiṁ pana tayā āvuso adātukāmena pavāritena yaṁ tvaṁ pavāretvā
na desīti. Athakho so seṭṭhiputto āyasmatā upanandena
sakyaputtena nippīḷiyamāno ekaṁ sāṭakaṁ datvā agamāsi. Manussā
taṁ seṭṭhiputtaṁ passitvā etadavocuṁ kissa tvaṁ ayya 1 ekasāṭako
āgacchasīti. Athakho so seṭṭhiputto tesaṁ manussānaṁ etamatthaṁ
ārocesi. Manussā ujjhāyanti khīyanti vipācenti mahicchā
ime samaṇā sakyaputtiyā asantuṭṭhā nayime 2 sukarā dhammanimantanāya 3
kātuṁ kathaṁ hi nāma seṭṭhiputtena dhammanimantanāya
1 Ma. Yu. ayyo. 2 Ma. Yu. nayimesaṁ. 3 Ma. Yu. dhammanimantanāpi.
Kayiramānāya sāṭakaṁ gaṇhissantīti 1 . Assosuṁ kho bhikkhū tesaṁ
manussānaṁ ujjhāyantānaṁ khīyantānaṁ vipācentānaṁ. Ye te bhikkhū
appicchā santuṭṭhā .pe. Te ujjhāyanti khīyanti vipācenti
kathaṁ hi nāma āyasmā upanando sakyaputto seṭṭhiputtaṁ cīvaraṁ
viññāpessatīti. Athakho te bhikkhū bhagavato etamatthaṁ ārocesuṁ.
Saccaṁ kira tvaṁ upananda seṭṭhiputtaṁ cīvaraṁ viññāpesīti. Saccaṁ
bhagavāti 2 . Ñātako te upananda aññātakoti. Aññātako
bhagavāti. Aññātako moghapurisa aññātakassa na jānāti paṭirūpaṁ
vā appaṭirūpaṁ vā santaṁ vā asantaṁ vā tattha nāma tvaṁ
moghapurisa aññātakaṁ seṭṭhiputtaṁ cīvaraṁ viññāpessasi netaṁ
moghapurisa appasannānaṁ vā pasādāya pasannānaṁ vā bhiyyobhāvāya
.pe. Evañca pana bhikkhave imaṁ sikkhāpadaṁ uddiseyyātha yo
pana bhikkhu aññātakaṁ gahapatiṁ vā gahapatāniṁ vā cīvaraṁ viññāpeyya
nissaggiyaṁ pācittiyanti. Evañcidaṁ bhagavatā bhikkhūnaṁ sikkhāpadaṁ
paññattaṁ hoti.

[54] Tena kho pana samayena sambahulā bhikkhū sāketā sāvatthiṁ
addhānamaggapaṭipannā honti. Antarāmagge corā nikkhamitvā
te bhikkhū acchindiṁsu. Athakho te bhikkhū bhagavatā paṭikkhittaṁ
aññātakaṁ gahapatiṁ vā gahapatāniṁ vā cīvaraṁ viññāpetunti
1 Ma. Yu. gahessantīti. 2 Yu. itisaddo natthi.
Kukkuccāyantā na viññāpesuṁ yathānaggā va sāvatthiṁ gantvā bhikkhū
abhivādenti. Bhikkhū evamāhaṁsu sundarā kho ime āvuso
ājīvakā ye ime bhikkhū abhivādentīti. Te evamāhaṁsu na mayaṁ
āvuso ājīvakā bhikkhū mayanti. Bhikkhū āyasmantaṁ upāliṁ
etadavocuṁ iṅgha āvuso upāli ime anuyuñjāhīti. Athakho 1 te
bhikkhū āyasmatā upālinā anuyuñjiyamānā etamatthaṁ ārocesuṁ 1 .
Athakho āyasmā upāli te bhikkhū anuyuñjitvā bhikkhū etadavoca
bhikkhū ime āvuso detha tesaṁ 2 cīvarānīti. Ye te bhikkhū
appicchā .pe. Te ujjhāyanti khīyanti vipācenti kathaṁ hi
nāma bhikkhū naggā āgacchissanti nanu nāma tiṇena vā
paṭicchādetvā āgantabbanti. Athakho te bhikkhū bhagavato etamatthaṁ
ārocesuṁ. Athakho bhagavā etasmiṁ nidāne etasmiṁ pakaraṇe [3]-
dhammiṁ kathaṁ katvā bhikkhū āmantesi anujānāmi bhikkhave acchinnacīvarassa
vā naṭṭhacīvarassa vā aññātakaṁ gahapatiṁ vā gahapatāniṁ vā
cīvaraṁ viññāpetuṁ yaṁ āvāsaṁ paṭhamaṁ upagacchati sace tattha hoti
saṅghassa vihāracīvaraṁ vā uttarattharaṇaṁ vā bhummattharaṇaṁ 4 vā bhisicchavi
vā taṁ gahetvā pārupituṁ tañca kho 5 labhitvā odahissāmīti
no ce hoti saṅghassa vihāracīvaraṁ vā uttarattharaṇaṁ vā bhummattharaṇaṁ
1 Yu. ime pāṭhā natthi. 2 Ma. Yu. nesaṁ. 3 Po. bhikkhusaṅghaṁ sannipātāpetvā.
4 Ma. bhūmattharaṇaṁ. 5 Ma. Yu. tañca khoti pāṭho natthi.
Vā bhisicchavi vā tiṇena vā paṇṇena vā paṭicchādetvā
āgantabbaṁ natveva naggena āgantabbaṁ yo āgaccheyya
āpatti dukkaṭassa. Evañca pana bhikkhave imaṁ sikkhāpadaṁ
uddiseyyātha yo pana bhikkhu aññātakaṁ gahapatiṁ vā gahapatāniṁ vā
cīvaraṁ viññāpeyya aññatra samayā nissaggiyaṁ pācittiyaṁ.
Tatthāyaṁ samayo acchinnacīvaro vā hoti bhikkhu naṭṭhacīvaro vā
ayaṁ tattha samayoti.

[55] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Aññātako nāma mātito
vā pitito vā yāva sattamā pitāmahayugā asambaddho. Gahapati
nāma yo koci agāraṁ ajjhāvasati. Gahapatānī nāma yā kāci
agāraṁ ajjhāvasati. Cīvaraṁ nāma channaṁ cīvarānaṁ aññataraṁ cīvaraṁ
vikappanūpagaṁ pacchimaṁ 1 . Aññatra samayāti ṭhapetvā samayaṁ. Acchinnacīvaro
nāma bhikkhussa cīvaraṁ acchinnaṁ hoti rājūhi vā corehi
vā dhuttehi vā yehi kehici vā acchinnaṁ hoti. Naṭṭhacīvaro
nāma bhikkhussa cīvaraṁ agginā vā daḍḍhaṁ hoti udakena vā vuḷhaṁ
hoti undurehi vā upacikāhi vā khāyitaṁ hoti paribhogajiṇṇaṁ
vā hoti. Aññatra samayā viññāpeti payoge dukkaṭaṁ
paṭilābhena nissaggiyaṁ hoti nissajjitabbaṁ saṅghassa vā gaṇassa
1 Yu. vikappanupagapacchimaṁ.
Vā puggalassa vā. Evañca pana bhikkhave nissajjitabbaṁ .pe.
Idaṁ me bhante cīvaraṁ aññātakaṁ gahapatikaṁ aññatra samayā
viññāpitaṁ nissaggiyaṁ imāhaṁ saṅghassa nissajjāmīti .pe.
Dadeyyāti .pe. Dadeyyunti .pe. Āyasmato dammīti.

[56] Aññātake aññātakasaññī aññatra samayā cīvaraṁ
viññāpeti nissaggiyaṁ pācittiyaṁ aññātake vematiko aññatra
samayā cīvaraṁ viññāpeti nissaggiyaṁ pācittiyaṁ. Aññātake
aññātakasaññī aññatra samayā cīvaraṁ viññāpeti nissaggiyaṁ
pācittiyaṁ. Ñātake aññātakasaññī āpatti dukkaṭassa.
Ñātake vematiko āpatti dukkaṭassa. Ñātake ñātakasaññī
anāpatti.

[57] Anāpatti samaye ñātakānaṁ pavāritānaṁ aññassatthāya
attano dhanena ummattakassa ādikammikassāti.
Chaṭṭhasikkhāpadaṁ niṭṭhitaṁ.
-------
Sattamasikkhāpadaṁ

[58] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā
bhikkhū acchinnacīvarake bhikkhū upasaṅkamitvā evaṁ vadenti 1 bhagavatā
āvuso anuññātaṁ acchinnacīvarassa vā naṭṭhacīvarassa vā aññātakaṁ
gahapatiṁ vā gahapatāniṁ vā cīvaraṁ viññāpetuṁ viññāpetha āvuso
cīvaranti. Alaṁ āvuso laddhaṁ amhehi cīvaranti. Mayaṁ āvuso 2
āyasmantānaṁ atthāya 3 viññāpemāti. Viññāpetha āvusoti.
Athakho chabbaggiyā bhikkhū aññātake 4 gahapatike upasaṅkamitvā
etadavocuṁ acchinnacīvarakā āvuso bhikkhū āgatā detha nesaṁ
cīvaranti 5 bahuṁ cīvaraṁ viññāpesuṁ. Tena kho pana samayena aññataro
puriso sabhāyaṁ nisinno aññataraṁ purisaṁ etadavoca acchinnacīvarakā
ayyā 6 āgatā nesaṁ 7 mayā cīvaraṁ dinnanti. Sopi evamāha
mayāpi dinnanti. Aparopi evamāha mayāpi dinnanti. Te
1 Ma. Yu. vadanti. 2-3-4 Ma. Yu. ime pāṭhā natthi. 5 Ma. Yu. Rā. cīvarānīti.
6 Ma. Yu. ayyo bhikkhū. evamīdise ṭhānesu. 7 Ma. Yu. tesaṁ.
Ujjhāyanti khīyanti vipācenti kathaṁ hi nāma samaṇā sakyaputtiyā
na mattaṁ jānitvā bahuṁ cīvaraṁ viññāpessanti dussavaṇijjaṁ 1 vā
samaṇā 2 sakyaputtiyā karissanti paggāhikasālaṁ vā pasāressantīti.
Assosuṁ kho bhikkhū tesaṁ manussānaṁ ujjhāyantānaṁ khīyantānaṁ
vipācentānaṁ. Ye te bhikkhū appicchā santuṭṭhā .pe. Te
ujjhāyanti khīyanti vipācenti kathaṁ hi nāma chabbaggiyā bhikkhū
na mattaṁ jānitvā bahuṁ cīvaraṁ viññāpessantīti. Athakho te
bhikkhū bhagavato etamatthaṁ ārocesuṁ. Saccaṁ kira tumhe bhikkhave na
mattaṁ jānitvā bahuṁ cīvaraṁ viññāpethāti. Saccaṁ bhagavāti.
Vigarahi buddho bhagavā kathaṁ hi nāma tumhe moghapurisā na mattaṁ
jānitvā bahuṁ cīvaraṁ viññāpessatha netaṁ moghapurisā appasannānaṁ
vā pasādāya pasannānaṁ vā bhiyyobhāvāya .pe. Evañca pana
bhikkhave imaṁ sikkhāpadaṁ uddiseyyātha tañce aññātako gahapati
vā gahapatānī vā bahūhi cīvarehi abhihaṭṭhuṁ pavāreyya santaruttaraparamantena
bhikkhunā tato cīvaraṁ sāditabbaṁ tato ce uttariṁ
sādiyeyya nissaggiyaṁ pācittiyanti.

[59] Tañceti acchinnacīvarakaṁ bhikkhuṁ. Aññātako nāma mātito
vā pitito vā yāva sattamā pitāmahayugā asambaddho. Gahapati nāma
yo koci agāraṁ ajjhāvasati. Gahapatānī nāma yā kāci agāraṁ
ajjhāvasati. Bahūhi cīvarehīti bahukehi cīvarehi. Abhihaṭṭhuṁ
1 Ma. dussavāṇijjaṁ. 2 Po. dussavāṇijā ime samaṇā.
Pavāreyyāti yāvatakaṁ icchasi tāvatakaṁ gaṇhāhīti. Santaruttaraparamantena
bhikkhunā tato cīvaraṁ sāditabbanti sace tīṇi naṭṭhāni
honti dve sāditabbāni dve naṭṭhāni ekaṁ sāditabbaṁ
ekaṁ naṭṭhaṁ na [1]- sāditabbaṁ. Tato ce uttariṁ sādiyeyyāti
taduttariṁ viññāpeti payoge dukkaṭaṁ paṭilābhena nissaggiyaṁ
hoti nissajjitabbaṁ saṅghassa vā gaṇassa vā puggalassa vā.
Evañca pana bhikkhave nissajjitabbaṁ .pe. Imaṁ me bhante cīvaraṁ
aññātakaṁ gahapatikaṁ [2]- taduttariṁ viññāpitaṁ nissaggiyaṁ imāhaṁ saṅghassa
nissajjāmīti .pe. Dadeyyāti .pe. Dadeyyunti .pe. Āyasmato
dammīti.

[60] Aññātake aññātakasaññī taduttariṁ cīvaraṁ viññāpeti
nissaggiyaṁ pācittiyaṁ. Aññātake vematiko taduttariṁ cīvaraṁ viññāpeti
nissaggiyaṁ pācittiyaṁ. Aññātake ñātakasaññī taduttariṁ cīvaraṁ
viññāpeti nissaggiyaṁ pācittiyaṁ. Ñātake aññātakasaññī
āpatti dukkaṭassa. Ñātake vematiko āpatti dukkaṭassa.
Ñātake ñātakasaññī anāpatti.

[61] Anāpatti sesakaṁ āharissāmīti haranto gacchati sesakaṁ
tuyheva hotūti denti na acchinnakāraṇā denti na naṭṭhakāraṇā
1 Ma. Yu. kiñci. 2 Ma. Yu. upasaṅkamitvā.
Denti ñātakānaṁ pavāritānaṁ attano dhanena ummattakassa
ādikammikassāti.
Sattamasikkhāpadaṁ niṭṭhitaṁ.
-------
Aṭṭhamasikkhāpadaṁ